Proverbios 4 - Quechua Margos-Yarowilca-Lauricocha Bible（qvm）

Alita rurapäkunanpaq yätsishqan

1Wamrakuna, taytayki yätsishushqaykita shumaq chaskikäriy.

Tsayno chaskikurqa tantiyakuq runakunami kankipaq.

2Alita ruranaykipaqmi qamkunata yachatsï.

Yachatsishqäta imaypis ama qonqapäkuytsu.

3Noqapis taytäpa makinchömi winashqä.

Mamäpis kuyamarmi ashmamashqa.

4Kuyamarmi papänï kayno nimarqan:

<

Nishqäkunata wiyakurqa alimi kawankipaq.

5Tantiyakuq kayta imanöpapis ashiy.

Yachatsishqäkunata imaypis ama qonqaytsu.

6Tantiyakuytaqa kuyanki.

Imaypis ama kacharinkitsu.

Tsaynöpami lutan ruraykunaman mana jatikankipaqtsu.

7Tantiyakuq kanaykipaqqa imatapis kachariykur yachakuy.

8Tantiyakuq kaptikiqa pïmaypis ali rikashushpayki respitashunkipaqmi.

9Tantiyakuq karqa kuyaylapaq corönan jatishqanömi kankipaq>>.

10Yätsishqäkunata chaskikuy, hïju.

Chaskikurqa atska watami kawankipaq.

11Noqa yachaykätsï shumaq tantiyakur ali kawanaykipaqmi.

Ali nänipa purinaykipaqmi yachaykätsï.

12Ali nänipa purirqa manami mana aliman chayankipaqtsu.

Cörrirpis manami tuninkipaqtsu.

13Yachatsishqäkunata mana qonqaypa ruray.

Tsaykunata cäsukurqa ali kawaytami tarinkipaq.

14Fiyu runakuna kawashqannöqa ama kawaytsu.

Paykuna jutsata ruraptinpis qamqa jutsata ama ruraytsu.

15Paykuna rurashqankunata ama yachakuytsu.

16Tsay runakuna jutsata mana rurarqa jamaytapis manami taripäkuntsu.

Pitapis jutsaman mana tunitsirqa punuytapis manami taripäkuntsu.

17Yarqanaypanöraq y yakunaypanöraq jutsa rurayta munapäkun.

Paykunaqa imanöpapis runa mayinta atacaytami munan.

18Alita ruraq runakuna kawashqanqa patsa waraptin atsikyashqannömi kaykan.

Patsa waraylanta mas atsikyashqannömi tsay runakunapis waranlan waranlan kuyaypaq munaypaq kawapäkun.

19Jutsa ruraq runakuna kawashqanqa yanawyaykaq tsakaynömi kaykan.

Tsayno karmi jutsa rurashqantapis cuentata mana qokuntsu.

20Tantiyatsishqäkunata chaskikuy, hïju.

Nishqäkunata imaypis yarparay.

21Yätsishqäkunata imaypis ama qonqaytsu.

Nishqäkunata umaykiman churakuy.

22Nishqäkunata yachakuqkunaqa ali kawaytami tarinqapaq.

Qeshyananpa trukanqa sänumi kawanqapaq.

23Shonquyki alita yarpaptinqa alimi kawankipaq.

Tsayno kaykaptinqa lutanta mana yarpänaykipaq shonquykita shumaq cuidakuy.

24Runa mayikita ama tumpaytsu.

Imaypis ama lulakuytsu.

25Jutsaman mana tuninaykipaq shumaq cuidakuy.

26Imano kawaykashqaykitapis shumaq tantiyakuy.

Nänipita mana yeqaypa aywaqno imaypis alilata ruray.

27Lutan ruraykunataqa ama ruraytsu.

Jutsa ruraypita witikuy.