Salmo 141 - Quechua Margos-Yarowilca-Lauricocha Bible（qvm）

Salmo 141 (140)Jutsata mana rurananpaq Tayta Diosta manakushqan 1a (1a) David qelqashqan salmu.

1 1 (1b) Tayta Dios, qamtami manakamü.

Yanapamänaykipaq jukla aywaykalämuy.

Ruwakamuptï jukla yanapaykalämay.

2Manakamushqäpis inciensuno nawpaykiman chaykalämutsun.

Makïta joqarkur ruwakamushqäpis tutapa rupatsishqan sacrificiuno kaykulätsun.

3 Tayta Dios, lutankunata mana rimanäpaq shimïta tsapaykulay.

Mana alikunata mana parlanäpaq imaypis yanapaykalämay.

4Lutankunata mana yarpachakunäpaq tantiyaykatsilämay.

Jutsa ruraqkunawan cumpinchi kanäta ama munaykulaytsu.

Paykunawan mikur upur juntakänätapis ama kachapaykalämaytsu.

5Ali runa corrigir astamaptinqa chaskikümi.

Anyapämashqantapis chaskikümi.

Jutsa ruraqkuna yätsimashqantami itsanqa mayaytapis mana munätsu.

Paykunata castigananpaqmi Tayta Diosta imaypis manakuykä.

6Cabecïllankunataqa desgraciami pasanqapaq.

Tsayraqmi tantiyakärinqa noqa wilapashqäkuna rasun kaq kashqanta.

7Yapyaptin kurpakuna mashtarashqannömi tulunkunapis panteoncho mashtaranqa.

8 Tayta Dios, qamlamanmi yärakamü.

Ama kachaykalämaytsu.

9Fiyu runakuna trampata churapämashqanman mana tuninäpaq tsapaykalämay.

10Trampata churapämashqanman kikinkuna jeqatsun.

Noqata itsanqa salvaykalämay.