1¡Aleluya!
Kushishqami kawan Tayta Diosta mantsakuq runaqa.
Tsay runaqa Diospa mandamientunkunata cumplirmi kushikun.
2Paypita miraqkunami Israel nacioncho munayniyuq kanqapaq.
Paykunaqa bendiciontami chaskinqapaq.
3Wayincho imaykankunapis putsuy putsuymi kanqapaq.
Paykunaqa pïmaypaqpis ali shonqumi kanqapaq.
4Wakin runakuna tsakäpakushqano kaykaptinpis ali runaqa atskichönömi kaykan.
Payqa ali shonqumi, kuyapäkuqmi y alilata ruraqmi kaykan.
5Pipis manakuptin ali runaqa juklami makyaykun.
Ima ruraykunatapis shumaq yarpachakuykurmi ruran.
6Manami imaypis lutanta rurantsu.
Paytaqa pïmaypis yarparkunmi.
7Mana ali noticiata mayarpis manami mantsakuntsu.
Ima kaptinpis Tayta Dioslamanmi yärakun.
8Imaypis jawkalami kawan.
Manami imatapis mantsakuntsu.
Contrankuna ushakashqantapis rikanmi.
9Waktsakunata imaypis yanapanmi.
Alilatami imaypis ruran.
Pïmaypis paytaqa respitanmi.
10Tsayta rikarmi fiyu runaqa payta chikin.
Rabyashpan kiruntapis uchunraqmi.
Lutanta rurananpaq yarpachakushqankunaqa manami kamakanqatsu.
Who We AreWhat We EelieveWhat We Do
2025 by iamachristian.org,Inc All rights reserved.
