Isaías 59 - Quechua Margos-Yarowilca-Lauricocha Bible（qvm）

Jutsa ruraq kashqantsi

1Ama yarpapäkuytsu salvashunaykipaq Tayta Dios munayniynaq kashqanta.

Payqa manami upatsu kaykan manakärishqaykita mana mayashunaykipaq.

2Tsaypa trukanqa jutsaykikunami jatun perqano paypita rakiykäshunki.

Tsaymi jutsata rurapäkushqaykipita Tayta Diosnintsi mana rikärishunkinatsu.

Manakuptikipis manami mayashunkitsu.

3Wanutsikuq kapäkuptikimi makikikunapis yawarlana kaykan.

Dëduykikunapis runa wanutsiqmi kaykan.

Shimikikunapis pasaypa lulakuylatami riman.

Qalluykikunapis mana alikunalatami riman.

4Manami pipis alita rurananpaq yarpachakuntsu.

Demandakurpis manami rasun kaqtaqa rimapäkuntsu.

Autoridäkunapis lulakuq kaqtami criyipäkun.

Manami pipis rasun kaqtaqa rimantsu.

Jutsa rurayman churakashqami karkaykan.

5Likanta pachka awaqno y culebrapa runtunta oqlaqnömi karkaykan.

Tsay runtukunata mikuq kaqqa wanunqami.

Runtuta pakiptinqa culebrakunami yarqamunqa.

6Röpata rurananpaq pachkapa likan mana ali kashqannömi tsay runakuna lapan rurashqanpis mana ali kaykan.

Mana ali ruraykunalapaqmi paykunaqa mishkipäkun.

7Tsaymi mana alita rurananpaq jukla cörripäkun.

Jutsaynaq runata wanutsinanpaq warakaylami aywapäkun.

Mana alita ruranalanpaqmi yarpachakurkaykan.

Maypa aywarpis lutankunalatami rurapäkun.

8Ali kaway imano kashqantapis manami musyapäkuntsu.

Manami imatapis alitaqa rurapäkuntsu.

Paykuna kawashqanno kawarqa manami pipis ali kawayta tarinqatsu.

9Tsaymi salvakuyta munarpis mana kamäpakuntsitsu.

Runa mayintsiwan ali kawaytapis mana puëdintsitsu.

Atsikyaqta shuyaraptintsipis tsakaylami kaykan.

Atskichöno kawayta munarpis tsakaychönömi kawaykantsi.

10Qaprakuna perqata yataylapa puriqnömi karkaykantsi.

Rikayta mana puëdiq runa lamkaylapa puriqnömi kaykantsi.

Pulan junaqpis tsakaypa takakaykaqnömi kaykantsi.

Kawaykarpis wanushqanömi kawaykantsi.

11Pasaypa lakikur ösunömi waqaykantsi.

Paluma waqaqnömi lakishqa ataykantsi.

Ali kawayta shuyarpaptintsipis manami chayamuntsu.

Salvakuyta munarpis manami salvakuntsitsu.

12Imaypis jutsata rurarmi Tayta Diosta rabyanätsintsi.

Lapan rurashqantsikunapis jutsayuq kashqantsitami wilakuykan.

Jutsa rurayta kachariyta mana kamäpakurmi musyantsi jutsayuq kashqantsita.

13 Tayta Diosnintsita mana cäsukurmi nishqankunata mana rurantsitsu.

Lutanta ruranantsipaq y runa mayintsita engañanantsipaqmi wilanakuykantsi.

14Juezkunapis ali runapa contranmi sharkapäkun.

Alita rurananpaq manami pipis yarpannatsu.

Rasuntanöraq rimarmi pïmaytapis criyitsipäkun.

Pïmaypis suwapänakurmi kawarkaykan.

15Lapanpis lulakunmi.

Ali runakunataqa carcilmanmi wichqapäkun.

Tsayta rikarmi Tayta Dios pasaypa rabyakun.

16Mana alikunata rurapäkuptin pipis mana michaqta rikarmi Tayta Dios fiyupa rabyakun.

Tsaymi nakaqkunapa favornin kikin Tayta Dios sharkushqa.

17Pelyacho tsapakuna chalëcutami jatikushqa.

Tsay chalëcuqa ali rurayninkunami kaykan.

Tsaynöpis umanman jatikushqan cascuqa salvacionmi kaykan.

Runa mayinta nakatsiqkunata castigananpaq pasaypa rabyashqami yarqushqa.

18Lutanta rurashqanman tupumi castiganqa.

Pasaypa rabyar contrankunata merecishqanman tupumi castiganqa.

Lamar kuchun markakunacho taqkunatapis castiganqa.

19Cargashqa mayu bötiypa bötir shamuqnöraqmi Tayta Dios shamunqa castigananpaq.

Tsaymi inti jeqamunan lädupita inti jeqanan läduyaq Tayta Diosta mantsakärinqa.

20 Tayta Diosmi kayno nin:

< shamunqa.

Jacobpita miraqkuna jutsa rurayta kachariptinqa lapantami salvanqa>>.

21 Tayta Diosmi kayno nin:

< rurarmi kayno nishaq:

Kay pactutami imaypis qamkuna yarparanki.

Manami imaypis qonqankipaqtsu.

Tsurikikunapis wilkaykikunapis manami qonqanqatsu> >>.