Salmo 16 - Quechua Margos-Yarowilca-Lauricocha Bible（qvm）

Salmo 16 (15)Tayta Diospa makincho kawashqantsi lapanpitapis mas ali kashqan 1a (1a) David qelqashqan salmu.

1 1 (1b) Tayta Dios, qamlamanmi yärakamü.

Mana ali ruraykunapita tsapaykalämay.

2 Tayta Diosta manakurmi kayno nishqä:

<

Qampa makikicho kawashqäqa lapanpitapis mas alimi kaykan>>.

3Kay patsacho munashqaykino kawaq santu runakunaqa rasunpa ali runakunami karkaykan.

Paykunapita lapan shonqüwanmi kushikü.

4Juk diosta adoraqkunaqa pasaypami nakapäkunqa.

Noqaqa juk diospa altarninmanpis manami uywapa yawarninta winapäshaqtsu.

Jutinkunatapis manami imaypis rimashaqtsu.

5 Tayta Dios, kikikimi herenciä kaykanki.

Qammi bendicionta imaypis churamunki.

Lapan pasamänanpaq kaqkunatapis qamqa musyankimi.

6Lapan kamaripämashqayki pasaypa alimi kaykan.

Tsaymanqa manami imapis tinkuntsu.

7 Tayta Diosmi imano kawanäpaqpis tantiyatsiman.

Tsaymi payta imaypis alabashaq.

Tantiyatsimashqantaqa tsakaypapis yarparaykämi.

8 Tayta Diostami imay hörapis yarparaykä.

Alawqa kaq nawpächo karmi imaypis yanapaykäman.

9Tsaymi shonqüpis pasaypa kushikun.

Shimïpis paytami alaban.

Payman yärakurmi imaypis jawka kawaykä.

10Wanushkuna pamparashqanchöqa manami kachaykamankipaqtsu.

Santu sirviqniki kaptïmi sepultüracho ayä ismunantapis mana munankipaqtsu.

11Munashqaykino kawanäpaqmi ali nänipa pushaykämanki.

Nawpaykichöqa imaypis kushishqalami kawaykä.

Alawqa kaq makikiwanmi imaypis bendicionnikita churaykämunki.