Esdras 7 - Quechua Margos-Yarowilca-Lauricocha Bible（qvm）

Jerusalénman Esdras chayashqan

1Tsaypita watakuna pasarkuptinnami Artajerjesna Persia nacionpa mandaqnin rey karqan. Tsay witsanqa Babilonia provinciachömi Esdras tarqan. Pay karqan Seraíaspa tsurin. Seraías karqan Azaríaspa tsurin. Azarías karqan Hilcíaspa tsurin.

2Hilcías karqan Salumpa tsurin. Salum karqan Sadocpa tsurin. Sadoc karqan Ahitobpa tsurin.

3Ahitob karqan Amaríaspa tsurin. Amarías karqan Azaríaspa tsurin. Azarías karqan Meraiotpa tsurin.

4Meraiot karqan Zeraíaspa tsurin. Zeraías karqan Uzipa tsurin. Uzi karqan Buquipa tsurin.

5Buqui karqan Abisúapa tsurin. Abisúa karqan Fineespa tsurin. Finees karqan Eleazarpa tsurin. Eleazar karqan Aarónpa tsurin. Aarónnami karqan punta kaq mandaq cüra.

6Esdrasqa Moisés chaskishqan leykunata alimi yacharqan. Tsay leykunatami Israel runakunata kuyaq Tayta Dios Moisésta entregarqan. Esdrasta Tayta Dios yanapaptinmi rey Artajerjes lapan manakushqanta kamariparqan Babiloniapita Jerusalénman aywananpaq.

7Paywanmi aywapäkurqan cürakuna, levitakuna, cantaqkuna, templu punkuta täpaqkuna templucho aruqkuna y wakin Israel runakunapis. Paykuna aywapäkurqan Artajerjes qanchis wata rey kaykänan witsanmi.

8Rey Artajerjes qanchis watana rey kaykaptinmi pitsqa kaq killacho Jerusalénman Esdras chayarqan.

9Paymi Babiloniapita yarqamurqan wata qalaykunan punta kaq killa punta kaq junaqcho. Jerusalénman chayarqan pitsqa kaq killa punta kaq junaqmi. Kuyapäkuq Tayta Dios yanapaptinmi jawkala chayapäkurqan.

10Esdrasqa lapan shonqunwanmi Tayta Diospa leyninkunata yachakur cumplirqan. Nirkurnami tsay leykunata y estatütunkunata Israel mayinkunata yachatsirqan.

11Babiloniapita manaraq yarquptinmi Esdrasta rey Artajerjes cartata entregarqan. Tsay cartachömi kayno qelqaraykan:

12Jana patsacho kaykaq Tayta Diospa leyninkunata yachaq cüra Esdras, noqa rey Artajerjesmi qampaq salüdüta apatsikamü.

13Levita kaptinpis o cüra kaptinpis lapan mandashqä nacionkunacho taq Israel runakunatami nï qamwan aywayta munarqa Jerusalénman aywapäkunanpaq.

14Noqami qanchis yätsimaqnïkunawan Judáman y Jerusalénman qamta kachaykä Diosnikipa leyninkunata tsaycho cumplitsinaykipaq.

15Yätsimaqnïkunawan shuntapäkushqä qellayta y qorita Jerusalénman aywar apanki. Lapan voluntänïwanmi tsaykunata shuntapäkushqä Jerusaléncho taykaq Diosnikipaq.

16Tsaynöpis apanki Babilonia provinciacho shuntapäkushqayki qellayta y qorita. Tsay jananman apanki runakuna y cürakuna voluntäninpita ofrenda shuntashqankunatapis. Lapan tsaykunata Jerusalén templuman churanki.

17Tsaykunawanmi rantinki turitukunata, carnikunata, carnishkunata, tsaki mikuyta y vïnutapis. Tsaykunata Diosnikipa templuncho kaykaq altarcho sacrificiupaq rupatsinki.

18Putsuq kaq qellayta y qorita Tayta Diosniki tantiyatsishushqaykinöla gastanki.

19Tsaynöla Diosnikita templuncho adorapäkunaykipaq entregashushqayki manëjukunata templuman churanki.

20Diosnikipa templunpaq imapis pishiptinqa churakunä almacenpita jorqunki.

21Éufrates mayu tsimpan provinciacho kaykaq tesorërukunatami noqa rey Artajerjes kayno nï: Esdras manakushushqaykitaqa imatapis kamaripanki. Payqa jana patsacho kaykaq Tayta Diospa leyninkunata yachatsiq cürami kaykan.

22Entreganaykipaq autorizädu karkaykanki hasta kimsa waranqa kimsa pachak (3,300) kïlu qellayta, ishkay chunka ishkay waranqa (22,000) kïlu trïguta, ishkay waranqa ishkay pachak (2,200) litru vïnuta y ishkay waranqa ishkay pachak (2,200) litru aceitita. Kachitaqa entregapäkunki nistashqanman tupu.

23Jana patsacho kaykaq Tayta Dios nishqanman tupu Jerusalén templunpaq lapanta jukla entregapäkunki. Tsaynöpami tsurïkunatapis ni mandashqä nacionkunatapis Tayta Dios mana castiganqatsu.

24Cürakunata, levitakunata, cantaqkunata, punku täpaqkunata, templucho sirviqkunata ni pï runatapis Diospa templuncho aruq kaqtaqa imapitapis impuestuta ama cobrankitsu.

25Esdras, Diosniki tantiyatsishushqaykino Éufrates mayu wak tsimpan provinciacho juezkunata y gobernadorkunata churanki. Paykunami arreglanqa Israel mayikikuna kikinpura quejanakushqanta. Tsaynöpis mana yachaq runakunata Diosnikipa leyninkunata yachatsinki.

26Tayta Diosnikipa leyninkunata y noqapa leynïkunata mana cumpliq runakunataqa jukla castiganki wanutsiypa karpis, markanpita qarquypa karpis, multata pägatsiypa karpis o carcilman wichqatsiypa karpis.

Tayta Diosta Esdras manakushqan

27Tsay cartata chaskirkurmi Tayta Diosta Esdras kayno manakurqan: <

28Tsaynöpis agradëcikü kuyapämashpayki reytapis, yätsiqninkunatapis y mandäshiqninkunatapis yanapamänanpaq yarpayta qoshqaykipita. Tsayno yanapamaptikimi Israel mayor runakunata shuntashqä Jerusalénman aywapäkunäpaq>>.