Jueces 2 - Quechua Margos-Yarowilca-Lauricocha Bible（qvm）

Tayta Diospa angilnin Boquim particho Israel runakunata yuripashqan

1 Tayta Diospa angilninmi Gilgalpita Boquimman aywaykur Israel runakunata kayno nirqan: < rurashqantsitaqa manami imaypis qonqashaqtsu.

2Itsanqa kay nacioncho taq runakunawan ama ima pactutapis rurapäkunkitsu. Tsaypa trukanqa altarninkunatapis chipyaq juchutsipäkunki>. Tsayno niykaptïpis qamkunaqa manami cäsukamashqankitsu. ¿Imanirtaq puyñu rinri kapäkunki?

3Tsaypitami kayno nï: Tarkaykashqayki markakunacho taykaq runakunata manami qarqushaqtsu. Paykunami chakikicho kasha jatiraykaqno kanqa. Adorapäkushqan diosninkunalapaqmi shonquykipis yarparanqa>>.

4 Tayta Diospa angilnin tsayno parlayta usharkuptin lapan Israel runakuna iktsuypa iktsur waqapäkurqan.

5Tsaymi tsay partipa jutinta churaparqan Boquim jutin kananpaq. Tsaychömi Tayta Diospaq sacrificiukunata rupatsipäkurqan.

Josué wanushqan Josué 24.29-31

6Aywakärinanpaq Josué niptinmi Israel runakuna posisionta chaskishqan chakrankunaman kutikärirqan.

7Israel runakunata yanapar milagrukunata Tayta Dios rurashqantami Josuépis y Egiptupita wakin yarqamuqkunapis rikapäkurqan. Tsaymi paykuna kawashqanyaq Israel runakuna Tayta Dios munashqanno kawapäkurqan.

8Tsaypitanami Tayta Diospa sirviqnin Josué pachak chunka (110) watayuq kaykashpan wanurqan.

9Wanuykuptinmi Timnat-seracho kikinpa chakranman pampapäkurqan. Tsayqa karqan Gaas jirka norti kaq lädupa y Efraín jalqakunachömi.

10Tsaypitami Josuépa winay mayinkunapis wanurqanna. Qepa yuriq runakunaqa manami musyarqantsu Tayta Dios nishqankunata ni Israel runakunata imano yanapashqantapis.

Israel runakuna juk dioskunatana adorashqan

11Tsaypitanami Tayta Diosta mana cäsukur Israel runakunaqa Baal dioskunata adorarqan.

12Egiptupita jorqamushqa kaykaptinpis unay aylunkuna yärakushqan Tayta Diosta mananami adorapäkurqannatsu, sinöqa lädun nacionkunacho taq runakuna adorashqan dioskunatanami adorapäkurqan. Tsaymi Tayta Dios pasaypa rabyakurqan.

13Tsayno rabyakurqan payta adorananpa trukan Baal diosta y Astarot diösata adorapäkuptinmi.

14Tsayno kashqanpita Tayta Dios fiyupa rabyakushpan Israel runakunata mana yanaparqannatsu. Tsaymi lädun nacionkunacho taq contran runakuna yaykuykur imaykantapis apakuptin defiendikuyta mana kamäpakurqantsu.

15Contran runakunawan pelyaq aywaptinpis Tayta Dios nishqannölami Israel runakunapa contran rikakurqan. Tsaymi ima ruraytapis mana kamäpakushpan pasaypa lakikärirqan.

16Tsaypitanami juezkunata Tayta Dios churarqan contran runakunata vincipäkunanpaq.

17Tsayno kaptinpis tsay juezkunata Israel runakuna mana cäsupaypami juk dioskunata adorapäkurqan. Unay aylunkuna Tayta Diospa mandamientunkunata cäsukärishqa kaptinpis paykunaqa manami cäsukärirqantsu.

18Tsayno kaptinpis contrankuna pasaypa nakatsishqanta rikarmi Tayta Dios kuyapar juk juezta churaparqan. Tsay juez kawashqanyaqmi Israel runakunata Tayta Dios yanaparqan contrankunapa munayninpita yarqunanpaq.

19Juez wanuykuptinna awkilunkunapitapis mas peorna jutsa rurayman churakarqan. Tsaymi juk dioskunata adorar mana ali costumbrikunata kachayta mana munapäkurqantsu.

20Israel runakuna tsayno kaptinmi Tayta Dios pasaypa rabyakur kayno nirqan: < rurashqäta manakaqman churarmi kay runakunaqa ima nishqätapis mana wiyakärintsu.

21Tsaymi paykunata mana yanapashaqnatsu Josué mana ushakätsishqan contran runakunata ushakätsinanpaq.

22Tsay contran runakunami jutsata rurananpaq Israel runakunata inkitanqa. Tsaynöpami musyashaq Israel runakuna unay aylunkunano cäsukamashqanta o mana cäsukamashqantapis>>.

23Tsayno nirmi Josué mana ushakätsishqan markakunacho taq runakunata ushakätsinanpaq Israel runakunata Tayta Dios mana yanaparqannatsu.