Job 32 - Quechua Margos-Yarowilca-Lauricocha Bible（qvm）

Eliú nishqan

1Yaparir yaparir jutsaynaq kashqanta Job niptinmi tsay kimsan runakuna ima niytapis kamäpakärirqantsu.

2Tsaychömi kaykarqan Ram aylu Baraquelpa tsurin Eliú. Payqa Buz partipitami karqan. Jutsaynaq kaykaptin Tayta Dios castigashqanta Job niptinmi Eliúqa pasaypa rabyakurqan.

3Tsaynölami rabyakurqan kimsan amïgunkuna Job jutsa rurashqanta acusarpis mana tarishqanpita.

4Elihúqa karqan paykunapita mas mözularaqmi. Tsaymi shuyararqan kimsan amïgunkuna Jobwan parlayta ushananyaq.

5Tsayno shuyarpis kimsan amïgunkuna Jobta ima niytapis mana kamäpakuptinmi Eliúqa fiyupa rabyakurqan.

6Tsaymi paykunata kayno nirqan:

<

Qamkunaqa mas awkinnami karkaykanki.

Tsaymi respitar yarpashqäta mana rimakushqätsu.

7Noqa upälakushqä puntata qamkuna parlanaykipaqmi.

Yarparqä mayor kar Jobta tantiyatsinaykipaq kashqantami.

8Tsayno kaptinpis lapanpaq munayniyuq Tayta Diosmi tantiyakuyta qomantsi.

Tantiyakuq kanantsipaqmi Espïritunwan tantiyatsimantsi.

9Tsayno kaptinqa manami awkinkunalatsu tantiyakuq kaykan.

Ni awkin kashqalanpitatsu ali kaqta ni mana ali kaqtapis yachan.

10Tsayno kaptinqa noqa nishqätapis mayapäkamay.

Tantiyashqätami parlarkamushaq.

11<

Jobta anyapayta ushashqaykiyaqmi imatapis mana rimakushqätsu.

12Mayjina tantiyatsirpis manami mayqaykipis Jobta tantiyatsiyta kamäpakushqankitsu.

13Jobta tantiyatsiyta mana kamäpakuykarqa ¿imanirtaq nipäkunki yachaq y tantiyakuq karkaykashqaykita?

¿Imanirtaq nipäkunki Jobta Tayta Diosna tantiyatsinanpaq kashqanta?

14Job parlapämaptinqa manami qamkuna nishqaykinötsu nïman karqan>>.

15Tsayno nirkurmi Jobta kayno nirqan:

<

Shimiynaqtami paykunata rurashqanki.

16Paykuna parlayta ushananyaqmi noqa upälakushqä.

17Tsaymi ninäpaq yarpashqäta kanan nishayki.

Yarpashqätaqa manami upälakushaqtsu.

18<

Tsaytaqa manami upälakümantsu.

19Vïnu poquptin shilikaykaq urpu mana awantashqannömi noqapis parlanäpaq kaqkunata mana awantakümantsu.

20Yarpashqäta niptïraqmi shonqüpis atsikyarkunqa.

Parlarqa lapantami tantiyatsishayki.

21Pipapis favornin mana sharkuylapami parlashaq.

Manami pitapis alabashaqtsu.

22<

Alabaptïqa kamamaqnintsi Tayta Dios jinan hörachari castigamanman.