Proverbios 21 - Quechua Margos-Yarowilca-Lauricocha Bible（qvm）

1Mayu maypa aywananpaq Tayta Dios kamakätsishqannömi reypa yarpayninkunatapis kamakätsin.

2Runaqa yarpan lapan rurashqankuna ali kashqantami.

Tsayno kaptinpis Tayta Diosmi musyaykan rasunpa ali yarpaywan o mana ali yarpaywan rurashqantapis.

3Sacrificiuta rupatsishqaykipa trukanqa mas ali kaykan Tayta Dios munashqanno runa mayikiwan ali kawashqaykimi.

4Jutsami kaykan runa mayinta nanaq nawinpa rikapashqan, yachaq tukushqan y lutankunata yarpachakushqan.

5Imatapis shumaq yarpachakurkur ruraptinqa alimi kanqa.

Mana yarpachakuypa imatapis lutala ruraptinmi itsanqa mana ali kanqa.

6Runa mayinta engañaypa rïcuyashqanqa qoshtaynömi elqanqa.

Tsayno rurashqanpita ushakanqami.

7Mana kuyapäkuq kashqanpitami fiyu runaqa ushakanqa.

Runa mayinta nakatsishqanpitami kikinpis nakanqa.

8Fiyu runa kawashqanqa wiksu qerunömi kaykan.

Ali runa kawashqanmi itsanqa jututu qeruno kaykan.

9Achäquita ashiq warmiwan kuyaylapaq wayicho tänanpa trukanqa mas alimi kaykan tsuklalachöpis jawka täkushqan.

10Fiyu runaqa imaypis mana alita ruranalanpaqmi yarpachakun.

Tsay runapaqa manami kuyapäkuyninpis kantsu.

11Mana tantiyakuq runaqa shimisapa runata castigashqanta rikakurraqmi tantiyakun.

Tantiyakuq runami itsanqa yätsiptilan tantiyakun.

12Tayta Dios rikaykanmi lutan ruraq runa wayincho imano kawashqantapis.

Tsaymi ima desgracia pasananpaqpis kacharin.

13Waktsakuna manakuptin mana cäsupaq kaqtaqa manami Tayta Diospis cäsupanqatsu.

14Fiyupa rabyashqa kaykaqta pakaylapa imalatapis qararqa rabyayninta pasatsinmi.

15Ali runaqa autoridäkuna shumaq arreglaptin kushikunmi.

Fiyu runami itsanqa pasaypa mantsakan.

16Tantiyakuq kananpa trukan lutankunata ruraq runaqa manaraqpis aykätami ushakanqa.

17Fiestalacho, upyalacho y perfümilacho imaykantapis ushaq runaqa manami imaypis rïcuyanqatsu.

18Lulakuq y shimi jatipäkuq runataqa ali runapa contran sharkushqanpita kikintami ima desgraciapis pasanqa.

19Malgeniu y fiyu warmiwan tänanpa trukanqa mas alimi kaykan japala täkuptin.

20Tantiyakuq runapa wayinchöqa imayka riquëzapis y perfümikunapis kaykanmi.

Mana tantiyakuq runami itsanqa tarishqalantapis lapanta ushakurkun.

21Shumaq tantiyakuq y kuyakuq runaqa ali kawaytami tarinqa.

Tsaymi pïmaypis payta respitan.

22Ali tantiyakuq runaqa atska soldäduyuq markatapis munayninmanmi churan.

Tsayno churan pipis mana vincinanpaq kashqanta yarpaykaptinpis.

23Lutala mana parlakuq runataqa manami imapis pasantsu.

24Runa mayinta manakaqman churaq runataqa yachaq tukuq, orgullösu y respëtuynaq kashqantami nipäkun.

25Qela runaqa arukuyta mana munarmi yarqaylapita wanun.

Tulu ushma karmi arukuyta munantsu.

26Tsay runaqa kikilanpaq yarpachakuykarmi qoyarkun.

Ali runami itsanqa runa mayinta imalatapis kushishqa qaraykun.

27Fiyu runakunapa ofrendantaqa Tayta Dios manami chaskintsu.

Paykunaqa ofrendata apan Tayta Dios yanapanan kashqalami.

28Rantiy testïgu rimashqantaqa manami pipis chaskintsu.

Ali testïgu rimashqantami itsanqa pïmaypis chaskin.

29Fiyu runaqa runakuna rikanalanpaqmi ali tukun.

Ali runami itsanqa rasunpa alilata ruran.

30 Tayta Diosta mana cäsukuptinqa yachaq kashqanpis, tantiyaq kashqanpis ni yätsikuq kashqanpis manami välintsu.

31Guërraman aywaq runaqa cawalluntapis shumaqmi kamarikun.

Kamarikuptinpis Tayta Dios yanapaptinraqmi contrankunata vincin.