Proverbios 30 - Quechua Margos-Yarowilca-Lauricocha Bible（qvm）

Agur tantiyatsishqankuna

1Jaquépa tsurin Agurmi Itielta y Ucalta wilapar kayno nirqan:

2Lapanpitapis mas mana tantiyakuq upa runanömi kä.

Imatapis mana tantiyaq runanömi kaykä.

3Tantiyakuq kanäpaqpis lapantaqa manami yachakushqätsu.

Santu Tayta Diospa yachatsikuynintapis lapantaqa manami shumaq musyätsu.

4Manami pï runapis jana patsaman aywaykur kutimushqatsu.

Tsaynölami pï runapis wayrata mana aptarantsu,

ni lamarta jakunwan qepintsu

ni kay patsapa lindërunta churashqatsu.

Pilapis rurashqanta musyarqa mä jutinta wilamay.

Tantiyakuq karqa mä tsurinpa jutinta wilamay.

5Tayta Dios tsapanmi payman yärakuqkunataqa.

Lapan promitishqanta payqa cumplinmi.

6Paypa palabranman kikikipa yarpaynikita ama yapaytsu.

Yapaptikiqa olqüpashushpayki castigashunkipaqmi.

Tsaynöpami musyakanqa lulakuq kashqayki.

7Kawashqäyaq ishkay cösalatami manakamü, Tayta Dios.

8Tantiyaykatsilämay pitapis mana lulapänäpaq.

Ama rïcuyätsimaytsu ni waktsayätsimaytsu.

Tsaypa trukanqa waran waran nistashqäkunata kamaripaykalämay.

9Imaykayuqpis karqa capazchari qamta qonqarpis qonqayküman.

Pishïpakur suwakushpä penqaymanpis churaykümanchari.

10Ashmay lutanta ruraptinpis patronninta ama wilapaytsu.

Wilapaptikiqa tsay ashmay maldicionarpis maldicionaykushunkimanchari.

11Wakin runaqa mamanta y papäninta maldicionanmi.

12Wakin runaqa jutsayuq kaykarpis jutsaynaq tukunmi.

13Wakin runaqa lapanpita mas ali kashqanta yarparmi runa mayinta manakaqman churan.

14Wakin runanami ambiciösu kar waktsakunapa imaykantapis qechur qarapächulata qarqurin.

Mana kuyapäkuq kaptinmi paykunapaqa kirunpis espädanöraq y waqunpis puñalnöraq kaykan.

15Ambiciösu runaqa yawar shoquq kurunömi kaykan.

Tsay runaqa aykata chaskirpis manami contentakuntsu.

Tsaynöpis kimsa cösa y juk masmi kaykan mana contentakuqkuna.

16Tsaykuna kaykan sepultüra, qoluq warmi, tsaki chakra y nina.

17Taytanta manakaqman churaqkunata y maman yätsishqanta mana chaskikuqkunataqa nawintapis wiskulkuna jorqutsun.

Condorpis kawaykaqta mikutsun.

18Kimsa cösa y juk masmi kaykan mana tantiyaypaq kaqkuna.

19Tsaykuna kaykan anka imano pärishqan,

rumi jananpa culebra imano purishqan,

lamar jananpa büqui imano aywashqan

y jipashwan mözu imano wamrata rurashqan.

20Runan jarukuq warmiqa juk runawan punurpis manami penqakuntsu.

Nirkurpis kaynömi nin: <>.

21Kay patsacho kimsa cösa y juk masmi kaykan runakuna mana munashqan.

22Tsaykunaqa kaykan juk ashmay rey kayman yaykushqan,

mana tantiyakuq runa imaykayuqpis rikakushqan,

23despreciashqa warmi runayuq rikakushqan

y patrönanpa trukan ashmay warmi patröna rikakushqan.

24Kay patsacho chusku akapala kaqkunami tantiyaqpitapis mas tantiyaq kaykan.

25Tsaykuna kaykan pitishkuna (paykunaqa kalpaynaq karpis usya witsanmi mikuyninta churakärin),

26wishkashkuna (paykunaqa kalpaynaq karpis ranrakunachömi wayinta rurapäkun),

27chukluskuna (paykunaqa mandaqnin rey mana kaykaptinpis qatinaylanpami puripäkun)

28y shulakkuna (paykunaqa fácil tsariy kaykarpis reypa palaciunmanmi yaykapäkun).

29Kimsa cösa y juk masmi kaykan waräwa puriqkuna.

30Tsaykuna kaykan león (leonqa lapan uywapitapis mas mantsakuypaq y imapitapis manami qeshpintsu),

31pelyaq gällu,

yayan chïvu

y soldädukunapa puntanta aywaq rey.

32-33Lëchipa nätasninpitami mantequïllata ruran.

Fuertipa jaqchisyaptinqa senqanpita yawarmi yarqun.

Tsaynölami piwanpis achäquita ashipänakurqa pelyapäkun.

Mana tantiyakuypa runa tukur pitapis achäquita ashiparqa tsaykunata tantiyakuy.