1Kaychömi qelqaraykan Amóspa tsurin Isaíasta Tayta Dios revelashqan. Tsay revelacioncho rikatsirqan shamuq watakunacho Babilonia nación imano kananpaq kashqantapis.
2<<¡Altunnin jirkaman señalta jawipäkuy!
¡Atacananpaq soldädukunata qayakäriy!
¡Reykuna yaykunan punkukunapa yaykunanpaq qemlapäkuy!
3Rabyanätsimaq runakunata castigananpaqmi juk nación runakunata kachashqä.
Paykunata atacananpaqmi ordenashqä.
Tsay runakunaqa pelyayta yachaq geniuyuq runakunami karkaykan.
Paykunami conträkunata vinciptï kushikärin>>.
4Atska nación runakuna juntakaykur qayakushqanmi puntakunapita mayakaykämun.
Lapanta mandaq Tayta Diosmi shuntaykan kamarikushqa soldädunkunata pelyaq aywananpaq.
5Karu nacionpitami aywarkaykämun.
Patsapa kuchun ciëlu tinkuraqpitami shamurkaykan.
Tayta Dios rabyashpanmi tsay aywaykämuq soldädukunawan Babilonia nacionta chipyaq elqäratsinqa.
6¡Ataypa atar waqapäkuy!
Lapanpaq munayniyuq Tayta Dios castigashunaykipaq junaq chayaykämunnami.
Castigashushpayki lapan nacionnikitami ushakätsinqa.
7Tsay hörami runakunapa rikrankunapis warkakäkunqa.
Lapanpa kalpanpis ushakanqapaq.
8Fiyupa mantsakushpanmi siksikyanqa.
Wachay nanaywan warmi nakaqnömi qochpapäkunqa.
Juknin jukninpis mantsakashqami rikapänakunqa.
Penqakuylawanmi qaqlankunapis pukayanqa.
9 Tayta Dios castiganan junaq chayaykämunnami.
Tsay junaq fiyupa mantsakuypaqmi kanqa.
Fiyupa rabyar castigashpanmi kay patsata chunyaraykaqta kachaykunqa.
Jutsata ruraqkunata lapantami ushakätsinqa.
10Qoylarkunapis manami atsikyanqanatsu.
Intipis jeqarkamularmi tsakakäkunqa.
Killapis manami atsikyanqanatsu.
11Tayta Dios kaynömi nin:
< Mana respitakuqkunatapis penqaymanmi churashaq. Runa tukuqkunatapis choqpakatsishaqmi. 12Castigar ushakätsiptïmi Ofirpita kaq qori walkala kashqanno runakunapis walkalana kanqapaq. 13Tsay höraqa jana patsapis siksikyanqami. Kay patsapis juk lädumanmi witikunqa. Fiyupa rabyar castiganä junaqmi tsayno kanqa. 14< Qatikachaptin luychu qeshpiqnömi qeshpipäkunqa. Mitsiqniynaq uyshakuna mantsakar qeshpiqnömi aywakärinqa. 15< Tsarishqan kaqtaqa pitapis espädawanmi tuksirinqa. 16Maman y taytan rikarpaykaptinmi wamrankunatapis saqtarqärinqa. Qechurmi wayinpita imaykantapis apakärinqa. Warminkunatapis tsaripakärinqa. 17< Tsay runakunaqa mana atacananpaq qellayta ni qorita pägaptinpis manami chaskinqatsu. 18Tsaypa trukanqa atacashpanmi mözukunatapis flëchawan wanutsipäkunqa. Iti wamrakunatapis pishi wamrakunatapis mana kuyapaypami wanutsipäkunqa. 19< Tsaycho taq caldeo runakunaqa chanin cuestaq ruminöraqmi karkaykan. Tsayno kaptinpis Tayta Dios ushakätsishqan Sodoma y Gomorra markakunanömi ushakanqa. 20Manami imaypis tsaycho runa tanqanatsu. Tsaychöqa Arabia runakunapis manami patsakunqanatsu ni uysha mitsiqkunapis mitsikunqanatsu. 21< Wayikunachöpis tukukunalanami tanqa. Munti cabrakunalami tsaycho pañanqa. 22Palaciukunachöpis hiena uywakunalanami aular tanqa. Alinnin wayikunachöpis chacalkunalami tanqa. Babilonia nación ushakänanpaq kaq höra chayaykämunnami. Manami aykäpis pishinnatsu>>.
Who We AreWhat We EelieveWhat We Do
2025 by iamachristian.org,Inc All rights reserved.
