1 Tayta Diostami lapan shonqüwan alabashaq.
Tayta Dios, lapanpaq munayniyuqmi kaykanki.
Qamqa atsikyaypa atsikyaykaq röpashqanömi kaykanki.
2Chipchipyaynikiwanmi röpawan tsapakuqno tsapakunki.
Jatun säbanastanömi jana patsatapis mashtamushqanki.
3Jana patsacho kaykaq yaku jananchömi wayikitapis sharkatsishqanki.
Pukutaytapis guërra carrëtaykimanmi tikratsinki.
Wayra jananchömi maypapis aywanki.
4Wayrapis wilakuqnikimi kaykan.
Bunyaypa bunyar rataykaq ninapis sirvishuqnikimi kaykan.
5Cimientuta ruraykurmi patsatapis jamatsishqanki.
Jamatsishqaykipitaqa manami imaypis kuyukuntsu.
6Röpawannömi lamarwan tsaparkushqanki.
Altunnin puntakunatapis yakuwanmi tsaparkushqanki.
7Olqüpaptikimi tsaparaq yaku jukla aywakurqan.
Räyunöraq parlaptikimi witikurqan.
8Tsaymi puntakunapis raqrakunapis yurirqan.
Qam nishqaykichömi rikakurqan.
9Patsaman yaku yapay mana juntananpaqmi señalapashqanki.
Tsay señalashqaykitaqa manami pasantsu.
10Qam mandaptikimi jirkakunapita yakupis pashtamur raqrakunapa aywan.
11Tsay yakutami munti uywakunapis upupäkun.
Munti bürrukunapis yakunar tsaypitami upupäkun.
12Raqrakuna kuchunchömi pishqukunapis qeshwankunata rurapäkun.
Yörakunapa rämankunachömi rezakärin.
13Qammi jana patsacho kaykaq wayikipita jirkakunata parqumunki.
Tamyawanmi alpatapis ushmatsinki.
14Uywakunapaq qewatapis winatsimunki.
Mikuyta shuntananpaq runa murushqantapis winatsimunki.
15Tsaynölami vïnuta kamaripanki upur kushikunanpaq,
aceitita kamaripanki qaqlanman lushikuptin chipchipyänanpaq
y mikuyta kamaripanki kalpan kananpaq.
16Líbanucho kaq cedru yörakunapis qampami kaykan.
Yaku kuchuncho kashpanmi copösu winan.
17Rämankunachömi pishqukunapis qeshwankunata rurapäkun.
Cigüeñakunapis tsay yörakunachömi tan.
18Jirkakunachöpis munti cabrakunami kaykan.
Qaqakunachöpis tejonkunami pakarpan.
19Killatapis kamashqanki junaqkunata yupananpaq.
Intipis musyanmi imay höra jeqarpunanpaq kashqantapis.
20Patsa tardiyaptinqa tsakarpatsinkimi.
Tsakaypanami munti uywakuna pununanpita yarqapäkamun.
21Leonkunapis mikunanpaq uywata ashirmi qaparpan.
Qamtami manakushunki uywata taritsinaykipaq.
22Patsa waraptinqa pununanmanmi kutikärin.
Junaqpaqa machayninchömi punukärin.
23Runakunanami aruyninman aywapäkun.
Tsaychömi tardiyaq qoyayta arupäkun.
24 Tayta Dios, imaykatapis qammi kamashqanki.
Lapantapis shumaq tantiyaykurmi kamashqanki.
Kay patsacho kamashqaykikuna maytsaychöpis kaykanmi.
25Lamarpis jatunkaraymi y anchumi kaykan.
Tsaychömi jatusaqpis y takshapis tsaytsika uywakuna karkaykan.
26Lamar jananpami büquikunapis aywapäkun.
Lamarchömi jatunkaray Leviatán waräkuypis kaykan.
Tsaytaqa puklanaykipaqmi kamashqanki.
27Lapan uywakunami qamta shuyaraykäshunki höralancho mikuyta kamaripänaykipaq.
28Kamaripaptikimi mikunanpaq shuntapäkun.
Bendicionnikiwanmi saksashqanyaq mikupäkun.
29Manana kamaripaptikiqa pasaypami lakikärin.
Jämayninta tsaparkuptikiqa wanurmi alpaman tikran.
30Mirananta munaptikiqa pasaypami mirapäkun.
Tsaynöpami kay patsaman yapay juntaqpaq mirapäkun.
31¡Tayta Dios imayyaqpis alabashqa kaykulätsun!
¡Kamashqankunata rikar Tayta Dios kushikutsun!
32Pay rikäriptinqa patsapis mantsakur siksikyanmi.
Yataykuptinqa jirkakunapis qoshtatanmi.
33Kawashqäyaqqa imaypis Tayta Diostami alabashaq.
34Yarpashqäkunapis Tayta Dios munashqanno kaykulätsun.
Paypa makincho karmi imaypis kushikü.
35Jutsa ruraqkuna kay patsacho ushakätsun.
Fiyu runakuna lapanpis elqätsun.
Lapan shonqüwanmi Tayta Diosta alabashaq.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
