Proverbios 28 - Quechua Margos-Yarowilca-Lauricocha Bible（qvm）

1Jutsa ruraq runaqa pipis mana qatikachaykaptinmi qeshpir aywakun.

Ali runami itsanqa leonno imatapis mana mantsakuntsu.

2May nacionchöpis mana ali kawapäkuptinqa atska autoridätaraqmi nistapäkun.

Autoridä tantiyakuq karqa lapantapis sitiunmanmi churan.

3Waktsakunata nakatsiq fiyu runaqa poquraykaq mikuyta loqla apaqnömi kaykan.

4Leykunata mana cäsukuq runaqa fiyu runatami alaban.

Leykunata cumpliq runami itsanqa fiyu runata mana chaskipantsu.

5Fiyu runakunaqa alita rurananpaq kaqta manami tantiyapäkuntsu.

Tayta Diosta ashiqkunami itsanqa ali kaqkunata rurananpaq tantiyakärin.

6Rïcu kaykar yatapakuq kashqanpitaqa mas ali kaykan waktsala karpis mana yatapakuq kashqanmi.

7Tayta Diospa leyninkunata cäsukuq runaqa tantiyakuqmi kaykan.

Aläpa mikuq runakunawan puriq runaqa taytanta penqaymanmi churan.

8Qellayninpa wawalanwan rïcuyaq runaqa manami tsay qellayta probichanqatsu.

Tsaypa trukanqa waktsakunata kuyapaq runami probichanqa.

9Tayta Diospa leyninkunata mana cäsukuq runataqa manakushqantapis Tayta Dios manami chaskinqatsu.

10Jawka kawakuq runata jutsa rurayman ishkitsiq runaqa kikinpis jutsa ruraymanmi ishkinqa.

Jutsata mana rurananpaq tantiyatsiq runami itsanqa ali kawanqa.

11Rïcu runaqa tantiyakuq kashqantami yarpapäkun

Waktsala karpis tantiyakuq runami itsanqa tsay rïcu runa imano kashqantapis tantiyan.

12Ali runa gänaptinqa fiestataraqmi pïmaypis ruran.

Fiyu runa gänaptinmi itsanqa pïmaypis mantsakur pakakun.

13Jutsata rurashqanpita mana reconöciptinqa manami ima rurashqanpis alitsu kanqa.

Jutsa rurashqanta reconöcir kachariptinmi itsanqa Tayta Dios perdonanqa.

14Tayta Diosta imaypis mantsakuq runaqa kushishqami kawan.

Mana cäsukuq runami itsanqa nakayman chayanqa.

15Yarqanashqa ösuno y mikanashqa leonnömi mana ali autoridäqa waktsakunata nakaykätsin.

16Mana tantiyakuq autoridäqa mandashqan runakunata mana kuyapaypami nakatsin.

Mana yatapakuq autoridäqa atska watami kawanqa.

17Wanutsikuq runaqa qeshpi qeshpilami wanushqanyaq purinqa.

Tsay runapa favornin pipis ama sharkutsuntsu.

18Ali runaqa ima desgraciapitapis salvakunqami.

Fiyu runatami itsanqa ima desgracialapis pasanqa.

19Arukuq runapaqa mikuyninpis putsuy putsuymi kanqa.

Qela runakunawan talukaq runapami itsanqa mikunanpaqpis mana kantsu.

20Yärakuypaq kaq runaqa alabashqami kanqa.

Jukla rïcuyayta munaq runaqa lutan ruraykunamanmi churakanqa.

21Pitapis juzgarqa mana jananpaypa juzganki.

Wakin juzgaqkunaqa juk amuy tantalapaqpis jutsa ruraqpa favornin sharkun.

22Ambiciösu runaqa rïcuyaylapaqmi yarpachakun.

Manami musyanraqtsu ambiciösu kashqanpita waktsayänanpaq kashqanta.

23Wakinqa mana alita ruraptiki alabashunaykipa trukanqa corrigishunkimi.

Tsaypita jaqayarpis nirkurraqmi tantiyakunki alipaq kashqanta.

24Taytanta y mamanta suwaparkur <> niq runaqa wanutsikuq runapa cumpinchinnömi kaykan.

25Imaykapaqpis ambiciösu runaqa pïmaywanpis rimanakularmi kawan.

Tayta Diosman yärakuqkuna imaykayuqmi rikakärin.

26Kalpanman y yachaq kashqanman yärakuq runaqa mana tantiyakuqmi kaykan.

Tantiyakuq runaqa imapitapis salvakunqami.

27Waktsakunata yanapaptinqa manami imapis pishinqatsu.

Waktsakunata mana yanapaptinmi itsanqa pïmaypis maldicionanqa.

28Fiyu runakuna miraptinqa runakuna mantsakunmi.

Tsay runakuna ushakaptinqa kushikärinmi.