Isaías 19 - Quechua Margos-Yarowilca-Lauricocha Bible（qvm）

Egipto nación imano kananpaqpis nishqan

1Kaychömi qelqaraykan Egipto nación imano kananpaq Tayta Dios revelashqan.

Cörriq pukutay jananchömi Tayta Dios Egiptuman aywaykämun.

Egiptucho kaykaq ïdulukunapis paypa nawpanchöqa siksikyanmi.

Pasaypa mantsakuptinmi Egipto runakunapa shonqunpis ushakaykan.

2Tayta Dios kaynömi nin:

<

Chikinakurmi wawqinwanpis y runa mayinwanpis pelyanqa.

Juk markacho taqkunawan juk markacho taqkunapis pelyanqami.

Juk nación runakunapis juk nación runakunawanmi pelyanqa.

3Egipto runakunapa juiciuntami pantakätsishqa.

Imata rurapäkunanpaq yarpashqantapis manami kamakätsinqatsu.

Tsaymi imata rurapäkunanpaqpis ïdulukunata, brüjukunata, wanuqkunapa almanta y rikakuqkunata tapukärinqa.

4Tsaynölami juk reypa munayninman Egipto runakunata churashaq.

Tsay reyqa pasaypa fiyumi kanqa>>.

Lapanta mandaq Tayta Diosmi tsayno nin.

5Nilo mayu tsakiptin raqrapapis yaku manami aywanqatsu.

6Sekyakunacho qocharaq yakupis asyanqami.

Raqrakunapa aywaq yakupis tsakinqami.

Shoqushkunapis y ututukunapis tsakinqami.

7Nilo mayu kuchunkunapis tsakinqami.

Nawpankunacho kaykaq qewapis qawqanqami.

Imata murushqanpis chipyaqmi tsakiylapa ushakanqa.

8Nilo mayucho anzuëluwan pescäduta tsariqkunapis lakikushpanmi waqapäkunqa.

Redwan pescäduta tsariqkunapis fiyupami lakikärinqa.

9Lïnu manana kaptinmi lïnuta putskaqkuna imata putskananpaqpis mana kanqatsu.

10Tëla awaqkunapis lïnu ushakaptinmi fiyupa lakikärinqa.

Arupakuqkunapis pasaypami mantsakärinqa.

11¡Zoán markapa autoridäninkunaqa toqshun tsakishqa upa runakunami karkaykan!

¡Rey Faraónpa yätsiqninkunapis upatakashqami karkaykan!

¡Imanirtaq Faraónta nipäkunki yachaq runakuna casta kashqanta!

¡Imanirtaq payta nipäkunki unay reykuna casta kashqanta!

12Faraón, ¿maytaq musyakuqniki? Rasunpa yachaq karqa mä musyatsishunki lapanta mandaq Tayta Dios Egiptuta imano castigananpaq yarpaykashqantapis.

13Zoán markapa autoridäninkunaqa upatakashqami karkaykan. Menfis markapa autoridäninkunapis lutantami criyipäkun. Provinciakunapa mandaqninkunami Egipto runakunata lutanta criyitsishqa.

14Egipto runakunataqa Tayta Diosmi pantakätsishqa. Tsaymi gumitashqanyaq shinkashqa runa tsankapaykachaqno imata rurananpaq kaqtapis mana tantiyapäkuntsu.

15Egipto nación ushakänan junaq chayamuptinqa manami mandaqnin reypis, ni pampa runakunapis, ni rïcupis ni waktsapis salvanqatsu.

Egipto runakuna Tayta Diosta sirvinanpaq nishqan

16Lapanta mandaq Tayta Dios castiganan junaqmi Egipto runakuna warmino mantsakärinqa. Paykunata castigananpaq makin kamashqalana kaykashqanta musyarmi fiyupa mantsakushpan siksikyanqa.

17Judá runakunatapis fiyupami mantsakärinqa. Judá runakunapita parlaptilanmi yarpanqa lapanta mandaq Tayta Dios castigananpaq kashqanta. Tsayta yarparmi fiyupa mantsakärinqa.

18Tsay junaqqa Egiptucho pitsqa markachömi hebreo idiömata parlanqa. Tsaycho taqkunaqa lapanta mandaq Tayta Dioslata sirvinanpaqmi promitinqa. Tsay pitsqa markakunapita jukaq markapa jutinmi kanqa Herez.

19Tsay junaqqa jinan Egiptuchömi Tayta Diospaq juk altarta perqapäkunqapaq. Lindërunchönami Tayta Diosta yarpänanpaq juk wankata ichitsipäkunqapaq.

20Tsayta rurapäkunqa lapanta mandaq Tayta Diosta Egiptucho sirvishqanta pïmaypis musyananpaqmi.

Pipis nakatsiptinqa Tayta Diostami manakärinqa. Tsaymi juk salvaqta kachamunqa nakaypita jorqunanpaq.

21Tsaynöpami Egipto runakunata Tayta Dios musyatsinqa lapanpaq munayniyuq kashqanta. Tsayta tantiyarmi Egipto runakunapis sacrificiukunata y tsaki mikuy ofrendakunata promitishqannöla templuman apapäkamunqa.

22Mana cäsukuq kashqanpita Egipto runakunata castigarkurpis Tayta Dios yanapanqami. Tsayno yanapanqa paykunapis Tayta Dios nishqanta cäsukäriptinmi.

23Tsay witsanqa jatun nänimi Egiptupita Asiriayaq aywaranqa. Tsaymi Asiria runakuna Egiptupa aywanqa y Egipto runakunapis Asiriapa aywanqa. Egipto runakunawan Asiria runakuna talukarkurmi Tayta Diosta sirvipäkunqa.

24Israel runakunapis Egipto runakunawan y Asiria runakunawanmi talukanqa. Tsaynöpami maytsaycho taqkunapaqpis bendición kanqa.