Éxodo 39 - Quechua Margos-Yarowilca-Lauricocha Bible（qvm）

Cürakunapa röpankunata rurashqan

1Moisésta Tayta Dios nishqannölami Tinkuna Sagrädu Tolduman cüra yaykunanpaq röpata rurapäkurqan azul, granäti y puka milwa hïlupita. Tsaynölami Aarónpaq sagrädu röpatapis rurapäkurqan.

Efodta rurashqan Éxodo 28.6-14

2 Efodta rurapäkurqan qori hïlupita, azul, granäti y puka milwa hïlukunapita y llanula putskashqa lïnu hïlupita.

3Qoripita hïluta rurananpaqmi qorita takaypa lapshatsarkur llanula kananpaq kutsupäkurqan. Tsay hïlupita, azul, granäti y puka milwa hïlupita y llanula putskashqa lïnu hïlupitapis efodta shumaq awapäkurqan.

4Efodpa ishkan kuchunchömi tirantikunata rurapäkurqan umrunman shawananpaq.

5Wachkuwan efodqa tsay piëzalami karqan. Tsaytapis rurapäkurqan qori hïlupita, azul, granäti y puka milwa hïlukunapita y llanula putskashqa lïnu hïlupita. Lapanta rurapäkurqan Moisésta Tayta Dios nishqannölami.

6Tsaynöpis ónice rumikunata kamarishpan qeshwanta qoripita ruraykur sigurapäkurqan. Nirkurmi sëlluta rumipita ruraqno tsay rumikunaman Israelpa tsurinkunapa jutinkunata qelqapäkurqan.

7Tsay rumikunatami efodpa tirantinkunaman churapäkurqan Israel trïbukunapa jutinkunata imaypis yarparänanpaq. Lapan tsaykunata rurapäkurqan Moisésta Tayta Dios nishqannölami.

Pechërata rurashqan Éxodo 28.15-30

8Tsaynölami kuyaylapaq awashqa pechëratapis rurapäkurqan. Efodta rurashqannölami qori hïlupita, azul, granäti y puka milwa hïlukunapita y llanula putskashqa lïnu hïlupita rurapäkurqan.

9Pechërata rurarkur doblapäkurqan bolsano cuadrädu kananpaq. Largunpis anchunpis ishkay chunka ishkay (22) centïmetru karqan.

10Pechëra jananman churapäkurqan chusku fïla kuyaylapaq rumikunata. Punta kaq fïlaman churapäkurqan sárdica rumita, topacio rumita y carbunclo rumita.

11Ishkay kaq fïlaman churapäkurqan esmeralda rumita, zafiro rumita y diamanti rumita.

12Kimsa kaq fïlaman churapäkurqan jacinto rumita, ágata rumita y amatista rumita.

13Chusku kaq fïlaman churapäkurqan berilo rumita, ónice rumita y jaspe rumita. Tsay rumikuna mana yarqunanpaq qoriwan qeshwanta ruraykatsir sigurapäkurqan.

14Fïlakunaman churashqan rumikuna karqan chunka ishkaymi. Tsayno chunka ishkay karqan Israelpa tsurinkuna chunka ishkay kaptinmi. Cada rumimanmi juk tsurinpa jutinta qelqapäkurqan rumipita rurashqa sëlluno kananpaq.

15Tsaynöpis pechërapaq cordonkunata qori hïlupita piltapäkurqan.

16Nirkurmi rumikunata sigurananpaq ishkay qeshwata y ishkay taksha argöllakunata qoripita rurapäkurqan. Tsay argöllakunata tanapäkurqan pechërapa jana kaq ishkan esquïnanman.

17Nirkurnami tsay argöllakunaman qoripita piltashqa cordonta pasatsipäkurqan.

18Cordonpa ishkan puntankunatami sigurapäkurqan umruncho kaq qeshwankunaman. Tsayqa watararqan pëchunchömi.

19Tsaynöpis ishkay taksha argöllakunata qoripita rurarkur pechërapa ura kaq kuchunkunaman churapäkurqan. Tsay argöllakuna pechëra rurincho karmi efod janancho karqan.

20Tsaynöpis ishkay taksha argöllakunata qoripita rurarkurmi efodpa wachkun jana lädunman churapäkurqan. Tsaykunami efodpa tirantinkunacho kar tinkurarqan pechërapa costüranman.

21Pechërapa y efodpa argöllankunata azul cordonwanmi watapäkurqan efodpita mana yarqunanpaq. Lapanta rurapäkurqan Moisésta Tayta Dios nishqannölami.

Cürapa wakin röpankunata rurashqan Éxodo 28.31-43

22Tsaynölami efodpa rurinman jatikunanpaq azul hïlupita sotänata awapäkurqan.

23Uman yaykunanpaq kunkayuqta rurarkurmi sotänapa kunkan mana rachinanpaq rebëtinta jirapäkurqan. Tsay rebëtiqa karqan qara casäcapa rebëtinnömi.

24Sotänapa ura kuchunpami llanula putskashqa lïnu hïluwan y azul, granäti y puka milwa hïlukunawan granädatano bordapäkurqan.

25Tsaynöpis tsay kuchunpa qoripita rurashqa campanillakunata churapäkurqan. Tsaynöpami sotäna kuchunman granädakunata y qori campanillakunata jiruruq churapäkurqan.

26Tsay sotänachöqa intëru kuchunpa tumariq karqan juk granäda, juk qori campanilla, juk granäda, juk qori campanilla. Moisésta Tayta Dios nishqannölami Tinkuna Tolduman yaykur jatikunanpaq tsay sotänata rurapäkurqan.

27Aarónpaq y tsurinkunapaqmi tünicakunatapis llanula putskashqa lïnu hïlupita awapäkurqan.

28Tsaynölami llanula putskashqa lïnu hïlupita rurapäkurqan görrata, görrapa adornunkunata y calzoncïllukunata.

29Wachkutapis awapäkurqan llanula putskashqa lïnu hïlupita y azul, granäti y puka milwa hïlupitami. Awarkur wachkuman kuyaylapaqta bordapäkurqan. Lapanta rurapäkurqan Moisésta Tayta Dios nishqannölami.

30Tsaynölami qoripita sagrädu vinchata ruraykur rumipita rurashqa sëlluno kananpaq tsayman qelqapäkurqan kayno nir: < karmi santu>>.

31Moisésta Tayta Dios nishqannölami tsay vinchata azul cordonwan görraman watapäkurqan.

Sagrädu Tolduta rurayta ushapäkushqan Éxodo 35.10-19

32Tsaynömi Tinkuna Sagrädu Toldu rurayta ushapäkurqan. Moisésta Tayta Dios nishqannölami Israel runakunaqa lapanta rurapäkurqan.

33Nirkurmi Sagrädu Tolduta y lapan manëjunkunata Moisésman apapäkurqan. Tsaymi apapäkurqan Sagrädu Toldupaq rurashqan ganchukunata, marcukunata, traviskunata, tushakunata, jawiräkunanta,

34Tinkuna Tolduta qatananpaq pukaman tinishqa uysha pirqashta, fïnu qarakunata, babulta tsaparaq cortïnata,

35Pactu Babulta, babul wintukuna qerukunata, babulpa tsapananta,

36mësata, mësapa manëjunkunata, Tayta Diospa nawpancho churaränanpaq kaq tantata,

37qoripita rurashqan candelabruta, candelabrupa puntankunaman churananpaq kaq mechërukunata, candelabrupa manëjunkunata, atski ratananpaq aceitita,

38qoripita rurashqa altarta, sagrädu aceitita, ali asyaq inciensuta, Tinkuna Toldupa punkunta tsaparaq cortïnata,

39broncipita rurashqa altarta, broncipita rurashqa rejïllata, altar wintukuna qerukunata, altarpa manëjunkunata, lavatoriuta jamakunantinta,

40patiupa cortïnankunata, patiupa tushankunata, tushakunapa jawiräkunanta, patiupa punkunta tsaparaq cortïnata, patiupa estäcankunata waskantinta y Tinkuna Sagrädu Toldupa lapan manëjunkunatapis.

41Tsaynöpis apapäkurqan Tinkuna Sagrädu Tolducho cüra jatikunanpaq kaq röpata. Tsay röpakunaqa karqan cüra Aarónpa sagrädu röpankuna y tsurinkuna jatikunanpaq röpakunami.

42Moisésta Tayta Dios nishqannölami Israel runakunaqa lapanta rurarqan.

43Tayta Dios nishqanno lapantapis rurashqanta rikarmi Moisés paykunata bendicionta qorqan.