Salmo 21 - Quechua Margos-Yarowilca-Lauricocha Bible（qvm）

Salmo 21 (20)Reyta Tayta Dios yanapashqan 1 (1) Cantaqkunapa mandaqninpaqmi. David qelqashqan salmu.

1 1 (2) Tayta Dios, yanapashqaykipitami rey shumaq kushishqa kaykan.

Chikiqninkunata ushakätsinanpaq yanapaptikimi pasaypa kushikuykan.

2 2 (3) Shonqun munashqannömi kamakätsishqanki.

Imata manakushushqaykitapis manami ñëgashqankitsu. Selah

3 3 (4) Vinciykur kutimuptin kushishqami chaskishqanki.

Qori corönatapis jatipashqankimi.

4 4 (5) Mana wanunanpaq manakushushqaykinölami yanapashqanki.

Kawayta qoptikimi imayyaqpis kawaykan.

5 5 (6) Yanapaptikimi pïmaypitapis reqishqa kaykan.

Pïmaypis respitananpaqmi yanapashqanki.

6 6 (7) Mana kachaypami imaypis yanapashqanki.

Nawpaykicho karmi kushishqa kawaykan.

7 7 (8) Tayta Diosmanmi rey yärakun.

Poderniyuq Tayta Diosmi payta imaypis kuyan.

Tsayno kaptinmi imaypis mana lakikunqatsu.

8 8 (9) Tayta rey, qammi lapan contrayki runakunatapis ushakätsinkipaq.

Alawqa kaq makikiwanmi contrayki runakunata asulankipaq.

9 9 (10) Juzganayki junaqmi warishqa hornuman qaykuqno lapanta ushakätsinkipaq.

Tayta Dios fiyupa rabyashpanmi imatapis nina rupar ushaqno ushakätsinqapaq.

10 10 (11) Contrayki runakunataqa chipyaqmi asulankipaq.

Tsurinkunata y tsurinkunapita miraqkunatapis lapantami ushakätsinkipaq.

11 11 (12) Contrayki sharkunanpaq mayjina wilanakurpis manami yarpashqannöqa kamakätsinqatsu.

12 12 (13) Paykunata flëchaykiwan atacaptikimi maytsaypapis qeshpir aywakärinqa.

13 13 (14) Tayta Dios, podernikiwan yanapaykärilämay.

Yanapamashqaykipitami himnukunata cantar alabapäkushayki.