ERIYARARE 21 - Efik Old Bible With Sectional Headings

Obufa Enyɔŋ ye Obufa Isɔŋ

1EKEM ŋkut obufa enyɔŋ ye obufa isɔŋ; koro akpa enyɔŋ ye akpa isɔŋ ema ebe efep, inyaŋ ibom inyuŋ iduhe aba.

2Ndien ŋkut edisana obio, Obufa Jerusalem, nte otode ke Abasi ɔsuhɔre ke heaven edi, ema enyuŋ etim enye idem nte ŋwan-ndɔ emi ebanade ebeŋe ebe.

3Ndien ŋkop ɔkpɔsɔŋ uyo nte otode ke ebekpo ɔwɔrɔ ete, Sese, ebiet iduŋ Abasi omodu ye owo. Enye eyenyuŋ oduŋ ye mmɔ; ndien mmɔ eyedi ikɔt Esie, Abasi ke Idem Esie eyenyuŋ odu ye mmɔ, onyuŋ edi Abasi mmɔ.

4Enye eyekwɔhɔre kpukpru mmɔŋeyet ke enyin mmɔ efep. Mkpa idinyuŋ iduhe aba; eseme ye ntuaŋa ye ubiak idinyuŋ iduhe aba; koro ebe-iso ŋkpɔ ema ebe efep.

5Anditie ke ebekpo onyuŋ ɔdɔhɔ ete, Sese, mmanam kpukpru ŋkpɔ edi mbufa. Enye onyuŋ ɔdɔhɔ ete, Wet: koro mme ikɔ emi edi akpanikɔ ye se owo okponimde.

6Enye ɔdɔhɔ mi ŋko ete, Kpukpru ŋkpɔ ema esu ema. Ami ndi Alpha ye Omega, ntɔŋɔ ye utit. Owo eke okopde nsat-itɔŋ, Ami nyekoi mmɔŋ ke idim mmɔŋ uwem nnɔ enye ɔŋwɔŋ ke ikpikpu.

7Owo eke akande eyeda ŋkpɔ emi enyene; ndien nyedi Abasi esie; enye eyenyuŋ edi eyen Mi.

8Edi ama edi mbon esit ndik, ye mmɔ emi minimke ke akpanikɔ, ye mmɔ emi emade mbubiam ido, ye mme owot owo, ye mbon use, ye mbia idiɔŋ, ye mme okpono ndem, ye kpukpru mme osu nsu, udeme mmɔ eyedu ke akwa mkpɔdiɔhɔ emi asakde ye ikaŋ ye brimstone, emi edide udiana mkpa.

9Ekem kiet ke otu mme angel itiaba, emi enyenede eso itiaba oro eyɔhɔde ye akpatre ufen itiaba, edi edidɔhɔ mi ete, Di ken, nyewut fi ŋwan-ndɔ, ŋwan Eyen-erɔŋ.

10Ndien enye emen mi ke Spirit adaha aka ke akwa edikoŋ obot, onyuŋ owut mi Jerusalem, edisana obio, emi otode Abasi ɔsuhɔre ke heaven edi, emi enyenede ubɔŋ Abasi:

11uyama esie ebiet ata ɔsɔŋ-urua itiat, etie nte itiat jasper, asak nte crystal.

12Obio enyene ibibene emi okponde onyuŋ okoŋde; onyuŋ enyene inua-otop duopeba, ye angel duopeba ke inua-otop oro; enyuŋ ewet enyiŋ esin ke esit, emi edide enyiŋ esien nditɔ Israel duopeba.

13Ke edem usiaha-utin, inua-otop ita edu; ke edem edere, inua-otop ita; ke nsuk-nsuk, inua-otop ita; ke edem usop-utin, inua-otop ita.

14Ibibene obio onyuŋ enyene itiat-idak-isɔŋ duopeba, enyuŋ ewet enyiŋ mme apostle Eyen-erɔŋ duopeba esin ke mme itiat oro.

15Ndien enye emi enemede nneme ye ami onyuŋ akama eto idomo o-gold ndida ndomo obio oro, ye inua-otop esie ye ibibene esie.

16Obio ana ukem-ukem ke ŋkaŋ mbinaŋ; uniɔŋ esie onyuŋ okpon nte ubom esie. Ndien enye ada eto odomo obio, mile ikie efut: uniɔŋ ye ubom ye ŋkoŋ esie edi ukem-ukem.

17Enye onyuŋ odomo ibibene, ibio idomo okuk ikie ye aba ye inaŋ, nte owo, oro edi angel, odomode.

18Ema ebɔp ibibene oro ke jasper; obio ata eti gold, ebiet nsak-nsak edisana glass.

19Ebana itiat -idak-isɔŋ, emi ibibene obio ɔwuhɔde ke esit ye kpukpru oruk ɔsɔŋ-urua itiat. Akpa itiat-idak-isɔŋ edi jasper; udiana edi sapphire; ɔyɔhɔ ita edi chalcedony; ɔyɔhɔ inaŋ edi emerald; ɔyɔhɔ ition edi sardonyx;

20ɔyɔhɔ itiokiet edi sardius; ɔyɔhɔ itiaba edi chrysolite; ɔyɔhɔ itiaita edi beryl; ɔyɔhɔ usukkiet edi topaz; ɔyɔhɔ duop edi chrysoprase; ɔyɔhɔ duopekiet edi jacinth; ɔyɔhɔ duopeba edi amethyst.

21Inua-otop duopeba edi pearl duopeba, enam inua-otop kiet ke pearl kiet. Efak obio onyuŋ edi edisana gold, ebiet edisana glass.

22Edi ŋkwe temple do, koro Jehovah Abasi Andikara kpukpru ŋkpɔ ye Eyen-erɔŋ edi temple esie.

23Obio inyuŋ iyomke utin ye ɔfiɔŋ ndiyama nnɔ enye; koro ubɔŋ Abasi anamde enye aŋwaŋa, Eyen-erɔŋ onyuŋ edide utuenikaŋ esie.

24Ndien mme idut eyesaŋa ke uŋwana esie, ndidem isɔŋ enyuŋ eda ubɔŋ mmɔ eduk ke esit.

25Idiberike inua-otop obio ke uwem-eyo, koro ŋkuteyo ididuhe do.

26Eyenyuŋ eda ubɔŋ ye ukpono mme idut eduk ke esit.

27Edi baba ŋkpɔ ndek kiet ididukke ke esit, ye owo eke anamde mbubiam ido onyuŋ osude nsu; ke mibɔhɔke mmɔ ikpɔŋ-ikpɔŋ emi ewetde enyiŋ mmɔ ke ŋwed uwem Eyen-erɔŋ.