1NDIEN enye ɔtɔŋɔ ntak ada mi aka ke inua-otop ufɔk; ndien, sese, mmɔŋ oto ke idak asaŋudɔk ufɔk ese edem usiaha-utin: koro iso ufɔk esede edem usiaha-utin; mmɔŋ oro onyuŋ oto ke ŋkaŋ ufɔk nnasia ke edem usuk itie-uwa, ɔsuhɔre.
2Ndien enye ada mi ɔwɔrɔ ke usuŋ inua-otop edem edere, onyuŋ ada mi akanade edem-edem usuŋ okosim inua-otop ke esien emi esede edem usiaha-utin; ndien, sese, mmɔŋ oto ke ŋkaŋ nnasia ewet.
3Ndien ke adaŋemi owo oro ɔwɔrɔde ke edem usiaha-utin ye uruk ke ubɔk, enye odomo tɔsin ibio-idomo-okuk, ndien anam mi nsaŋa ke mmɔŋ ikpat ukot mbe.
4Ndien enye odomo tɔsin eŋwen, onyuŋ anam mi nsaŋa ke mmɔŋ mbe; mmɔŋ osim edɔŋ: ndien enye odomo tɔsin efen, onyuŋ anam mi nsaŋa mbe; mmɔŋ osim isin.
5Ndien enye odomo tɔsin eŋwen ŋko; akpa eke mme ŋkemeke ndisaŋa mbe: koro mmɔŋ oro ɔtuŋɔde, edi mmɔŋ ewɔk, akpa mmɔŋ eke owo mikemeke ndisaŋa mbe.
6Ndien enye ɔdɔhɔ mi, ete, Eyen owo, nte afo omokut? Ndien enye ada mi afiak okosim mben akpa oro.
7Ndien ke adaŋemi enye akadade mi afiak, sese, ata ediwak eto edu ke mben akpa ke edem mbiba.
8Ndien enye ɔdɔhɔ mi, ete, Mmɔŋ emi ɔwɔrɔ ke adaŋa edem usiaha-utin, onyuŋ ɔsuhɔre ke itihere Jordan, okosim ke inyaŋ. Enye ɔwɔrɔ ke inyaŋ, ndien mmɔŋ (inyaŋ) akabare ɔfɔn.
9Ndien ama ekem, kpukpru mme odu-uwem eke edinyɔkde ke ebiet ekededi eke akpa osimde do, eyedu uwem: iyak eyenyuŋ awak eti-eti, koro mmɔŋ emi osimde ko; koro mmɔŋ eyekabare ɔfɔn; ndien kpukpru oruk ŋkpɔ eke akpa mmɔŋ oro edisimde eyedu uwem.
10Ndien ama ekem, mme ɔkɔ-iyak eyeda ke mben esie, ɔtɔŋɔde ke En-gedi tutu osim ke En-eglaim: eyedi ebiet eke etatde iyire ekɔbi: iyak mmɔ edidi ke oruk ke oruk, ata ediwak eti-eti, nte iyak akwa inyaŋ.
11Edi edep-edep ebiet esie ye mbat-mbat ebiet esie idikabakede ifɔn: eyeyak mmɔ enɔ inuŋ.
12Ndien kpukpru oruk eto udia eyekɔri ke mben akpa ke edem mbiba; ikɔŋ esie idikeŋeke, mfri esie idinyuŋ ikurede: eyeŋwum obufa ke ekem ɔfiɔŋ esie; koro mmɔŋ esie editode ke edisana ebiet. Ndien mfri esie eyedi udia, ikɔŋ esie eyenyuŋ edi ibɔk.
13Ntem ke Ɔbɔŋ Jehovah ɔdɔhɔ, ete, Emi edi adaŋa eke mbufo edidade edeme isɔŋ emi enɔ mme esien Israel duopeba. Yak Joseph ada ubak iba.
14Ndien mbufo edeme enye eda, kpukpru owo ukem-ukem, isɔŋ emi ŋkemenerede ubɔk mi, nte ke nyeda enye nnɔ mme ete mbufo; ndien isɔŋ emi eyeduɔ ɔnɔ mbufo ke udeme.
15Ndien emi edidi adaŋa isɔŋ: ke edem edere-edere, ɔtɔŋɔde ke akwa mmɔŋ aka usuŋ Hethlon, okosim ke Zedad;
16ye Hamath, ye Berothah, ye Sibraim, emi odude ke ufɔt adaŋa Damascus ye adaŋa Hamath; ye Hazer-hatticon, emi odude ke adaŋa Hauran.
17Ndien adaŋa emi ɔtɔŋɔde ke inyaŋ edidi Hazar-enon, ye adaŋa Damascus, ye edere ese edem edere, ye adaŋa Hamath. Ndien enye edidi adaŋa edem edere-edere.
18Ndien edem usiaha-utin eyena ke ufɔt Hauran ye Damascus, ye ke ufɔt Gilead ye isɔŋ Israel, ke mben Jordan, mbufo etɔŋɔ ke adaŋ edomo tutu osim inyaŋ edem usiaha-utin. Ndien emi edidi adaŋa edem emi utin asiahade.
19Ndien edem usuk ese usuk ɔtɔŋɔ ke Tamar aka ke mmɔŋ Meriboth-kadesh, oto aka ke akpa Egypt tutu osim ke akwa inyaŋ. Ndien emi edi adaŋa edem usuk ese usuk.
20Ndien akwa inyaŋ edidi adaŋa edem usop-utin tutu osim ekem ye ɔtɔ emi owo odukde Hamath. Emi edi adaŋa edem usop-utin.
21Ntem ke mbufo edideme isɔŋ emi ke idem mbufo enɔ mme esien Israel.
22Ndien ama ekem mbufo esin afia ebahare enye enɔ idem-mbufo ke udeme, ye isen owo eke eduŋde ke otu mbufo, eke ebonde nditɔ ke otu mbufo: mbufo ebat mmɔ nte mme amana ke otu nditɔ Israel: yak mmɔ eda udeme ke afia ye mbufo ke otu mme esien Israel.
23Ndien ama ekem, ke esien eke esen owo oro oduŋde ke esit, do ke mbufo edinɔ enye udeme esie: uyo Ɔbɔŋ Jehovah edi emi.
Who We AreWhat We EelieveWhat We Do
2025 by iamachristian.org,Inc All rights reserved.
