DEUTERONOMY 5 - Efik Old Bible With Sectional Headings

Mme Ibet Moses Duop

1NDIEN Moses okot ofuri Israel, onyuŋ ɔdɔhɔ mmɔ, ete, O Israel, kop mme ewuhɔ ye mme item emi ami ntiŋde nsin mbufo ke utɔŋ mfin emi, mbufo enyuŋ ekpep mmɔ, enyuŋ etiŋ enyin enam mmɔ.

2Jehovah Abasi nnyin akanam ediomi ye nnyin ke Horeb.

3Idige ye mme ete nnyin ke Jehovah akanam ediomi emi, edi ye nnyin ke idem nnyin, kpukpru nnyin emi idude uwem mi mfin emi.

4Jehovah etie ke obot oro ke ufɔt ikaŋ, ɔdɔhɔ ikɔ ye mbufo iso ye iso

5(Ami ŋkada ke ufɔt Jehovah ye mbufo ke ini oro, man ntiŋ ikɔ Jehovah nnɔ mbufo: koro ndik ikaŋ oro akanamde mbufo, mufo ikonyuŋ idɔkke obot) ete,

6Ami ndi Jehovah Abasi fo, emi ŋkosiode fi ke isɔŋ Egypt, ke ufɔk ufin mfep.

7Kunyene Abasi efen ukɔrɔ ye ami.

8Kunam edisɔi ŋkpɔ unɔ idem fo, kunyuŋ unam mbiet baba ŋkpɔ kiet eke odude ke heaven ke enyɔŋ, ye eke odude ke isɔŋ ke idak, ye eke odude ke mmɔŋ ke idak isɔŋ:

9kunuhɔ unɔ mmɔ, kunyuŋ unam ŋkpɔ mmɔ; koro ami Jehovah Abasi fo ndi Abasi ufup, nda mme ukwaŋkpɔ mme ete ndori nditɔ ke idem, ndori ɔyɔhɔ emana mmɔ eke esuade mi ita ye inaŋ

10nnyuŋ mfɔn ido ye tɔsin emana mmɔ eke emade mi enyuŋ enimde mbet mi.

11Kumen enyiŋ Jehovah Abasi fo utomo ke se midige akpanikɔ: koro Jehovah midiyakke otomo enyiŋ esie ke se midige akpanikɔ, ɔbɔhɔ.

12Kpeme usen sabbath, nyuŋ nim enye ke edisana, kpa nte Jehovah Abasi fo okowukde fi.

13Nam ŋkpɔ ke usen itiokiet, nyuŋ nam ofuri utom fo:

14edi ɔyɔhɔ usen itiaba edi sabbath Jehovah Abasi fo: kunam baba utom ke esit, afo, ye eyen-eren fo, ye eyen fo aŋwan, ye ofin eren fo, ye ofin aŋwan fo, ye enaŋ fo, ye ass fo, ye baba ufene fo kiet, ye esen owo fo eke odude ke obio mbufo; man ofin eren fo ye ofin aŋwan fo eduɔk odudu kpa nte afo.

15Nyuŋ ti nte afo ekedide ofin ke isɔŋ Egypt, ndien Jehovah Abasi akada ɔkpɔsɔŋ ubɔk ye edimenere ubɔk osio fi ke esit: mmɔdo Jehovah Abasi fo okowukde fi ete onim usen sabbath.

16Kpono usɔ ye uka, kpa nte Abasi fo okowukde fi; man usen fo ebigi, man onyuŋ ɔfɔn fi, ke isɔŋ emi Jehovah Abasi fo ɔnɔde fi.

17Kuwot owo.

18Kunyuŋ usin efibe.

19Kunyuŋ uyip inɔ.

20Kunyuŋ ubaŋa mbɔhiduŋ fo nte ntiense nsu.

21Kunyuŋ uyom ŋwan mbɔhiduŋ fo, kunyuŋ usin mbumek ke ufɔk mbɔhiduŋ fo, ke iŋwaŋ esie, ye ke ofin eren esie, ye ke ofin aŋwan esie, ye ke enaŋ esie, ye ke ass esie, ye ke ŋkpɔ ekededi eke enyenede mbɔhiduŋ fo.

22Jehovah etie ke obot ke ufɔt ikaŋ ye nsuŋikaŋ, ye ekim, etiŋ ikɔ emi ɔnɔ ofuri esop mbufo ke ɔkpɔsɔŋ uyo: inyuŋ idianke efen. Ndien enye ewet mmɔ esin ke itiat-ŋwed iba, ada mmɔ ɔnɔ mi.

23Edikem ke mbufo ekopde uyo emi otode ke ekim (koro obot asakde ikaŋ), ndien mbufo kpa kpukpru mme etubom mme esien mbufo, ye mbiowo mbufo, esaŋa ekpere mi;

24ndien mbufo edɔhɔ, ete, Sese, Jehovah Abasi nnyin ama owut nnyin ubɔŋ esiemɔ, ye akwa ubom esiemɔ, nnyin ima inyuŋ ikop uyo esie emi okotode ke esit ikaŋ: nnyin inyuŋ ikut mfin emi nte Abasi ɔdɔhɔde ikɔ ye owo, ndien owo odu uwem

25Nnyin idinam didie ndien ikpaŋa? Koro akamba ikaŋ emi eyeta nnyin: nnyin imana ikop uyo Jehovah Abasi nnyin, iyekpaŋa.

26Koro anie odu ke otu kpukpru obukidem emi okokopde uyo Abasi uwem nte etiede ke ufɔt ikaŋ etiŋ, nte nnyin, ndien odu uwem?

27Afo saŋa kpere, kokop kpukpru se Jehovah Abasi nnyin edidɔhɔde: ndien afo men kpukpru se Jehovah Abasi nnyin edidɔhɔde fi, tiŋ nɔ nnyin; ndien nnyin iyekop, inyuŋ inam.

28Ndien Jehovah okop uyo ikɔ mbufo, ke mbufo ekedɔhɔde ye ami; ndien Jehovah ɔdɔhɔ mi, ete, Mmokop uyo ikɔ mbon emi mmɔ ekekɔhɔde ye afo: kpukpru se mmɔ ekedɔhɔde ɔfɔn.

29Oh, mmɔ ekpekam enyene oruk esit emi ke idem mmɔ, eke ebakde mi, enyuŋ enimde ofuri mbet mi kpukpru ini, kpaŋ ŋkpɔfɔn ye mmɔ, ye nditɔ mmɔ ke nsinsi!

30Ka kɔdɔhɔ mmɔ, ete, Mbufo efiak ke mme tent mbufo.

31Edi ama edi afo, da mi ye ami, ndien nyemen kpukpru mbet, ye mme ewuhɔ, ye mme item, emi afo edikpepde mmɔ ntiŋ nnɔ fi, man mmɔ enam mmɔ ke isɔŋ emi nnɔde mmɔ eda enye enyene.

32Mbufo etiŋ enyin ndien enam kpa nte emi Jehovah Abasi mbufo etemede mbufo: ekuwaha eka nnasia, ekunyuŋ eka ufien.

33Mbufo esaŋa ke kpukpru usuŋ emi Jehovah Abasi mbufo okowukde mbufo, man edu uwem, man onyuŋ ɔfɔn mbufo, man mme usen mbufo enyuŋ ebigi ke isɔŋ emi mbufo edidade enyene.