ISAIAH 7 - Efik Old Bible With Sectional Headings

Isaiah Ɔnɔ Edidem Ahaz Etop Otode Abasi

1EDIKEM ke eyo Ahaz eyen Jotham, eyen Uzziah, edidem Judah, Rezin edidem Syria, ye Pekah eyen Ramaliah, edidem Israel, edɔk ke Jerusalem eka ekɔŋ ye enye; edi mmɔ ikemke ubɔk ekɔŋ ye enye.

2Ndien etɔt ufɔk David, ete, Syria ke ɔsuhɔre etie ke otu Ephraim. Ndien esit enyek enye, onyuŋ enyek ikɔt esie, kpa nte ini ofum enyeŋede eto akai.

3Ndien Jehovah ɔdɔhɔ Isaiah, ete, Wɔrɔ, ndien, kosobo ye Ahaz, afo ye Shear-jashub eyen fo, ka ke utit udiɔŋ mmɔŋ enyɔŋ-enyɔŋ mkpɔdiɔhɔ-mmɔŋ ke ɔkpɔ-usuŋ iŋwaŋ ɔdiɔŋ-ɔfɔŋ;

4nyuŋ dɔhɔ enye, ete, Kpeme idem, nyuŋ tie suŋ; kudikhe, kunyuŋ uyak esit emem fi, ubaŋa etak ifia ikaŋ iba emi ewɔrɔde nsuŋikaŋ, ubaŋa ikaŋ iyaresit Rezin ye Syria, ye eke eyen Remaliah.

5Koro Syria, ye Ephraim, ye eyen Ramaliah, eduakde idiɔk ebaŋa fi, ete,

6Yak nnyin idɔk ke Judah ikotuk enye, inyuŋ ikan enye inɔ idem nnyin, inyuŋ inim edidem ke esit, kpa eyen Tabeel.

7Ntem ke Ɔbɔŋ Jehovah ɔdɔhɔ, ete,

8Ididaha, idinyuŋ isuhe. Koro Damascus edide ibuot Syria, Rezin onyuŋ edi ibuot Damascus; ndien osuk isua ata ye ition, Ephraim eyesuana, etre ndidi idut.

9Ndien Samaria edi ibuot Ephraim, eyen Remaliah onyuŋ edi ibuot Samaria. Ke mbufo mibuɔtke idem, ŋkɔm idiberike mbufo.

10Ndien Jehovah ɔtɔŋɔ ntak ɔdɔhɔ Ahaz, ete,

11Beŋe Jehovah Abasi fo idiɔŋɔ ke idem fo, beŋe enye ke ntuŋɔ, mme ke ata enyɔŋ.

12Ndien Ahaz ɔdɔhɔ, ete, Ndibeŋeke, ndinyuŋ ndomoke Jehovah.

13Ndien enye ɔdɔhɔ ete, Mbufo, ufɔk David, ekop ndien; nte erifek owo ekekpri akan mbufo, mme oro esin mbufo efek Abasi mi ŋko?

14Mmɔdo Ɔbɔŋ ke idem esie ɔnɔde mbufo idiɔŋɔ: sese, eyenɔwɔŋ aŋwan oyomo, onyuŋ aman eyen eren, onyuŋ osio enye enyiŋ IMMANUEL.

15Enye eyedia edibari mmɔŋ-eba ye aran-ɔkwɔk, tutu enye ɔfiɔk ndisin idiɔk, nnyuŋ mmek eti.

16Koro ke eyenɔwɔŋ oro mika-ifiɔkke kaŋa ndisin idiɔk, nnyuŋ mmek eti, owo eyekpɔŋ isɔŋ emi ndik edidem esie iba anamde fi.

17Jehovah eyeda oruk usen emi akananam midige toto ke usen oro Ephraim akadahade ɔkpɔŋ Judah, etiene fi, ye ikɔt fo, ye ufɔk usɔ, kpa edidem Assyria.

18Ndien ama ekem ke usen oro, Jehovah eyesi okot nduyip emi edude ke utit mme akpa mmɔŋ Egypt, okot ɔkwɔk emi edude ke isɔŋ Assyria.

19Ndien kpukpru mmɔ eyedi edibono ke ikpikpu ebedeŋ, ye ke nsiaha ikpɔ itiat, ye ke kpukpru ɔkɔ ŋkukim, ye ke kpukpru ebiet-ubɔk-ufene.

20Ke usen oro Ɔbɔŋ eyekpe akaraŋ kiet ke edem akpa oko, kpa Assyria, ada okporo ibuot, ye idet ukot: enye eyenyuŋ akwat ntaŋebek efep.

21Ndien ama ekem ke usen oro, owo eyebɔk abak uman enaŋ kiet ye erɔŋ iba:

22ndien ama ekem, koro edinamde ediwak mmɔŋ eba, enye eyedia edibari mmɔŋ eba: koro kpukpru mmɔ eke esuhɔde ke isɔŋ eyedia edibari mmɔŋ eba ye aran-ɔkwɔk.

23Ndien ama ekem ke usen oro, kpukpru ebiet eke tɔsin vine emi ekpade tɔsin silver, edude do, eyekabare edi akpap ye ikɔt ŋkukim.

24Owo eyeda utiga ye idaŋ eka do; koro ofuri isɔŋ eyedi akpap ye ikɔt ŋkukim.

25Ndien ama edi kpukpru ikpɔ obot emi efuŋde ke udɔk, udukaha do ubak akpap ye ikɔt ŋkukim: ndien enye eyedi ebiet eke edidɔŋde enaŋ eka do, ye eke ŋkpri ufene edidigide.