DEUTERONOMY 30 - Efik Old Bible With Sectional Headings

Mme Ndaha Edidiɔŋ Abasi

1NDIEN ama ekem, ke adaŋemi kpukpru ŋkpɔ emi etienede fi, kpa eridiɔŋ ye isuŋi, emi nnimde ke iso fo, afo onyuŋ ekerede mmɔ ke esit fo, ke otu kpukpru mme idut eke Jehovah Abasi fo ebinde fi ekesin do,

2onyuŋ afiakde etiene Jehovah Abasi fo, onyuŋ okopde uyo esie, nte kpukpru se ami ŋwukde fi mfin emi edide, afo, ye nditɔ fo, ke ofuri esit fo, ye ke ofuri ukpɔŋ fo;

3ndien Jehovah Abasi fo eyenam fi oto ke itie ufin fo afiak, onyuŋ atua fi mbɔm, onyuŋ ɔtɔŋɔ ntak ataŋ fi ke kpukpru mme idut eke Jehovah Abasi fo akasuande fi ekesin do.

4Edieke owo mbufo ekededi eke ebinde efep, odude ke utit enyɔŋ, do ke Jehovah Abasi fo editaŋ fi, do ke enye edinyuŋ ada fi edi:

5ndien Jehovah Abasi fo eyeda fi edi ke isɔŋ emi mme usɔ ekenyenede, afo ŋko eyeda enye enyene; ndien enye eyefɔn ye afo, onyuŋ anam fi awak akan mme usɔ.

6Ndien Jehovah Abasi fo eyenim esit fo mbobi, ye esit nditɔ fo, man afo ama Jehovah Abasi fo ke ofuri esit fo, ye ke ofuri ukpɔŋ fo, man afo odu uwem.

7Ndien Jehovah Abasi fo eyeda kpukpru isuŋi emi odori mbon asua fo, ye mmɔ eke mimaŋa fi, eke ekɔbɔde fi.

8Ndien afo eyetɔŋɔ ntak okop uyo Jehovah, onyuŋ anam kpukpru mme ewuhɔ esie emi ami ŋwukde fi mfin emi.

9Ndien Jehovah Abasi fo eyenam fi ɔtɔt ke kpukpru utom ubɔk fo, ke mfri idibi fo, ye ke mfri ufene fo, ye ke mfri iŋwaŋ fo, ke ufɔn: koro Jehovah eyetɔŋɔ ntak adat esit abaŋa fi, onyuŋ ɔfɔn ye afo, kpa nte enye akadatde esit abaŋa mme usɔ:

10ke ini afo edikopde uyo Jehovah Abasi fo, onyuŋ onimde mbet esie, ye mme ewuhɔ esie emi ewetde ke ŋwed mbet emi, ke ini afo afiakde edem etiene Jehovah Abasi fo ke ofuri esit fo, ye ke ofuri ukpɔŋ fo.

11Koro mme ewuhɔ emi ami ŋwukde fi mfin emi, misɔŋke ikan fi, minyuŋ iyomke usuŋ.

12Enye iduhe ke enyɔŋ, eke afo ɔkpɔdɔhɔde ete, Anie edidɔk ke enyɔŋ ɔnɔ nnyin, akada enye ɔsɔk nnyin, onyuŋ ada enye asian nnyin, man nnyin inam enye?

13Inyuŋ iduhe ke edem inyaŋ oko, eke afo ɔkpɔdɔhɔde ete, Anie edibe aka ke edem inyaŋ oko ɔnɔ nnyin, akada enye ɔsɔk nnyin, onyuŋ ada enye asian nnyin, man nnyin inam enye?

14Edi ikɔ emi emekpere fi eti-eti, ke inua fo, ye ke esit fo, man afo anam enye.

15Sese, mmada uwem, ye nti ŋkpɔ, ye mkpa, ye idiɔk, nnim fi ke iso mfin emi;

16koro ami ŋwukde fi mfin emi, nte ama Jehovah Abasi fo, onyuŋ asaŋa ke usuŋ esie, onyuŋ onim mbet esie, ye mme ewuhɔ esie, ye mme item esie man afo odu uwem onyuŋ ɔtɔt: man Jehovah Abasi fo onyuŋ ɔdiɔŋ fi ke isɔŋ emi afo akade do ndida enye nnyene.

17Edi esit fo amakabare, afo munyuŋ ukopde, edi ayak enuk fi efep aka akatuak ibuot ɔnɔ mme abasi efen, onyuŋ anam ŋkpɔ mmɔ;

18mmotim ndɔhɔ mbufo mfin emi, nte ke mbufo iditreke nditak, mme usen fo idinyuŋ ibigike ke isɔŋ emi mbufo ebede Jordan eka do ndida enye

19Mmowuk enyɔŋ ye isɔŋ, nte edi ntiense ebaŋa mbufo mfin emi; mmada uwem ye mkpa, eridiɔŋ ye isuŋi, nnim fi ke iso; mek uwem, ndien man afo ye nditɔ fo edu uwem:

20man afo ama Jehovah Abasi fo onyuŋ okop uyo esie, onyuŋ eyire ye enye: koro enye edide uwem fo, ye uniɔŋ mme usen fo: man afo oduŋ ke isɔŋ emi Jehovah ɔkɔŋwɔŋɔde ɔnɔ mme usɔ, Abraham, ye Isaac, ye Jacob, ete iyenɔ mmɔ.