2 SAMUEL 23 - Efik Old Bible With Sectional Headings

Mme Akpatre Ikɔ David Eketiŋde

1NDIEN mme mmɔ emi edi akpatre ikɔ David: ete, David eyen Jesse ɔdɔhɔ, owo emi okoforode ke enyɔŋ ɔdɔhɔ, emi Abasi Jacob ekeyetde aran, andikwɔ inem ikwɔ Israel ɔdɔhɔ, ete,

2Spirit Jehovah ada mi etiŋ ikɔ, uyo esie onyuŋ odu mi ke edeme.

3Abasi Israel ɔdɔhɔ, Akwa Itiat Israel etiŋ ɔnɔ mi, ete, Edinen andikara owo eyedu, ada uteŋe Abasi akara;

4Ndien enye eyebiet uŋwana usenubɔk, ke utin asiahade, eke uyama miyakke mbubit enyɔŋ odu: nte edim esinde mbiet afiari ke isɔŋ.

5Koro nte ufɔk mi itiehe ntem ye Abasi? Koro enye amanam nsinsi ediomi ye ami, emi ediɔŋde ke kpukpru ŋkpɔ, enyuŋ enimde: koro nte enye idinamke ofuri erinyaŋa mi ye ima esit mi etibe?

6Ama edi mme oburobut owo, mmɔ eyebiet mbarekpe eke emende etop eduɔk; koro mikemeke ndimum mmɔ ke ubɔk:

7Edi owo eke oyomde ndituk mmɔ ada ukwak ye eto eduat esin ke ubɔk; ndien mmɔ eyeta ikaŋ ke ɔtɔ mmɔ.

8Mmemmɔ emi edi enyiŋ mbon-uko oro David ekenyenede: Josheb-basshebeth, Tahchemonite, ɔbɔŋ mme etubom; enye (ekere) Adino Eznite, abaŋa owo ikie itiata emi eduɔŋde afai ini kiet.

9Ndien Eleazar, eyen Dodai eyen Ahohi adiana enye, enye okodu ke otu mbon-uko ita ye David, ke ini mmɔ esahide mme Philistine oro ebonode ke itie-ekɔŋ, ndien nditɔ Israel edɔk edi:

10enye adaha ke enyɔŋ owot mme Philistine, tutu ubɔk emem enye, ubɔk onyuŋ adiana enye ke ofut: ndien Jehovah anam akamba erinyaŋa ke usen oro; ndien kpukpru owo efiak etiene enye, eka ekebume mbume ikpɔŋ-ikpɔŋ.

11Ndien Shammah eyen Agee Hararite edi udiana esie. Ndien mme Philistine ebono ke udim, eke iŋwaŋ emi ɔkɔti ɔyɔhɔde odude do. Ndien kpukpru mmɔ efeŋe ke iso mme Philistine.

12Edi enye adaha ada ke ufɔt iŋwaŋ oro, osio mmɔ efep ke esit, onyuŋ owot mme Philistine: Jehovah onyuŋ anam akamba erinyaŋa.

13Ndien ita ke otu ata ikpɔ owo edip ye duop oro esuhɔre ke ini ukpeŋe ekesim David ke aba Adullam: ndien udim mme Philistine ena ke itihere Rephaim.

14Ndien David odu ke ɔkpɔsɔŋ ebiet ke ini oro; udim-ekɔŋ mme Philistine onyuŋ odu ke Bethlehem ini oro.

15Ndien itɔŋ asat David, enye onyuŋ ɔdɔhɔ ŋko, ete, Owo akpakam ada mmɔŋ ke obube Bethlehem, emi odude ke mben inua-otop, ɔsɔk mi ŋŋwɔŋ!

16Ndien mbon-uko ita oro ebumere esiak nna-ekɔŋ mme Philistine, ebe, ekekoi mmɔŋ ke obube Bethlehem emi odude ke mben inuatop, eda esɔk David: edi enye inyimeke ndiŋwɔŋ ke esit, edi aŋwaŋa enye ɔnɔ Jehovah.

17Enye onyuŋ ɔdɔhɔ, ete, Nsa mi, O Jehovah, nnamke ntem. Ke edi iyip owo eke edade uwem mmɔ eka. Ntre ke enye inyimeke ndiŋwɔŋ. Ntem ke mbon-uko ita oro ekenam.

18Ndien Abishai, eyen-eka Joab, eyen Zeruaih edi etubom ita oro. Ndien enye ekemenere eduat esie aŋwana ye owo ikie ita, owot, onyuŋ ɔwɔrɔ etop ke otu mbita oro.

19Nte enye ikenyeneke ukpono ikan mbita? Enye onyuŋ edi etubom mmɔ; edi ikemke ye akpa mbita oro.

20Ndien Benaiah eyen Jehoiada, eyen owo uko kiet, emi okotode ke Kabzeel, emi akanamde ediwak ŋkpɔ ndyɔ, enye owot owo Moab iba emi ebietde lion: onyuŋ ɔsuhɔre okowot lion kiet ke esit obube ke ini snow:

21enye onyuŋ owot eyen Egypt kiet, emi edide ediye owo: eduat onyuŋ odu eyen Egypt ke ubɔk; edi enye ada eto ɔsuhɔre etiene enye, akafabare eyen Egypt eduat ke ubɔk, ada eduat esie oro owot enye.

22Benaiah eyen Jehoiada anam ŋkpɔ oro, ndien enye enyene enyiŋ ke otu mbon-uko mbita oro.

23Enye ekenyene ukpono akan mbedip ye duop oro, edi ikemke ye mbita oro. Ndien David onim enye ke etubom mbet esiemɔ.

24Asahel eyen-eka Joab edi kiet ke otu mbedip ye duɔp oro; Elhana eyen Dodo a Beth-lehem,

25Shammah Harodite, Elika Harodite;

26Helez Paltite, Ira eyen Ikkesh Tekoite;

27Abiezer Anathothite, Mebunnai Hushathite;

28Zalmon Ahohite, Maharai Netophathite; Heleb eyen Baanah,

29Netophathite kiet, Ittai eyen Ribai emi okotode ke Gibeah nditɔ Benjamin;

30Benaiah Pirathonite, Hiddai emi okotode ke mme itihere Gaash;

31Abi-albon Arbathite,

32Azmaveth Barhumite; Eliahba Shaalbonite, nditɔ Jashen, Jonathan;

33Shammah Hararite, Ahiam eyen Sharar Ararite;

34Eliphelet eyen Ahasbai, eyen Maacathite, Eliam eyen Ahithophel Gilonite;

35Hezro Carmelite, Paarai Arbite;

36Igal eyen Nathan a Zobah, Bani Gadite;

37Zelek Ammonite, Naharai Beerothite, emi akamade ŋkpɔ-ekɔŋ Joab eyen Zeruiah;

38Ira Ithrite kiet, Gareb Ithrite kiet;

39Uriah Hittite: kpukpru mmɔ ewɔrɔ edip ye efureba.