1ŊKPRI nditɔ mi, mmewet ŋkpɔ emi nnɔ mbufo, man mbufo ekunam idiɔk-ŋkpɔ. Ndien edieke owo anamde idiɔk-ŋkpɔ, nnyin imenyene Ekpe-emem ke ufɔt nnyin ye Ete, kpa Jesus Christ, emi edide edinen;
2Enye onyuŋ edi usio-isop mme idiɔk-ŋkpɔ nnyin, inyuŋ idige eke nnyin ikpɔŋ, edi eke ofuri ererimbot nde.
3Nnyin inyuŋ ida emi ifiɔk ite, imɔfiɔk Enye, emi nnyin inimde mbet Esie.
4Owo emi ɔdɔhɔde ete, Mmɔfiɔk Enye, ndien minimke mbet Esie, edi osu-nsu, akpanikɔ inyuŋ iduhe Enye ke esit;
5edi owo ekededi eke onimde ikɔ Esie, ke akpanikɔ ke emenam ima Abasi ɔfɔn ama ke esit esie.
6Nnyin ida emi ifiɔk ite idodu ke Enye: owo eke ɔdɔhɔde ete imɔ iduŋ ke Enye, akpasaŋa odu uwem kpa nte Enye akasaŋade.
7Ndima, ŋwetke obufa ibet nnɔ mbufo, edi akani ibet emi mbufo ema enyene toto ke eritɔŋɔ; akani ibet oro edi ikɔ emi mbufo ekokopde.
8Edi ŋwet obufa ibet ŋko nnɔ mbufo, emi ɔwɔrɔde osu ke uwem Esie ye ke uwem mbufo ŋko; koro ekim ke ebebe efep, ata uŋwana onyuŋ ɔtɔtɔŋɔ ndiyama.
9Owo eke ɔdɔhɔde ete imɔ idu ke uŋwana, ndien enye asua eyen-ete esie, osuk odu ke ekim tutu osim emi.
10Owo eke amade eyen-ete esie ododuŋ ke uŋwana, baba ntak utuaha-ukot inyuŋ iduhe enye ke idem.
11Edi owo eke asuade eyen-ete esie odu ke ekim onyuŋ asaŋa ke ekim, inyuŋ ifiɔkke ɔtɔ nte enye akade, koro ekim okofuk enye enyin.
12Mmewet nnɔ mbufo, ŋkpri nditɔ mi, koro ema efen mme idiɔk-ŋkpɔ mbufo kabaŋa enyiŋ Esie.
13Mmewet nnɔ mbufo, mme ete, koro mbufo efiɔkde Enye emi ɔkɔtɔŋɔde ke eritɔŋɔ odu. Mmewet nnɔ mbufo, mkparawa, koro mbufo ema ekekan andidiɔk. Mma ŋwewet nnɔ mbufo, ŋkpri nditɔ, koro mbufo efiɔkde Ete.
14Mma ŋwewet nnɔ mbufo mme ete, koro mbufo efiɔkde Enye emi ɔkɔtɔŋɔde ke eritɔŋɔ odu. Mma ŋwewet nnɔ mbufo, mkparawa, koro mbufo ekopde idem, ikɔ Abasi onyuŋ oduŋde mbufo ke esit, mbufo ema enyuŋ ekan andidiɔk.
15Ekuma ererimbot, ye se idude ke ererimbot. Edieke owo ekededi amade ererimbot, ima Ete iduhe enye ke esit.
16Koro ofuri-ofuri se idude ke ererimbot, mbumek obukidem, ye mbumek enyin, ye ikpikpu ubɔŋ uwem emi, itoho Ete, edi oto ke ererimbot.
17Ndien ererimbot ke ebebe efep, ye mbumek esie; edi owo eke anamde se Abasi amade odudu ke nsinsi.
18Ŋkpri nditɔ, emi edi ukperedem eyo: ndien nte mbufo ema ekop ete, andibiɔŋɔ Christ ke edi, kpa ke emi ediwak mme andibiɔŋɔ Christ ema ewɔrɔ ewut idem: nnyin ida emi ifiɔk ite, edi ukperedem eyo.
19Mmɔ eto ke otu nnyin ewɔŋɔ, edi mmɔ idige eke nnyin; koro edieke mmɔ ekpedide eke nnyin, mmɔ ekpemana etie ye nnyin; edi mmɔ edaha ewɔŋɔ, man eyarare efiɔk ete, kpukpru mmɔ idige eke nnyin.
20Edi Enye emi edide Edisana ama aŋwaŋa Spirit mbufo ke idem, kpukpru mbufo emenyuŋ efiɔk akpanikɔ.
21Ŋwetke nnɔ mbufo koro mbufo mifiɔkke akpanikɔ, edi koro mbufo efiɔkde akpanikɔ, enyuŋ ekutde ete, nsu baba kiet isaŋake ŋkpɔ ye akpanikɔ.
22Anie edi osu-nsu, ke midige owo eke afaŋade ete Jesus idige Christ. Owo eke afaŋade Ete ye Eyen, kpa enye edi andibiɔŋɔ Christ.
23Kpukpru owo eke afaŋade Eyen inyeneke Ete: owo emi onyimede Eyen enyene Ete nde.
24Ama edi mbufo, eyak se mbufo ekokopde toto ke eritɔŋɔ osuk odu mbufo ke esit. Edieke se mbufo ekekopde toto ke eritɔŋɔ osuk odude mbufo ke esit, mbufo ŋko eyesuk eduŋ ke Eyen ye ke Ete.
25Ndien emi edise Enye ɔkɔŋwɔŋɔde ndinɔ nnyin, kpa nsinsi uwem.
26Mma ŋwewet ŋkpɔ emi nnɔ mbufo mbaŋa mmɔ eke eyomde ndida mbufo nyo ŋkpɔŋ usuŋ.
27Ama edi mbufo, Spirit emi Christ ama aŋwaŋa mbufo ke idem mmɔdo ke esit mbufo oduŋ, inyuŋ inaŋa nte owo ekpep mbufo ŋkpɔ; edi nte Spirit emi Enye aŋwaŋade mbufo ke idem ekpepde mbufo abaŋa kpukpru ŋkpɔ, onyuŋ edide akpanikɔ, midige nsu, ndien nte Enye ekekpepde mbufo, mbufo esuk eduŋ ke Enye.
28Mmɔdo, ŋkpri nditɔ, eduŋ ke Enye ke emi, man, edieke Enye ediwɔrɔde owut idem, nnyin ikpenyene uko, ikunyuŋ inyene but ke iso Esie, ke adaŋemi Enye edidide.
29Edieke mbufo efiɔkde ete, Enye edi edinen, efiɔk ŋko ete edi Enye okobon kpukpru owo eke enamde edinen ido.
Who We AreWhat We EelieveWhat We Do
2025 by iamachristian.org,Inc All rights reserved.
