JUDGES 14 - Efik Old Bible With Sectional Headings

Samson Ɔdɔ Ŋwan Kiet emi Otode ke Obio Timnah

1EKEM Samson ɔsuhɔre aka Timnah, okokut ŋwan kiet ke otu nditɔ mme Philistine iban ke Timnah.

2Ndien enye ɔdɔk eketiŋ ɔnɔ ete esie ye eka esie, ete, Mma ŋkut ŋwan kiet ke otu nditɔ mme Philistine iban ke Timnah: mbufo eda enye ndien enɔ mi ndɔ.

3Ndien ete esie ye eka esie edɔhɔ enye, ete, Nte baba ŋwan kiet iduhe ke otu nditɔ-iban nditɔ-ete fo, ye ke otu ofuri oruk nnyin, eke esinde fi aka ndida ŋwan ke otu mme Philistine edut? Edi Samson ɔdɔhɔ ete esie, ete, Da enye nɔ mi: koro enye enemde mi esit.

4Edi ete esie ye eka esie ifiɔkke ite ke emi oto Jehovah: koro enye oyomde usuŋ nte anamde mme Philistine: koro mme Philistine ekande Israel ke ini oro.

5Ekem Samson ye ete esie ye eka esie esuhɔre eka ke Timnah; ndien adaŋemi enye osimde ke iŋwaŋ vine Timnah, abak lion kiet ɔbiɔŋɔ enye okuni.

6Ndien spirit Jehovah oduk enye ke idem, ndien enye awai lion nte akpawaide eyen ebot, ŋkpɔ inyuŋ iduhe enye ke ubɔk: edi enye isianke ete esie ye eka esie se enye akanamde.

7Ndien enye ɔsuhɔre aka ɔkɔdɔhɔ ye ŋwan oro: enye onyuŋ enem Samson esit.

8Ekem ini ebe, ndien enye afiak aka ndidɔ ŋwan oro, ndien enye awaha, ete ise okpo lion oro: ndien, sese, otu ɔkwɔk ye aran ɔkwɔk odu ke esit okpo lion oro.

9Ndien enye ada enye ke ubɔk esie, asaŋa adia, edisim ete esie ye eka esie, onyuŋ ɔnɔ mmɔ edia: edi idɔhɔke mmɔ, ite ke imɔ ikosio aran-ɔkwɔk oro ke okpo lion oro.

10Ndien ete esie ɔsuhɔre aka ke ebiet ŋwan oro; Samson onyuŋ anam akamba udia do: koro ntem ke mkparawa ekam enam.

11Edikem adaŋemi mmɔ ekekutde enye, mmɔ esio owo edip ye duop, ete edisaŋa ye enye.

12Ekem Samson ɔdɔhɔ mmɔ, ete, Yak ntop ŋke nnɔ mbufo, ndien: mbufo ema esiak enye enɔ mi ke usen udia itiaba, enyuŋ efiɔk enye, nyenɔ mbufo ndien shirt edip ye duop ye ukpuhɔ edisine-ŋkpɔ edip ye duop.

13Edi edieke mbufo mikemeke ndisiak enye nnɔ mi, mbufo eyenɔ mi shirt edip ye duop, ye ukpuhɔ edisine-ŋkpɔ edip ye duop. Ndien mmɔ edɔhɔ enye, ete, Top ŋke fo man nnyin ikop.

14Ndien enye ɔdɔhɔ mmɔ, ete, Udia okoto ke andidia, iniŋe okonyuŋ oto ke se idide ɔkpɔsɔŋ.

15Ndien mmɔ ikekemeke ndisiak ŋke oro ke usen ita. Edikem ke ɔyɔhɔ usen itiaba, mmɔ edɔhɔ ŋwan Samson, ete, Tap uberi, man enye asiak ŋke emi ɔnɔ nnyin, mbak nnyin idifɔp fi ye ufɔk usɔ ke ikaŋ: nte mbufo ekekot nnyin man ebɔ nnyin ŋkpɔ?

16Nte idige ntre? Ndien ŋwan Samson atua ɔnɔ enye, ete, Afo asasua mi, unyuŋ umaŋa mi: ama otop ŋke ɔnɔ nditɔ oruk mi, ndien ukasiakke unɔ mi. Ndien enye ɔdɔhɔ enye, ete, Sese, ŋkasiakke nnɔ ete mi ye eka mi, nte nditiŋ nnɔ fi ndien?

17Ndien ŋwan osuk atua eyet ɔnɔ enye ke ofuri usen itiaba emi mmɔ enimde udia oro: ndien edikem ke ɔyɔhɔ usen itiaba, enye etiŋ ɔnɔ ŋwan; koro ŋwan eyirede enye ntre: ndien ŋwan emen ŋke etiŋ ɔnɔ nditɔ oruk esie.

18Ekem mbio-obio edɔhɔ enye ke ɔyɔhɔ usen itiaba, ke eyo mika-ikutke kaŋa, ete, Nso ŋkpɔ eniŋe akan aran-ɔkwɔk? Nso ŋkpɔ onyuŋ ɔsɔŋ akan lion? Ndien enye ɔdɔhɔ mmɔ, ete, Ke mbufo mikpedaha uman enaŋ mi ifuŋ isɔŋ, ikpesiakke ŋke mi.

19Ndien spirit Jehovah oduk enye ke idem, ndien enye ɔsuhɔre aka ke Ashkelon, okowot owo mmɔ edip ye duop, onyuŋ ada mbume mmɔ, ndien emen ukpuhɔ edisine ŋkpɔ ɔnɔ mme andisiak ŋke. Esit onyuŋ ayat enye, ndien enye ɔdɔk aka ke ufɔk ete esie.

20Ndien eda ŋwan Samson enɔ nsaŋa esie oro ekedide ufan esie.