1JEHOVAH ɔdɔhɔ ete, Ifɔnke fɔn inɔ nditɔ nsɔŋ-ibuot, emi enamde uduak, edi itoho mi: enyuŋ ediomide ediomo, edi itoho spirit mi, man ekɔt idiɔk ido ke idiɔk ido.
2Mmɔ esuhɔre eka Egypt, edi ibupke uyo mi; ebine odudu Pharaoh, enyuŋ ebuɔt idem ke mfut Egypt.
3Ndien odudu Pharaoh eyekabare edi ŋkpɔ but mbufo, mbuɔtidem ke mfut Egypt eyenyuŋ akabare edi esuene.
4Koro mbɔŋ esie edude ke Zoan, mme isuŋutom esie enyuŋ esim ke Hanes.
5But anam kpukpru mmɔ abaŋa idut emi mikemeke ndidoro mmɔ, mmɔ ikemeke ndiŋwam nnyuŋ ndoro mmɔ, koro edide ŋkpɔ but ye esuene ŋko.
6Mbiomo mme unam edem usuk: ke isɔŋ ndutuhɔ ye nnan-eyin, uman lion ye abak lion, ibɔm ye ɔkpɔtɔ itiat eto do, mmɔ ebiom inyene mmɔ ke afara nditɔ ass, ebiom ŋkpɔ-uto mmɔ ke ekuŋ camel, esɔk idut eke mikemeke ndidoro mmɔ.
7Ndien eriŋwam emi Egypt aŋwamde eyewɔrɔ ikpikpu ye ukpɔk: oro esin nsiode enye emi enyiŋ, Mbon mbure, mmɔ etie suŋ.
8Ka ndien kakap enye ke itiat ŋwed ke otu mmɔ, nyuŋ wet enye ke nwed, man enye etie ɔnɔ ini iso, ke nsinsi tutu amama.
9Koro mmɔ edide mbon nsɔŋibuot, nditɔ nsu, nditɔ eke minyimeke ndikop mbet Jehovah.
10Emi edɔhɔde mbon ŋkukut, ete, mbufo ekukut; edɔhɔ mmɔ eke esede, ete, Mbufo ekuse edinen ŋkukut enɔ nnyin; etiŋ inem ikɔ enɔ nnyin: ekut ŋkpɔ nsu:
11mbufo ewɔŋɔre ekpɔŋ usuŋ, ewaha ekpɔŋ ɔkpɔ-usuŋ, enam Edisana Abasi Israel okudu aba ke iso nnyin.
12Mmɔdo ntem ke Edisana Abasi Israel ɔdɔhɔ, ete, Koro mbufo esuade ikɔ emi, enyuŋ ebuɔtde idem mbufo ke utuk ye ŋkwaŋa, enyuŋ eberede idem ke esit:
13oro esin idiɔk ido emi etiede ye mbufo nte ubak edikoŋ ibibene eke ɔbuŋɔde oyom ndiduɔ, ɔnyuhɔde, ndien okibe ini kiet, owure ɔduɔ.
14Ndien ewuri enye nte abaŋ mme obot-eso owurede, anuaha; mbɔm iduhe du; ndien ikwe baba usiɔŋ kiet ke otu mbai esie, eke edade emen ikaŋ ke otuŋ, mme eda ekoi mmɔŋ ke idim.
15Koro ntem ke Ɔbɔŋ Jehovah, Edisana Abasi Israel, ɔdɔhɔ, ete, Ke erikabare ye ke nduɔk-odudu ke mbufo edikeme ndibɔhɔ; ke eritie suŋ, ye ke mbuɔtidem, ke odudu mbufo edidu: edi mbufo ikonyimeke.
16Ndien mbufo ekedɔhɔ, ete, Ih ih, koro nnyin iyeda horse ifeŋe; mmɔdo mbufo eyefeŋe: nnyin iyenyuŋ idoro ke mme ɔsɔp-ukot; mmɔdo mmɔ eke ebinede mbufo eyesɔp ukot.
17Nduari owo kierakiet eyesin tɔsin owo efeŋe; nduari owo ition eyesin mbufo efeŋe: tutu mbufo esuhɔ nte ito ubom ke enyɔŋ ikpɔ obot, ye nte ɔfɔŋ-etak-ubom ke ibuot obot.
18Ndien oto oro Jehovah eyebet, man atua mbufo mbɔm, oto oro nko Enye eyedaha ke enyɔŋ, man ɔfɔn ido ye mbufo: koro Jehovah edide Abasi edinen ido: ɔfɔfɔn ɔnɔ kpukpru mmɔ eke ebetde enye.
19Koro mbio ke Zion eyeduŋ ke Jerusalem: afo udutuaha eyet: enye eyetua fi mbɔm ke uyo eseme fo; ke ini enye okopde, enye eyebɔrɔ fi.
20Ndien Ɔbɔŋ eyenɔ mbufo uyo ukut, ye mmɔŋ ndutuhɔ, edi mmɔ eke etemede fi ididibeke aba: enyin fo eyenyuŋ ekut mmɔ eke etemede fi:
21ndien utɔŋ fo eyekop uyo ke edem fo, ete, “Emi edi ɔkpɔ-usuŋ, mbufo esaŋa ke esit,” ke mbufo ediŋwɔŋɔrede eka nnasia, mme enyuŋ eka ufien.
22Ndien mbufo eyebat se edade efuk mbiet a silver fo, ye edisine-ŋkpɔ mbiet o-gold fo ke mbubiam: afo eyemen mmɔ ɔduɔk nte ŋkpɔ ndek; eyedɔhɔ enye, ete, Wɔrɔ.
23Ndien enye eyeda edim ɔnɔ mkpasip fo emi afo adade ɔtɔ ke iŋwaŋ; ye udia eke iŋwaŋ oŋwumde, enye eyenyuŋ esehe onyuŋ awak. Ufene fo eyedia udia ke akwa ebiet mbiet ke usen oro:
24ndien enaŋ mbufo ye abak ass eke efuŋde isɔŋ, eyedia inuŋ-inuŋ udia, eke owo asakde ke shovel ye ke usak-ŋkpɔ.
25Ndien ke kpukpru ikpɔ obot, ye ke kpukpru edikoŋ obot, ke akpa ye idim mmɔŋ edidu ke usen akwa obom, ke mme tower eduɔŋɔde.
26Ndien uŋwana ɔfiɔŋ eyebiet uŋwana utin, uŋwana utin eyenyuŋ aka iso utim ikatiaba, ebiet uwemeyo itiaba, ke usen eke Jehovah edibɔpde unan ikɔt esiemɔ, edinyuŋ ɔkɔkde ufen eke emiade mmɔ.
27Sese, enyiŋ Jehovah ke oto ke anyan ebiet edi, iyaresit esie ke asak, edemikaŋ onyuŋ odobi: ifuresit ɔyɔhɔ enye ke mkpɔk-inua, edeme esie onyuŋ ebiet ikaŋ eke asakde.
28Ndien ibifik esie ebiet akpa mmɔŋ eke ɔyɔhɔde, enye eyebahare osim kpa ke itɔŋ, man enye asak mme idut ke usak-ŋkpɔ nsu: uruk eke anamde mmɔ edue eyenyuŋ eyire mme idut ke mbaŋ:
29mbufo eyekwɔ ikwɔ kpa nte ke okoneyo eke enimde ederi; esit eyenyuŋ adat mbufo, nte owo emi etienede ifium asaŋa aka obot Jehovah, etiene akwa itiat Israel.
30Ndien Jehovah eyenam ekop ubom uyo esiemɔ, onyuŋ owut mmɔ iduɔ ubɔk esie, ke ifuresit ye ikpahesit ye edemikaŋ eke atade, ke oyobio, ye edim, ye edim itiat.
31Koro eyeda uyo Jehovah esuan Assyria; owo eyeda eto amia.
32Ndien kpukpru ubɔk ikpa emi ɔwuhɔde, emi Jehovah adade anam enye (Assyria), eyesaŋa ye ekɔmɔ ye harp: ndien eyeŋwana otime-otime ekɔŋ ke esit.
33Koro ema etim Topheth ebigi; ema enyuŋ ediɔŋ enye enɔ edidem; enye ama otuŋ enye, ama onyuŋ anam okpon: ebok ikaŋ ye ifia emekpon: ibifik Jehovah, nte akpa brimstone, ɔfɔp enye.
Who We AreWhat We EelieveWhat We Do
2025 by iamachristian.org,Inc All rights reserved.
