JOEL 2 - Efik Old Bible With Sectional Headings

Nduri-Utɔŋ kabaŋa Usen Iyaresit Abasi Emi Edidide

1MBUFO efuri ukorowo ke Zion, enyuŋ eduat ke edisana obot mi: yak kpukpru mme andiduŋ isɔŋ enyek idem: koro usen Jehovah emedi, koro emekpere; usen ekim,

2kpa ata ɔkpɔsɔŋ ekim, usen obubit enyɔŋ, kpa ata idiɔk enyɔŋ eti-eti: ebiet usiere eke asuanade ke ikpɔ obot: idut emi awakde, onyuŋ ɔsɔŋɔde; oruk oro akananam iduhe totoko idinyuŋ itieneke enye idi, tutu osim isua ediwak emana.

3Ikaŋ ebem mmɔ iso ata; edemikaŋ onyuŋ etiene mmɔ edem ɔfɔp: isɔŋ ebiet iŋwaŋ Eden ke iso mmɔ, ndien ikpikpu wilderness odu mmɔ ke edem;

4baba ŋkpɔ kiet inyuŋ ikemeke ndibɔhɔ mmɔ. Idem mmɔ ebiet idem horse; mmɔ enyuŋ esɔp itɔk nte mbon horse.

5Efefrɔ ke enyɔŋ ikpɔ obot, ebiet uyom chariot: ebiet mkprak edemikaŋ eke atade etak ibokpot, ebiet mkpɔsɔŋ mbio eke etimde udim ekɔŋ.

6Iso mmɔ esin mme idut enyek idem kpukpru iso enyuŋ ekabare kpai.

7Mmɔ efeŋe nte mbon uko; edɔk ibibene nte mbon-ekɔŋ; kpukpru mmɔ enyuŋ esaŋa ke usuŋ mmɔ; mmɔ inyuŋ itimekede udim isaŋ mmɔ:

8ndien kiet inyuŋ inukke eken; kpukpru mmɔ kiet kiet enyuŋ esaŋa ke usuŋ mmɔ; mmɔ enyuŋ eduɔŋɔ ke otu ŋkpɔ-ekɔŋ, edi idaha unan.

9Mmɔ eyɔrɔ ke obio; efeŋe ke enyɔŋ ibibene; edɔk ke ufɔk; eduk ke window nte inɔ.

10Isɔŋ enyek ke iso mmɔ; enyɔŋ onyuŋ etimere: utin ye ɔfiɔŋ ebire, ntantafiɔŋ enyuŋ enimi uyama mmɔ.

11Ndien Jehovah ebem mbon-ekɔŋ esie iso ŋko osioro uyo: koro nna-ekɔŋ esie okponde eti-eti: koro enye edide ɔkpɔsɔŋ, anam uyo esie: koro usen Jehovah okponde onyuŋ enyenede ndik eti-eti: ndien anie ekeme ndiyɔ enye?

12Jehovah onyuŋ ɔdɔhɔ ke emi ŋko, ete, Mbufo efiak etiene mi ke ofuri esit mbufo, ye ke utre-udia, ye ke ntua-eyet, ye ke eseme:

13ndien mbufo ewai esit mbufo, ekuwai edisine-ŋkpɔ mbufo, enyuŋ efiak edem etiene Jehovah Abasi mbufo: koro enye enyenede mfɔn ye mbɔm, isɔpke iyaresit, onyuŋ awak ima, onyuŋ atua mkpɔfiɔk ke idiɔk ŋkpɔ.

14Anie ɔfiɔk mme enye eyekabare onyuŋ atua mkpɔfiɔk, onyuŋ ɔkpɔŋ eti ŋkpɔ ke edem esie, kpa inuak-udia ye uwa ediŋwɔŋ-ŋkpɔ, ɔnɔ Jehovah Abasi mbufo?

15Mbufo efuri ukorowo ke Zion, enim utre-udia, ekwɔrɔ usɔrɔ.

16Mbufo ebon mbio-obio, enim esop, ebon mme ebiowo, ebon nditɔwɔŋ ye mmɔ eke ewapde eba: yak ɔdɔ-ndɔ oto ke ubet esie ɔwɔrɔ, yak ŋwan ndɔ oto ke bed ndɔ esie.

17Yak mme oku, mme anam-ŋkpɔ Jehovah, etua eyet ke ufɔt etehe ye itie-uwa; yak mmɔ enyuŋ edɔhɔ ŋko, ete, O Jehovah tua ikɔt fo mbɔm, kunyuŋ uda udeme fo usin ke ŋkpɔ but, man mme idut ekara mmɔ: mmɔ ekpenam didie edɔhɔ ke otu mme idut, ete, Enye Abasi mmɔ?

18Ndien Jehovah eyefibe ufup abaŋa isɔŋ esie, onyuŋ atua ikɔt esie mbɔm.

19Ndien Jehovah eyebɔrɔ, onyuŋ ɔdɔhɔ ikɔt esie, ete, Sese, ami nyeda ibokpot nnɔ esɔk mbufo, ye obufa wine, ye aran, ndien mbufo eyeyuhɔ ke esit: ndinyuŋ nnimke aba mbufo ke ŋkpɔ but ke otu mme idut.

20Ndien nyesio idut edem edere mfep ŋkpɔŋ mbufo anyan usuŋ, nnyuŋ mbin enye nsin ke edisat ye ikpikpu isɔŋ, iso esie eyese inyaŋ edem usiaha-utin, edem esie eyenyuŋ ese inyaŋ edem usop-utin, ndien utebe esie eyedɔk, uŋwak esie eyenyuŋ ɔdɔk, koro enye anamde ikpɔ ŋkpɔ.

21O isɔŋ, kufehe, mbufo edara enyuŋ ebre: koro Jehovah anamde ikpɔ ŋkpɔ.

22O mme unam ikɔt, mbufo ekufehe, koro mbiet wilderness afiaride: koro eto osioŋo mfri esie, eto fig ye vine enɔ odudu mmɔ.

23Mbufo nditɔ Zion ebre ndien mbre, enyuŋ edara Jehovah Abasi mbufo; koro enye ɔnɔde mbufo akpa edim nte enende, onyuŋ anam akpa edim ye akpatre edep ɔnɔ mbufo, kpa nte eke akpa.

24Ndien ibokpot eyeyɔhɔ ke ɔtɔ-ubek, wine ye aran eyenyuŋ eyɔhɔ ke abaŋ eduɔhɔ.

25Ndien nyenɔ mbufo usiene mme isua oro ŋkukuŋkpɔyɔriyɔ ye ŋkuku ye itut ye idiaŋ eketade, akwa udim mi emi ŋkɔdɔŋde ekɔŋ ke ɔtɔ mbufo.

26Ndien mbufo eyedia eyuhɔ, enyuŋ etoro enyiŋ Jehovah Abasi mbufo, emi akanamde mme utibe ŋkpɔ ye mbufo: ndien ikɔt mi idikwe but ke nsinsi.

27Ndien mbufo eyefiɔk ete ke ami ndodu Israel ke ufɔt, ami nnyuŋ ndi Jehovah Abasi mbufo, eŋwen inyuŋ iduhe; ikɔt mi idinyuŋ ikwe but ke nsinsi.

28Ndien ama ekem ke ini ŋkpɔ emi ebede, nyeŋwaŋa spirit mi nnɔ ofuri obukidem; ndien nditɔiren mbufo, ye nditɔ mbufo iban eyetiŋ prophecy, mbiowo mbufo eyedaba ndap, mkparawa mbufo eyekut ŋkukut.

29Nyenyuŋ ŋŋwaŋa spirit mi ke eyo oro nnɔ ifin-iren ye ifin-iban mbufo.

30Nyenyuŋ nnɔ mme utibe ŋkpɔ ke enyɔŋ ye ke isɔŋ, iyip, ye ikaŋ, ye nsuŋikaŋ ebiet adaha.

31Utin eyekabare edi ekim, ɔfiɔŋ eyenyuŋ akabare edi iyip, ke akwa usen Jehovah emi enyenede ndik mikaidige.

32Ndien ama ekem, kpukpru owo eke esemede ekot enyiŋ Jehovah eyebɔhɔ: ndien mmɔ eke ebɔhɔde eyedu ke obot Zion ye ke Jerusalem, kpa nte Jehovah ɔkɔdɔhɔde, ye ke otu mmɔ eke esukde emi Jehovah okotde.