DEUTERONOMY 3 - Efik Old Bible With Sectional Headings

Nditɔ Israel Eŋwana Enyuŋ Ekan Obio Og ke Bashan

1EKEM nnyin iwɔŋɔre idɔk ke usuŋ Bashan: ndien Og ɔbɔŋ Bashan ye kpukpru ikɔt esie ewɔŋɔ, ete idiŋwana ekɔŋ ye nnyin ke Edrei.

2Ndien Jehovah ɔdɔhɔ mi, ete, Kubak enye: koro mmɔŋ ndida enye, ye kpukpru ikɔt esie, ye isɔŋ esie nsin fi ke ubɔk; ndien afo eyenam enye, kpa nte akanamde Sihon ɔbɔŋ mme Amorite, emi oduŋde ke Heshbon.

3Ndien Jehovah Abasi nnyin onyuŋ ada Og ɔbɔŋ Bashan, ye ofuri ikɔt esie, esin nnyin ke ubɔk: ndien nnyin isuan enye, tutu isuhɔke baba nsuhɔ inɔ enye.

4Ndien nnyin ida kpukpru obio esie ke ini oro, obio baba kiet eke nnyin mibɔhɔ mmɔ iduhe, obio ata, kpa ofuri edem Argob, idut Og ɔbɔŋ Bashan.

5Kpukpru obio emi enyene ŋkokoŋo ibibene, ye itim, ye eto usin-usuŋ; ekɔrɔ ye obio iŋwaŋ ata ediwak.

6Ndien nnyin isobo mmɔ ima, kpa nte nnyin ikenamde Sihon ɔbɔŋ Heshbon, isobo kpukpru obio, ye iren owo, ye iban, ye nditɔ ɔwɔŋ.

7Nnyin inyuŋ itaŋ kpukpru ufene ye mbume mme obio oro, ida ke idem nnyin.

8Ndien ke ini oro nnyin isio isɔŋ oro ke ubɔk mbɔŋ mme Amorite mbiba emi ekedude ke edem Jordan oko, ɔtɔŋɔde ke itihere Armon tutu osim ke obot Hermon;

9(mme Zidonian esio Hermon enyiŋ Sirion, edi mme Amorite esio enye enyiŋ Senir;)

10kpukpru obio una-isɔŋ, ye ofuri Gilead, ye ofuri Bashan, tutu osim ke Salecah ye Edrei, obio idut Og ke Bashan.

11(Koro Og ɔbɔŋ Bashan ikpɔŋ ɔsuhɔde ke otu mme Rephaim efen; sese, bed esie onyuŋ edi bed ukwak; nte idige enye odu ke Rabbah nditɔ Ammon? uniɔŋ esie edi ibio idomo-okuk usukiet, ubom esie ɔnyuŋ edi ibio idomo-okuk inaŋ, nte idomo owo asaŋade.)

12Ndien mmen isɔŋ emi nnyin ikedade ke ini oro, ɔtɔŋɔde ke Aroer, emi odude ke mben itihere Arnon, ye ubak obot Gilead, ye mme obio esie, nnɔ mme Reubenite ye mme Gadite.

13Nnyuŋ nda ubak Gilead emi ɔsuhɔde, ye ofuri Bashan, kpa idut Og, ofuri edem Argob, kpa ofuri Bashan emi ekerede isɔŋ mme Rehpaim, nnɔ ubak esie Manasseh.

14Jair eyen Manasseh ada ofuri edem Argob, tutu osim ke adaŋa mme Geshurite, ye mme Maacathite; onyuŋ ada enyiŋ esiemɔ osio mmɔ Bashan-havvoth-jair, tutu osim mfin emi.

15Ndien nda Gilead nnɔ Machir.

16Nnyuŋ nnɔ mme Reubenite ye mme Gadite se itɔŋɔde ke Gilead tutu osim ke itihere Arnon, kpa ufɔt itihere emi edide adaŋa, tutu onyuŋ osim ke idim Jabbok, emi edide adaŋa nditɔ Ammon:

17ye itihere Jordan, ye Jordan emi edide adaŋa, ɔtɔŋɔde ke Chinnereth tutu osim ke Inyaŋ Itihere, kpa Inyaŋ Inuŋ, ke usuhɔre Pisgah, ke edem usiaha-utin.

18Ndien ŋwuk mbufo ke ini oro, nte, Jehovah Abasi mbufo ɔmɔnɔ mbufo isɔŋ emi ete eda enye enyene: kpukpru mbufo mbon uko ebɔbɔ mbɔbɔ ekɔŋ, ebem nditɔ Israel nditɔ-ete mbufo iso ebe.

19Edi ama edi iban mbufo, ye nditɔwɔŋ mbufo, ye ufene mbufo (koro mmɔfiɔk nte mbufo emenyene ediwak ufene) mmɔ eyesuk ke mme obio mbufo emi ŋkɔnɔde mbufo;

20tutu Jehovah ɔnɔ nditɔ-ete mbufo nduɔk-odudu, kpa nte mbufo, (tutu) mmɔ ŋko enyuŋ eda isɔŋ emi Jehovah Abasi mbufo ɔnɔde mmɔ ke edem Jordan oko: ndien kpukpru mbufo edifiak ke udeme mbufo emi mma ŋkɔnɔ mbufo.

21Ndien nteme Joshua, ke ini oro, nte, Enyin fo ema ekut kpukpru se Jehovah Abasi mbufo akanamde ye mbɔŋ mbiba emi: kpa ntre ke Jehovah edinam ke kpukpru mme idut emi afo edibede aka do.

22Mbufo ekubak mmɔ: koro edi Jehovah Abasi mbufo ediŋwana ekɔŋ ɔnɔ mbufo.

23Ndien ami ŋkpe Jehovah ubɔk ke ini oro, nte, O Jehovah ɔbɔŋ, afo

24ɔmɔtɔŋɔ ndida ubom fo, ye nsɔŋubɔk fo, ŋwut owo fo: koro ewe Abasi eke ekemede ndinam ŋkem ye utom fo, ye odudu fo, odu ke enyɔŋ, mme ke isɔŋ?

25Mbɔk, yak mbe ŋkokut eti isɔŋ emi odude ke edem Jordan oko, eti obot oro, ye Lebanon.

26Edi Jehovah akayat esit ye ami abaŋa mbufo, ndien ikopke uyo mi: Jehovah onyuŋ ɔdɔhɔ mi, ete, Yak ekem fi; kutɔŋɔ aba ntak udɔhɔ mi ubaŋa ŋkpɔ emi.

27Dɔk ke ibuot Pisgah, nyuŋ menere enyin fo se nnasia, ye edere, ye usuk, ye ufien nyuŋ da enyin-enyin se enye: koro mudubehe Jordan emi.

28Nyuŋ teme Joshua, nyuŋ sɔŋ enye esit, nyuŋ sɔŋ enye idem: koro edi enye edibe mbon emi iso, onyuŋ edi enye edida isɔŋ emi afo edikutde edeme ɔnɔ mmɔ.

29Ndien nnyin itie ke itihere ikem ye Beth-peor.