1EKEM ke ɔyɔhɔ ɔfiɔŋ duopeba emi edide ɔfiɔŋ Adar, ke ɔyɔhɔ usen esie duopeta, ke osimde ke ini eke ekpenamde uyo edidem, ye ewuhɔ esie, ke usen eke mme asua mme Jew esede ete iyekan mmɔ, edi akabare nte mme Jew ekande mmɔ emi esuade mmɔ;
2mme Jew esop idem ke obio mmɔ, ke kpukpru mme province edidem Ahasuerus, man emen ubɔk etuk owo eke eyomde ndinam mmɔ idiɔk-ŋkpɔ: ndien baba owo kiet ikemeke ndida mmɔ ke iso; koro ndik mmɔ omumde kpukpru mme idut.
3Ndien kpukpru mbɔŋ mme province, ye mme andikara, ye mme etubom, ye mmɔ eke enamde utom edidem, eŋwam mme Jew: koro ndik Mordecai okomumde mmɔ.
4Koro Mordecai okponde ke ufɔk edidem, etop esie onyuŋ ɔwɔrɔde osim kpukpru mme province: koro Mordecai emi ɔdiɔŋde diɔŋ okpon aka iso.
5Ntem ke mme Jew esuan kpukpru mme asua mmɔ ke ofut, ewot, enyuŋ esobo mmɔ, enyuŋ enam mme asua mmɔ, kpa nte mmɔ emade.
6Ndien ke palace Shushan mme Jew ewot enyuŋ esobo owo ikie ition.
7Mmɔ enyuŋ ewot Parshandatha, ye Dalphon,
8ye Aspatha, ye Poratha, ye Adalia,
9ye Aridatha, ye Parmashta, ye Arisai, ye Aridai,
10ye Vaizatha, nditɔ-iren Haman, eyen Hammedatha, duop, mme asua mme Jew; edi mmɔ isinke ubɔk mmɔ ituk mbume.
11Ke usen oro ibat owo mmɔ ekewotde ke palace Shushan, edi ke iso edidem.
12Ndien edidem ɔdɔhɔ Esther ɔbɔŋ-aŋwan, ete, Mme Jew ema ewot, enyuŋ esobo owo ikie ition ke palace Shushan, ye nditɔ-iren Haman duop; mmɔ ekenam nso ke mme province edidem efen? Nsidi ebeŋe fo, ndien? ke eyenɔ fi. Nso ŋkpɔ efen ke afo oyom? ke eyenam.
13Ndien Esther ɔdɔhɔ ete, Edieke edidem amade, yak eyak mme Jew emi edude ke Shushan enam mkpɔŋ ŋko suk nte ewuhɔ mfin emi, yak enyuŋ eyiri nditɔ-iren Haman mboduop ke eto.
14Ndien edidem ɔdɔhɔ, ete enam ntre; Ndien mmɔ etaŋa ewuhɔ ke Shushan; enyuŋ eyiri nditɔ-iren Haman mboduop.
15Ndien mme Jew emi edude ke Shushan, enyuŋ esop idem ŋko ke ɔyɔhɔ usen duopenaŋ, ke ɔfiɔŋ Adar, enyuŋ ewot owo ikie ita ke Shushan; edi isinke ubɔk mmɔ ituk mbume.
16Mme Jew eŋwen emi edude ke mme province edidem, ebono, enyuŋ eda ekpeme uwem mmɔ, ebɔhɔ mme asua mmɔ, enyuŋ ekut nduɔkodudu, enyuŋ ewot tɔsin mbon usua mmɔ itie ata ye efut, edi isinke ubɔk mmɔ ituk mbume,
17ke ɔyɔhɔ usen ɔfiɔŋ Adar duopeta; ndien ke ɔyɔhɔ usen duopenaŋ, mmɔ edop, enyuŋ enim enye ke usen udia ye idaresit.
18Ndien mme Jew oro edude ke Shushan esop idem ke ɔyɔhɔ usen esie duopeta, ye ke ɔyɔhɔ usen esie duopenaŋ; enyuŋ edop ke ɔyɔhɔ usen esie efut, enyuŋ enim enye ke usen udia ye idaresit.
19Mmɔdo mme Jew obio iŋwaŋ, eke eduŋde ke mme obio iŋwaŋ, enimde ɔyɔhɔ usen ɔfiɔŋ Adar duopenaŋ ke usen idara, ye udia, ye ufɔn, ye eke owo enɔde enɔ esɔk mbɔhiduŋ mmɔ.
20Ndien Mordecai ewet ikɔ emi, onyuŋ ɔnɔ ŋwed esɔk mme Jew akpaimɔ emi edude ke kpukpru mme province edidem Ahasuerus, mbio mkpet-mkpet ye mbio nsan-nsan, ete ewuk ke otu mmɔ,
21ete enim ɔyɔhɔ usen ɔfiɔŋ Adar duopenaŋ, ye ɔyɔhɔ usen esie efut, kpukpru isua,
22ke usen emi mme Jew ekebɔhɔde mme asua mmɔ eduɔk odudu, ye ke ɔfiɔŋ emi ukut akabarede ɔnɔ mmɔ ke idara, ye eseme ke eti usen: ete enim mmɔ ke usen udia ye idara, ye eke owo enɔde enɔ esɔk mbɔhɔiduŋ mmɔ, ye eke efɔnde ido ye mme ubuene.
23Ndien mme Jew enyime ndinam se mmɔ eketɔŋɔde, ye se Mordecai ekewetde ɔnɔ mmɔ;
24koro Haman eyen Hammedatha Agagite, usua mme Jew akpaimɔ, akaduakde abaŋa mme Jew, ete isobo mmɔ, okonyuŋ esinde Pur, oro edi afia, ete ibiat inyuŋ isobo mmɔ;
25edi adaŋemi enye (Esther) odukde ke iso edidem, enye ɔdɔhɔ ke ŋwed, ete idiɔk ekikere oro enye ekekerede abaŋa mme Jew afiak odoro enye ke ibuot, ndien eyiri enye ye nditɔ-iren esie ke eto.
26Mmɔdo mmɔ edade enyiŋ Pur esio usen oro, ete Purim. Mmɔdo kpukpru ikɔ ŋwed oro, ye se mmɔ ekekutde ntem, ye se iketibede ye mmɔ, esin mme Jew ewuk,
27enyuŋ enim enɔ idem mmɔ, ye ubon mmɔ, ye kpukpru owo eke edidiande idem ye mmɔ, ete ekutre ndinim usen mbiba emi, nte asaŋade ke ŋwed mmɔ, ye ini emi mmɔ edoride kpukpru isua;
28kpaŋ ekpeti mme usen emi, ekpenyuŋ enim mmɔ ke kpukpru emana, ye ke kpukpru ufɔk, ye ke kpukpru province, ye ke kpukpru obio; kpaŋ usen Purim emi ekusop ke otu mme Jew, ubon mmɔ ekunyuŋ etre nditi mmɔ.
29Ekem Esther ɔbɔŋ-aŋwan, eyen Abihail, ye Mordecai Jew, ewet ŋwed esin ofuri nsɔŋuyo, man esɔŋɔ udiana-akpa ŋwed Purim emi.
30Ndien enye ɔnɔ ŋwed oro esɔk mme Jew akpaimɔ ke mme province ikie ye edip ye itiaba emi Ahasuerus akarade, ikɔ emem ye akpanikɔ,
31ete esɔŋ enim mme usen Purim emi ke ekem ini mmɔ, kpa nte emi Mordecai Jew, ye Esther ɔbɔŋ-aŋwan ekewukde mmɔ, nte mmɔ ekenyuŋ ewukde idem mmɔ ye ubon mmɔ ikɔ utre-udia mmɔ, ye eke eseme mmɔ.
32Ndien uyo Esther ɔsɔŋɔ ikɔ Purim emi; ndien ewet enye esin ke ŋwed oro.
Who We AreWhat We EelieveWhat We Do
2025 by iamachristian.org,Inc All rights reserved.
