1NDIEN Bezalel ada eto shittim anam ekebe: uniɔŋ esie ibio idomo-okuk iba ye ubak, ye ubom esie ibio idomo-okuk kiet ye ubak, ye idaha esie ibio idomo-okuk kiet ye ubak.
2Enye onyuŋ ada ata eti gold ofuk enye ke esit ye ke edem, onyuŋ anam mkpuk-mkpuk mben o-gold, esin ke esit akanade okuk.
3Enye onyuŋ atara gold anam mkpanuen inaŋ ɔnɔ enye, esin ke utɔŋ esie mbinaŋ; ndien mkpanuen iba esine ke ŋkaŋ esie kiet, ye mkpanuen iba ke ŋkaŋ esie eken.
4Enye onyuŋ anam esaŋ eto shittim, onyuŋ ofuk mmɔ ke gold.
5Ndien enye esin esaŋ ke mkpanuen ke ŋkaŋ ekebe, man ebiom ekebe.
6Ndien enye anam itie usio-isop ke ata eti gold. Uniɔŋ esie ibio idomo-okuk iba ye ubak, ye ubara esie ibio idomo-okuk kiet ye ubak.
7Enye onyuŋ anam cherubim iba ke gold, odom mmɔ anam, adian ke mbuot itie usio-isop edem mbiba.
8Cherub kiet ke ibuot kiet, ye cherub kiet ke ibuot eken: enye anam mme cherubim esin ke itie usio-isop, ke mbuot esie mbiba.
9Ndien mme cherubim oro etiga mba mmɔ ke enyɔŋ, efuk itie usio-isop ke mba mmɔ, ndien kiet asak iso ese kiet; iso mme cherubim enyuŋ ese itie usio-isop.
10Enye onyuŋ ada eto shittim anam okpokoro: uniɔŋ esie ibio idomo-okuk iba, ye ubara esie ibio idomo okuk iba, ye ubara esie ibio idomo-okuk kiet ye ubak.
11Enye onyuŋ ada ata gold ofuk enye, onyuŋ anam mkpuk-mkpuk gold akanare enye okuk.
12Enye onyuŋ anam mben eka-ubɔk kiet ɔnɔ enye akanade okuk, onyuŋ anam mkpuk-mkpuk gold esin enye ke mben akanade okuk.
13Enye onyuŋ atara gold, anam mkpanuen inaŋ ɔnɔ enye, onyuŋ esin mkpanuen oro ke utɔŋ mbinaŋ eke edude ke ukot esie mbinaŋ
14Mkpanuen oro ekpere mben, ke eke itie esaŋ, man eda ebiom okpokoro.
15Enye onyuŋ ada eto shittim anam esaŋ, onyuŋ ofuk mmɔ ke gold, man eda ebiom okpokoro.
16Ndien enye ada ata gold anam ŋkpɔ emi edoride ke okpokoro, kpa mme usan esie, ye ikpaŋ esie, ye mme bowl esie, ye mme cup esie, eke edade eŋwaŋa ediŋwɔŋ uwa.
17Ndien enye onyuŋ anam uwuk utuenikaŋ ke ata gold: odom uwuk-utuenikaŋ anam; ukot esie, ye ekpat esie, ye cup esie, ye ekop esie, ye flower esie,
18esaŋa idem kiet: ndien enye asiaha ŋkɔk itiokiet ke ŋkan esie; ŋkɔk uwuk-utuenikaŋ ita ke ŋkaŋ esie kiet, ye ŋkɔk uwuk-utuenikaŋ ita ke ŋkaŋ esie eken:
19cup ita ebiet almond, ye ekop, ye flower, edu ke ŋkɔ kiet; cup ita ebiet almond, ye ekop, ye flower, enyuŋ edu ke ŋkɔk efen; ntre ke ŋkɔk mbitiokiet emi uwuk-utuen-ikaŋ asiahade.
20Ndien cup inaŋ ebiet almond, ye ekop mmɔ, ye flower mmɔ, enyuŋ edu ke idem uwuk-utuenikaŋ:
21ekop kiet onyuŋ odu ke idak ŋkɔk iba emi enye asiahade, ekop kiet onyuŋ odu ke idak ŋkɔk iba emi enye asiahade, ekop kiet onyuŋ odu ke idak ŋkɔk iba emi enye asiahade, ke ŋkɔk mbitiokiet emi uwuk-utuen-ikaŋ asiahade.
22Mme ekop mmɔ ye mme ŋkɔk mmɔ esaŋa idem kiet; kpukpru edi se edomde ata eti gold enam.
23Enye onyuŋ ada ata eti gold anam utuenikaŋ esie itiaba, ye udiɔŋ-utuenikaŋ esie, ye usin-udiɔŋ esie.
24Ada talent ata eti gold anam enye, ye kpukpru ŋkpɔ utom esie.
25Ndien enye ada eto shittim anam itie-ufɔp incense: uniɔŋ esie edi ibio idomo-okuk kiet, ye ubom esie ibio idomo-okuk kiet; mbuot inaŋ edi ukem-ukem; idaha esie onyuŋ edi ibio idomo okuk iba; nduk esie edi idem kiet ye enye.
26Enye onyuŋ ada ata gold okubi enye, enyɔŋ esie, ye ŋkaŋ esie akanade okuk, ye nduk esie; onyuŋ anam mkpuk-mkpuk mben o-gold esin enye akanade okuk.
27Enye onyuŋ anam mkpanuen o-gold iba esin ke esit, ke idak mkpuk-mkpuk mben esie, ke inuk esie iba, ke ŋkaŋ esie mbiba, man edi itie esaŋ, man eda, mmɔ ebiom enye.
28Enye onyuŋ ada eto shittim anam esaŋ, ɔnyuŋ ada gold ofuk mmɔ.
29Enye ada ubɔk-utom abuak-ufuɔŋ-ŋkpɔ, anam edisana aran nyere, ye ata eti edifuɔŋ incense.
Who We AreWhat We EelieveWhat We Do
2025 by iamachristian.org,Inc All rights reserved.
