MME ŊKE 8 - Efik Old Bible With Sectional Headings

Mme Enɔ Ifiɔk

1NTE eti ibuot ikotke? Nte mbufiɔk isioroke uyo esie?

2Enye ada ke mbuot edikoŋ ebiet, ke mben ɔkpɔ-usuŋ, ke ufɔt usuŋ.

3Ke edem enyin-usuŋ, ke inua-otop obio, ke ɔtɔ uduk enyin-usuŋ ke enye ɔkwɔrɔ.

4Ete, Ke edi mbufo owo ke ŋkot; mmonyuŋ mmenere uyo mi nnɔ nditɔ owo.

5Mbufo, mbon ɔkɔi, etim efiɔk ɔniɔŋ: mbufo mbon ndisime ŋko, enyene ata esit ifiɔk.

6Mbufo ekop: koro nyedɔhɔ ata eti ŋkpɔ: ndien ke ŋkubɔrede mkpɔk-inua mi nyetiŋ se inende.

7Koro nsiŋ mi eyetie ekere akpan-ikɔ; ndien mkpɔk-inua mi ese idiɔk ke mbubiam.

8Kpukpru ikɔ inua mi edi se inende; baba kiet eke akwaŋade, eke onyuŋ oyurɔde, iduhe ke otu mmɔ.

9Kpukpru mmɔ etara asian owo ke idem, enyuŋ enen enɔ mmɔ eke enyenede ifiɔk.

10Mbufo ebɔ item mi, ekubɔ silver; ebɔ ifiɔk ekan ata edimek gold.

11Koro eti ifiɔk ɔfɔnde akan pearl; ndien kpukpru ŋkpɔ-uto ikemke ukem ye enye.

12Ami eti ibuot nduŋ ye ɔniɔŋ, nnyuŋ nyarare ifiɔk ye ikike.

13Uteŋe Jehovah edi ndisua idiɔk, ye iseri, ye iseŋ, ye idiɔk ido: ami nnyuŋ nsua abak inua.

14Item ye ata ɔniɔŋ edi okim: ndi asian; mmenyene odudu.

15Oto mi ndidem eda ubɔŋ, mbɔŋ enyuŋ ewuk se inende.

16Oto mi ikpɔ owo ekara, ye mme akwa owo, kpukpru mme ebierikpe ererimbot.

17Ami mmama mmɔ eke emade mi; ndien mmɔ eke ebakde eyom mi eyekut mi.

18Inyene ye ukpono edu ye ami, inyene eke ebigide ye ido eke enende.

19Mfri mi ɔfɔn akan gold, idem ata eti gold; mbuŋwum mi onyuŋ ɔfɔn akan edimek silver.

20Nsasaŋa ke usuŋ eke enende, ke ufɔt ɔkpɔ-usuŋ ikpe;

21Man nnam mmɔ eke emade mi eda ŋkpɔ enyene; nyenyuŋ nyɔhɔ ubet unim-ŋkpɔ mmɔ.

22Jehovah ekenyene mi ke akpa eritɔŋɔ usuŋ esie, ke enye mikainamke ŋkpɔ esie, ke ata eset.

23Ke eyo oko ke ekeyet mi aran enim, ke eritɔŋɔ, ke ererimbot mika-iduhe.

24Ŋkamana ke ini mme udem mika-iduhe kaŋa; ke ini mme idim eke mmɔŋ awakde mika-iduhe kaŋa.

25Ŋkamana ke ini ikpɔ obot mika-iwuhɔke, ke ini ŋkpri obot mika-iduhe:

26Ke adaŋemi enye mika-inamke kaŋa isɔŋ ye mme desert, ye idem akpa ŋkukuk ntan.

27Ami ŋkodu do ke adaŋemi enye owukde enyɔŋ: ke ini enye ewetde ekara ke iso inyaŋ.

28Ke ini enye emende afia enyɔŋ owuk ikpa-enyɔŋ: ke ini enye anamde enyin idim inyaŋ esɔŋɔ:

29Ke ini enye owukde akamba mmɔŋ ewuhɔ esie, ete mmɔŋ okube mben esie: ke ini enye ewetde itie isɔŋ:

30Ndien ndu enye ke ŋkaŋ, eyen emi enye ɔkɔde: ŋkonyuŋ ndi se idatde enye esit ofuri usen; ndara ke iso esie kpukpru ini.

31Ndara mbaŋa edem isɔŋ esie emi owo oduŋde: ndien idaresit mi odu ke otu nditɔ owo.

32Mbufo nditɔwɔŋ, ekop ndien uyo mi: ndien ɔfɔfɔn ye mmɔ eke ekpemede usuŋ mi.

33Ekop item, enyuŋ enyene ibuot, ndien ekusin enye.

34Ɔfɔfɔn ye owo eke okopde uyo mi, onyuŋ etiede ke enyin-usuŋ mi kpukpru usen ebet, onyuŋ etiede ke inua-otop mi ekpeme.

35Koro owo eke okutde mi okut uwem, eyenyuŋ ɔbɔ Jehovah mfɔn.

36Edi owo eke eduede mi abiat ukpɔŋ esiemɔ: kpukpru mmɔ eke esuade mi, ema mkpa.