JEREMIAH 26 - Efik Old Bible With Sectional Headings

Jeremiah Ɔnɔ Ŋkukut ke Temple: Emen Enye Eka Ikpe Enyuŋ Eyom Ndiwot Enye

1KE eritɔŋɔ ubɔŋ Jehoiakim eyen Josiah, edidem Judah, ikɔ emi oto Jehovah, ete,

2Ntem ke Jehovah ɔdɔhɔ ete, Ka kada ke okure ufɔk Jehovah, nyuŋ men kpukpru ikɔ eke ŋwukde fi, nte ɔdɔhɔ ye mmɔ, tiŋ baŋa kpukpru mme obio Judah eke edide ndituak ibuot ke ufɔk Jehovah; kusio baba ikɔ kiet ufep;

3mme mmɔ kiet kiet eyekop enyuŋ efiak ekpɔŋ idiɔk usuŋ mmɔ, man ŋkabare ŋkpɔŋ idiɔk-ŋkpɔ emi ami ŋkekerede ndinam mmɔ mbaŋa mme idiɔk ido mmɔ.

4Nyuŋ dɔhɔ mmɔ, ete, Ntem ke Jehovah ɔdɔhɔ, ete, Mbufo minyimeke ndikop uyo mi nnyuŋ nsaŋa ke mme ewuhɔ mi emi ŋkonimde ke iso mbufo:

5nnyuŋ ŋkop ikɔ ikɔt mi mme prophet, emi ami ŋkɔdɔŋde utom ke ɔtɔ mbufo, mbabak ndɔŋ, edi mbufo ikokopke;

6ndien nyenam ufɔk emi ebiet Shiloh, nyenyuŋ nnim obio emi ke ŋkpɔ isuŋi nnɔ kpukpru mme idut ererimbot.

7Ndien mme oku ye mme prophet ye ofuri mbio-obio ekop nte Jeremiah etiŋde ikɔ emi ke ufɔk Jehovah.

8Edikem adaŋoro Jeremiah ama eketiŋ kpukpru se Jehovah okowukde, ete enye etiŋ ɔnɔ kpukpru owo, ndien mme oku, ye mme prophet, ye kpukpru owo emum enye, ete, Afo emenyene ndikpa.

9Nsinam afo etiŋde prophecy ke enyiŋ Jehovah, ete, Ufɔk emi eyebiet Shiloh, obio emi eyenyuŋ abiara, tutu owo eke oduŋde iduhe? Ndien kpukpru owo esop idem enam ikɔ ye Jeremiah ke ufɔk Jehovah.

10Ekem mbon Judah edikop ikɔ emi, ndien eto ke ufɔk edidem edɔk ke ufɔk Jehovah, editie ke obufa inua-otop Jehovah.

11Ndien mme oku ye mme prophet edɔhɔ ye mbɔŋ ye ofuri mbio-obio, ete, Owo emi emedue isop mkpa: koro enye ama etiŋ prophecy abaŋa obio emi, kpa nte mbufo ekopde ke utɔŋ mbufo.

12Ndien Jeremiah ɔdɔhɔ kpukpru owo, ete, Jehovah ɔdɔŋ mi nditiŋ kpukpru ikɔ prophecy emi mbufo ekopde, mbaŋa ufɔk emi ye obio emi.

13Mbufo ekabare ndien usuŋ mbufo, ye ido mbufo enam ɔfɔn, enyuŋ ekop uyo Jehovah Abasi mbufo; ndien Jehovah eyedahado ke idiɔk-ŋkpɔ oro enye ɔdɔhɔde abaŋa mbufo.

14Ndien ama edi ami, se mi mi ke ubɔk mbufo: enam ye ami kpa nte ɔfɔŋde onyuŋ enende mbufo ke enyin.

15Edi mbufo etim efiɔk, ete ke edieke mbufo ewotde mi, ke mbufo eda iyip owo eke miduehe edori ke idem mbufo, ye ke obio emi, ye ke mme andiduŋ enye: koro ke akpanikɔ ke edi Jehovah ɔdɔŋ mi utom ke ɔtɔ mbufo, ete ntiŋ kpukpru ikɔ emi ke utɔŋ mbufo.

16Ndien mbɔŋ oro ye kpukpru mbio-obio edɔhɔ mme oku ye mme prophet, ete, Owo emi iduehe isop mkpa: koro enye ɔdɔhɔde ye nnyin ke enyiŋ Abasi nnyin.

17Ndien ndusuk mbiowo isɔŋ edaha ke enyɔŋ, enyuŋ edɔhɔ ofuri esop mbio-obio, ete,

18Micaiah Morashtite eketiŋ prophecy ke eyo Hezekiah edidem Judah, onyun ɔdɔhɔ ofuri mbio Judah, ete, Ntem ke Jehovah mme udim ɔdɔhɔ, ete, Ke eyefuŋ Zion nte iŋwaŋ, Jerusalem eyenyuŋ akabare edi ndon, obot ufɔk eyenyuŋ akabare edi ibombom akai.

19Nte Hezekiah edidem Judah, ye ofuri Judah ema eyom ndiwot enye? Nte enye ikabakke Jehovah, inyuŋ ikpe Jehovah ubɔk, ndien Jehovah adahado ke idiɔk-ŋkpɔ oro enye ɔkɔdɔhɔde abaŋa mmɔ? Ke ntre ke nnyin ikpanam akamba idiɔk ŋkpɔ otuk ukpɔŋ nnyin.

20Ndien owo efen ŋko eketiŋ prophecy ke enyiŋ Jehovah, kpa Uriah eyen Shemaiah emi otode ke Kiriath-jearim, ndien enye etiŋ prophecy abaŋa obio emi, ye isɔŋ emi, asaŋa ke kpukpru ikɔ Jeremiah:

21ndien ke adaŋemi edidem Jehoiakim, ye kpukpru mbon uko esie, ye kpukpru ikpɔ owo ekopde ikɔ esie, edidem oyom ndiwot enye, edi Uriah okop, ndien efehe ndik, onyuŋ ɔbɔhɔ aka Egypt.

22Ndien edidem Jehoiakim ɔdɔŋ owo utom ke Egypt, kpa Elnathan eyen Achbor, ndusuk owo enyuŋ etiene enye eka ke Egypt.

23Ndien mmɔ eda Uriah ke Egypt esio, enyuŋ emen enye esɔk edidem Jehoiakim; ndien enye owot enye ke ofut, onyuŋ emen okpo esie ɔduɔk esin ke udi mbio-obio.

24Edi ubɔk Ahikam eyen Shaphan ada ye Jeremiah, ete ekusin enye ke ubɔk mbio-obio, ete ekewot enye.