ERIYARARE 19 - Efik Old Bible With Sectional Headings

Akwa Otu Owo Ke Enyɔŋ Etoro Abasi

1KE ŋkpɔ emi ema ekebe, ŋkop se ibietde uyo akwa otu owo nte ɔdɔhɔde ke heaven, ete, Hallelujah; Erinyaŋa, ye ubɔŋ, ye ukeme enyene Abasi nnyin:

2koro mme ikpe Esie edi ata akpanikɔ enyuŋ enen; koro Enye ama ebiere ikpe akwa akpara, emi akadade use esie abiat isɔŋ, Enye onyuŋ ada usiene iyip ikɔt Esie odori enye ke ibuot.

3Mmɔ enyuŋ etɔŋɔ ntak edɔhɔ ete, Hallelujah. Nsuŋikaŋ nsobo esie ke ɔdɔdɔk ke nsinsi-nsinsi.

4Ekem mbiowo edip ye inaŋ ye ŋkpɔ-uwem inaŋ oro eduɔ ke isɔŋ etuak ibuot enɔ Abasi emi etiede ke ebekpo, ete, Amen; Hallelujah.

5Uyo onyuŋ oto ke ebekpo ɔwɔrɔ ete,

Etoro Abasi nnyin, kpukpru mbufo ikɔt Esie,

Emi eteŋede Enye, ŋkpri ye ikpo.

6Ndien ŋkop uyo emi ebietde mkpo akwa otu, ye uyom uwak mbufut, ye uyom ɔkpɔsɔŋ obuma ɔdɔhɔde ete,

Hallelujah; koro Ɔbɔŋ Abasi nnyin, Andikara kpukpru ŋkpɔ, ada ubɔŋ.

7Eyak nnyin idara inyuŋ idat esit, inyuŋ inɔ Enye ubɔŋ;

Koro ekem ini ndɔ Eyenerɔŋ,

Ŋwan Esie otim idem ebeŋe Enye;

8Enyuŋ enɔ enye ndisine ediye linen eke asanade onyuŋ esemde;

Koro ediye linen oro edi edinen ido nti ikɔt Abasi.

9Angel onyuŋ ɔdɔhɔ mi ete, Ɔfɔnfɔn ɔnɔ mmɔ emi ekekotde edi udia ndɔ Eyen-erɔŋ. Enye onyuŋ ɔdɔhɔ mi ete, Ikɔ emi edi ata ikɔ Abasi.

10Ndien nduɔ Enye ke ukot, nte ntuak ibuot nnɔ enye. Edi enye ɔdɔhɔ mi ete, Kunam: ndi asaŋutom ye afo ye nditɔ-ete fo emi enyenede ikɔ-ntiense Jesus: tuak ibuot nɔ Abasi. Koro ikɔ-ntiense Jesus edi spirit prophecy.

11Ekem ŋkut nte ebererede heaven; ndien sese, afia enaŋ-mbakara, Andidoro enye ke edem ekere Anam-akpanikɔ ye Ata Akpanikɔ, Enye onyuŋ asaŋa ke edinen ido ekpe ikpe onyuŋ aŋwana ekɔŋ.

12Enyin Esie ebiet edeme-ikaŋ, Enye onyuŋ ayara ediwak anyanya ke ibuot; enyuŋ ewet enyiŋ esin Enye ke idem, eke baba owo kiet mifiɔkke, ke mibɔhɔke Enye ke Idem Esie.

13Enye onyuŋ esine ɔfɔŋidem emi ekedebide ke iyip: enyiŋ Esie onyuŋ ekere IKƆ ABASI.

14Ndien udim ekɔŋ emi edude ke heaven edoro ke mfia enaŋ-mbakara etiene Enye ke edem, mmɔ esine ediye linen emi afiade onyuŋ asanade.

15Edisɔp ofut onyuŋ oto Enye ke inua ɔwɔrɔ, man Enye ada ekpeŋe mme idut; Enye eyenyuŋ ada esaŋ ukwak akara mmɔ. Enye onyuŋ edigi obube udigi-wine ikaŋ-ikaŋ iyaresit Abasi Andikara kpukpru ŋkpɔ.

16Enye onyuŋ enyene enyiŋ emi ewetde ke ɔfɔŋ-idem Esie ye ke ifuhi Esie ete, EDIDEM NDIDEM YE ƆBƆŊ MBƆŊ.

17Ekem ŋkut angel kiet nte adade ke utin; ndien enye ofiori ke ɔkpɔsɔŋ uyo okot kpukpru mme inuen eke efede ke ufɔt ikpa-enyɔŋ, ete, Edi ediboho ɔtɔ kiet, man edia akamba udia Abasi;

18man eta obuk ndidem, ye obuk mme etubom-ekɔŋ, ye obuk mkpɔsɔŋ owo, ye obuk enaŋ-mbakara, ye eke mme andidoro mmɔ ke edem, ye obuk kpukpru owo, nditɔ ye ifin, ŋkpri ye ikpɔ.

19Ekem ŋkut unam oro, ye ndidem isɔŋ, ye mbon-ekɔŋ mmɔ, nte esopde idem ɔtɔ kiet ndiŋwana ekɔŋ ye Andidoro ke enaŋ-mbakara ye mbon-ekɔŋ Esie.

20Ndien emum unam oro, enyuŋ emum prophet nsu emi adade ke iso esie anam mme idiɔŋɔ, eke enye adade abiaŋa mmɔ emi ekebɔde idiɔŋɔ unam oro, ye mmɔ emi etuakde ibuot enɔ mbiet esie. Etop mmɔ mbiba ye uwem esin ke inyaŋ ikaŋ emi asakde ye mbrimstone.

21Ama edi mmɔ eken emi esuhɔde, ewot mmɔ ke ofut Andidoro ke edem enaŋ-mbakara, kpa ofut oro ɔwɔrɔde Enye ke inua. Kpukpru mme inuen enyuŋ eta obuk eyuhɔ.