1NTEM ke Ɔbɔŋ Jehovah ɔdɔhɔ, ete, Yak ekɔbi usuŋ esa emi esede edem usiaha-utin, ke usen unam utom mbitiokiet; ndien yak ekpɔhɔre enye ke usen sabbath, enyuŋ ekpɔhɔre enye ke usen obufa ɔfiɔŋ.
2Ndien yak ɔbɔŋ oto ke usuŋ etehe inua-otop ke esien, edi edida ke ɔtɔ obubɔk enyin usuŋ inua-otop; ndien mme oku ewa edifɔp uwa esie ye mme uwa emem esie, yak enye onyuŋ atuak ibuot ke asaŋudɔk usuŋ: ndien ɔwɔrɔ: edi ekusin usuŋ tutu osim ke mbubreyo.
3Yak mbio-obio enyuŋ etuak ibuot ke enyin inua-otop emi ke mme sabbath ye ke mbufa ɔfiɔŋ ke iso Jehovah.
4Ndien edifɔp uwa eke ɔbɔŋ oro edidade ɔsɔk Jehovah ke usen sabbath edidi nditɔ erɔŋ itiokiet eke efɔnde ema, ye okukim erɔŋ eke efɔnde ema.
5Ye inuak-udia ŋko, ephah kiet ke okukim kiet, ye inuak-udia nditɔ erɔŋ kpa nte ubɔk esie ɔnɔde, hin aran onyuŋ asaŋa ye ephah kiet.
6Ndien ke usen obufa ɔfiɔŋ edidi abak-enaŋ, eyen ufene eke ɔfɔnde ama, ye nditɔ erɔŋ itiokiet, ye okukim erɔŋ, yak mmɔ efɔn ema.
7Ndien yak enye anam inuak-udia ephah kiet ke enaŋ kiet, ye ephah kiet ke okukim, ye adaŋa nte ubɔk esie edikemede ke eke nditɔ erɔŋ, hin aran kiet onyuŋ asaŋa ye ephah kiet.
8Ndien adaŋemi ɔbɔŋ odukde, yak enye oduk ke usuŋ etehe inua-otop oro, onyuŋ ɔwɔrɔ ke usuŋ esie.
9Ndien adaŋemi mbio-obio edide ke iso Jehovah ke ini usɔrɔ, yak owo eke odukde ke usuŋ inua-otop edem edere ndituak ibuot, ɔwɔrɔ ke usuŋ inua-otop edem usuk; ndien yak owo eke odukde ke usuŋ inua-otop edem usuk, ɔwɔrɔ ke usuŋ inua-otop edem edere: owo okufiak ke usuŋ inua-otop eke enye odukde ke esit, edi yak enye ɔwɔrɔ ke eke odude ke iso.
10Ndien yak ɔbɔŋ odu ke otu mmɔ; ke ini mmɔ edukde, yak enye oduk: ndien ke ini mmɔ ewɔŋɔde, yak mmɔ ewɔŋɔ (ɔtɔ kiet).
11Ndien ke mme usɔrɔ, ye ke ini emi mmɔ ekam enimde, inuak-udia edidi ephah kiet ke enaŋ kiet, ye ephah kiet ke okukim kiet; ye se ubɔk esie ekemde ke eke nditɔ erɔŋ: hin aran kiet onyuŋ asaŋa ye ephah kiet.
12Ndien adaŋemi ɔbɔŋ oyomde ndiwa edifɔp uwa ima-esit, ye uwa emem ima-esit, nnɔ Jehovah, yak owo osio usuŋ emi esede edem usiaha-utin ɔnɔ enye, ndien enye awa edifɔp uwa esie ye uwa emem esie, kpa nte enye anamde ke sabbath: ndien ke enye ɔwɔrɔde, yak owo ɔkɔbi usuŋ, ke adaŋemi enye ɔwɔrɔde ama.
13Nyuŋ wa eyenerɔŋ isua kiet eke ɔfɔnde ama, nɔ Jehovah kpukpru usen ke edifɔp uwa; wa enye kpukpru usenubɔk.
14Nyuŋ wa inuak-udia kɔrɔ ke esit kpukpru usenubɔk, ke ɔyɔhɔ ubak ephah itiokiet, ye ke ɔyɔhɔ ubak hin aran ita eke edibitde ndom-uyo; inuak-udia Jehovah edidi nsinsi ewuhɔ kpukpru ini.
15Ntem ke mmɔ edinam eyenerɔŋ ye inuak-udia ye aran, kpukpru usenubɔk ke nsinsi edifɔp uwa.
16Ntem ke Ɔbɔŋ Jehovah ɔdɔhɔ ete, Ke adaŋemi ɔbɔŋ edidade enɔ ɔnɔ owo ke otu nditɔ esie, oro edidi udeme nditɔ esie; mmɔ edida enye enyene ke udeme.
17Edi ke adaŋemi enye osiode enɔ ke udeme esie ɔnɔ owo kiet ke otu ikɔt esie, eyedi esie tutu osim isua jubilee; ndien afiak oduk ɔbɔŋ ke ubɔk: udeme esie eyenyene nditɔ esie ikpɔŋ-ikpɔŋ.
18Kunyuŋ uyak ɔbɔŋ osio ke udeme mbio-obio, okunyuŋ ɔbɔ mmɔ udeme mmɔ ke ŋkanubɔk: yak enye osio ke udeme esiemɔ ɔnɔ nditɔ esie: man ekusuan ikɔt mi efep ke udeme mmɔ.
19Ekem enye ada mi oduk ke usuŋ emi odude ke ŋkaŋ inua-otop okosim ndisana ubet: mme oku emi esede edem edere ndien, sese, ebiet mmɔ do ke ŋkaŋ mbiba ke edem usop-utin.
20Ndien enye ɔdɔhɔ mi, ete, Ke ebiet emi ke mme oku editem uwa mme ndudue do, ye uwa idiɔk ido, eke mmɔ edisaŋde inuak-udia; man ekuda mmɔ ewɔrɔ ke akwa okure, edinim mbio-obio ke edisana.
21Ndien enye ada mi ɔwɔrɔ ke akwa okure, onyuŋ ada mi okosim inuk okure mbinaŋ; ndien, sese, okure kiet ke inuk okure oro, okure kiet ke inuk okure.
22Okure inaŋ, ibio-idomo-okuk aba ke uniɔŋ, ye ibio-idomo-okuk edip ye duop ke ubom, enyuŋ ediana ke inuk okure oro mbinaŋ: inuk mbinaŋ oro esaŋa idomo kiet.
23Udim ufɔk utem-ŋkpɔ odu mmɔ ke esit akan mmɔ mbinaŋ okuk; ekenyuŋ enam ebiet utem-ŋkpɔ ke idak mme udim oro ekan ekuk; ndien enye ɔdɔhɔ mi, ete,
24Mme mmɔ emi edi ufɔk mme etem-ŋkpɔ, emi mme anam-ŋkpɔ ufɔk etemde mme uwa emem mbio-obio do.
Who We AreWhat We EelieveWhat We Do
2025 by iamachristian.org,Inc All rights reserved.
