2 PETER 3 - Efik Old Bible With Sectional Headings

Eŋwɔŋɔ Edifiak Ndi Ɔbɔŋ

1NDIMA, emi edi udiana-akpa ŋwed emi ŋwetde nnɔ esɔk mbufo; ndien ke mmɔ mbiba ndemere edideŋi esit mbufo ke eriti ikɔ;

2nte, mbufo eti ikɔ emi ndisana prophet ekebemde iso etiŋ, ye item Ɔbɔŋ ye Andinyaŋa nnyin emi otode mme apostle mbufo osim mbufo.

3Ke akpa itie, efiɔk emi ete, ke ukperedem ini mbon nsahi eyeda nsahi edi; mmɔ eyesaŋa ke mme idiɔk itɔŋ mmɔ, enyuŋ edɔhɔ ete,

4Eridi eke Enye ɔkɔŋwɔŋɔde ete iyedi enye? koro tɔŋɔ nte mme ete ekede idap, kpukpru ŋkpɔ etie kpasuk nte eketiede toto ke eritɔŋɔ ererimbot.

5Koro ekoi efre ete, tutuko ikpa-enyɔŋ ama odu, ye isɔŋ emi ikɔ Abasi okosiode ke mmɔŋ owuk onyuŋ adade mmɔŋ obot;

6ndien edi mmɔŋ ke ekada efuk enyuŋ esobo ererimbot emi okodude adaŋoro.

7Edi ama edi ikpa-enyɔŋ ye isɔŋ emi edude ke emi, ikɔ Abasi okomum mmɔ onim ɔnɔ ikaŋ; ekpeme mmɔ enim enɔ usen eke Abasi edikpede ikpe ye mmɔ emi mibakke Enye, edinyuŋ osobo mmɔ.

8Edi ekufre ŋkpɔ kiet emi, ndima, ete, ke enyin Ɔbɔŋ usen kiet etie nte thousand isua, thousand isua enyuŋ etie nte usen kiet.

9Ɔbɔŋ iduɔnke ke erinam uŋwɔŋɔ Esie, ke ido nte ndusuk owo ekerede ete, Enye ɔduɔn; Enye akam enyene anyan ime ye mbufo, inyuŋ iyomke baba owo kiet atak, edi oyom kpukpru owo etua mkpɔfiɔk ekabare esit.

10Edi Usen Ɔbɔŋ edibuat nte inɔ; ke usen oro ikpa-enyɔŋ eyebe efep ye akamba uyom, se edade ebot ererimbot eyenyuŋ etara ke ɔkpɔsɔŋ ufiop, ndien isɔŋ ye kpukpru utom eke enamde ke esit eyeta ikaŋ ebiara.

11Sia kpukpru ŋkpɔ emi edibiarade ntem, nso oruk owo ke mbufo ekpedi ke edisana ido ye ke uteŋe Abasi?

12mbufo emi etiede ebet enyuŋ esɔŋɔde eyom eridi Usen Abasi, kpa usen oro edisinde ikpa-enyɔŋ atara ke ikaŋ, edinyuŋ esinde se edade ebot ererimbot atara ke ɔkpɔsɔŋ ufiop.

13Edi nnyin itie ibet obufa enyɔŋ ye obufa isɔŋ, nte uŋwɔŋɔ Esie edide; ndien edi do ke edinen ido ediduŋ.

14Mmɔdo ndima, sia mbufo etiede ebet mme ŋkpɔ emi, enyene ifik ndien, man Enye okposim mbufo nte etiede ke emem, enana ntɔi, enyuŋ enana ndo ke enyin Esie.

15Enyuŋ eda ete, anyan ime Ɔbɔŋ nnyin ɔwɔrɔ erinyaŋa; kpa nte edima eyen-ete nnyin Paul adade ifiɔk eke enɔde enye ewet ɔnɔ esɔk mbufo;

16onyuŋ ewetde ke kpukpru ŋwed esie, etiŋ abaŋa mme ŋkpɔ emi. Ndusuk ŋkpɔ edu ke mme ŋwed oro eke ɔsɔŋde owo nditim mfiɔk, ndien mbon ndisime ye mbon unana iwuk eyurɔre mme ikɔ oro enim eda esobo idem mmɔ, kpa nte mmɔ enamde ye ikɔ Abasi eŋwen.

17Edi ndima, sia mbufo ema ekebem iso efiɔk emi, ekpeme mbak nduyo mme anam-idiɔk edimen mbufo efep, onyuŋ anam mbufo ekpɔŋ nsɔŋɔ-nda mbufo.

18Edi etie ke mfɔn ye ifiɔk Ɔbɔŋ ye Andinyaŋa nnyin Jesus Christ ekɔri ŋkɔri. Yak ubɔŋ enyene Enye ke emi ye ke nsinsi. Amen.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help