2 CHRONICLES 21 - Efik Old Bible With Sectional Headings

Jehoram Akara ke Judah

1EKEM Jehoshaphat ɔsuhɔre ana ye mme ete esie ede, onyuŋ ɔbuhɔ ye mme ete esie ke obio David. Ndien Jehoram eyen esie ada ubɔŋ ke itie esie.

2Ndien enye enyene nditɔ-ete, kpa nditɔ Jehoshaphat, Azariah, ye Jehiel, ye Zechariah, ye Azariah, ye Michael, ye Shephatiah: kpukpru mme mmɔ emi edi nditɔ-iren Jehoshaphat edidem Israel.

3Ndien ete mmɔ ɔnɔ mmɔ ikpɔ enɔ silver, ye gold, ye ŋkpɔ-uto, ye obio ibibene ke Judah: edi ɔnɔ Jehoram itie edidem: koro enye edide akpan.

4Ekem adaŋemi Jehoram adahade ke enyɔŋ ada ubɔŋ ete esie, enye ɔsɔŋ esit, ndien owot kpukpru nditɔ-ete esie ke ofut, ye ndusuk mbon Israel ŋko.

5Jehoram osim isua edip ye duop-eba ke ini enye adade ubɔŋ; ndien edi edidem ke Jerusalem ke isua itiaita.

6Enye onyuŋ asaŋa ke usuŋ ndidem Israel, kpa nte ufɔk Ahab enamde: koro eyen Ahab aŋwan edide ŋwan esie: enye onyuŋ anam se idiɔkde Jehovah ke enyin.

7Edi Jehovah inyimeke ndisobo ufɔk David, koro enye ama okonyuŋ ɔdɔhɔ, ete ke imɔ iyenɔ enye ye nditɔ esie utuen-ikaŋ ke nsinsi.

8Ke eyo esie Edom esɔŋ ibuot ewɔrɔ ke ubɔk Judah, ndien enim owo ke edidem mmɔ.

9Ndien Jehoram, ye mme etubom esie ye kpukpru mme chariot esie ŋko ewɔŋɔ: ndien enye adaha ke enyɔŋ ke okoneyo, akasuan Edom emi ekande enye ekuk, ye mme etubom mme chariot.

10Ntre ke Edom esɔŋ ibuot ewɔŋɔ ke ubɔk Judah, tutu osim mfin emi. Suk ke ini oro Libnah ɔsɔŋ ibuot ɔwɔrɔ ke ubɔk esie; koro enye ɔkɔkpɔŋde Jehovah Abasi mme ete esie.

11Enye ŋko onyuŋ anam edikoŋ ebiet ke ikpɔ obot Judah, onyuŋ esin mme andiduŋ Jerusalem enam use, onyuŋ enyik Judah enam ntre.

12Ndien prophet Elijah ɔnɔ ŋwed esɔk enye, ete, Ntem ke Jehovah Abasi David usɔ ɔdɔhɔ, ete, Koro afo musaŋake ke mme usuŋ Jehoshaphat usɔ, ye ke usuŋ Asa edidem Judah,

13edi asaŋa ke usuŋ ndidem Israel, onyuŋ esin Judah ye mme andiduŋ Jerusalem enam use, ebiet use ufɔk Ahab, onyuŋ owot nditɔ-usɔ ufɔk usɔ, emi ekefɔnde ekan fi; sese,

14Jehovah mmɔŋ amia ikɔt fo, ye nditɔ fo ye iban fo, ye kpukpru inyene fo, akamba ufen;

15ndien afo eyedɔŋɔ akamba udɔŋɔ nsia fo, tutu nsia fo ewɔŋɔ ke udɔŋɔ kpukpru usen.

16Ndien Jehovah edemere esit mme Philistine, ye eke mme Arabian, emi ekperede mme Ethiopian, ɔnɔ Jehoram:

17ndien mmɔ edɔk ke Judah ebumere eduk ke esit, enyuŋ etaŋ kpukpru inyene eke mmɔ ekutde ke ufɔk edidem efep, ye nditɔ esie, ye iban esie; ndien baba eyen kiet isuhɔke inɔ enye, ke mibɔhɔke Jehoahaz ekpri eyen-eren esie.

18Ekem ke kpukpru ŋkpɔ emi ebede, Jehovah ada udɔŋɔ eke minyeneke erikure, amia enye ke nsia.

19Edikem ke ediwak ini ebede, ke utit isua iba, udɔŋɔ esie esin nsia esie ewɔŋɔ: ndien enye akpa ke idiɔk udɔŋɔ. Ndien ikɔt esie ifɔpke ŋkpɔ inɔ enye, nte ekefɔpde enɔ mme ete esie.

20Enye okosim isua edip ye duopeba, ke ini enye adade ubɔŋ; onyuŋ edi edidem ke Jerusalem ke isua itiaita. Ntre enye adaha, ndien mmɔ isemeke enye. Mmɔ enyuŋ ebuk enye ke obio David, edi ibukke ke udi ndidem.