JEREMIAH 17 - Efik Old Bible With Sectional Headings

Ukwaŋ Ido Judah ye Ufen Emi Abasi Ɔnɔde Mmɔ

1EMEDA ntaŋwed ukwak ye iso diamond ewet idiɔk ido Judah: ekap enye esin ke ɔwɔŋ esit mmɔ, ye ke nduk mme itie-uwa mbufo;

2ke ini nditɔ mmɔ etide mme itie-uwa mmɔ, ye mme eto-mkpe mmɔ, ekpere awawa eto, ye ke enyɔŋ ikpɔ obot.

3O akwa obot mi ke iŋwaŋ, nyeda inyene fo ye kpukpru ŋkpɔ-uto fo nnɔ ke ŋkpɔ mbume, ŋkokoŋo ebiet fo eyedu ke idiɔk ŋkpɔ ke ofuri adaŋa fo.

4Ndien afo eyefep kpa idem fo ke udeme mi emi ŋkɔnɔde fi: ndien nyenam fi anam ŋkpɔ mme asua fo ke isɔŋ eke afo mufiɔkke: koro mbufo ebarade ikaŋ ke iyaresit mi, eyesak ke nsinsi.

5Ntem ke Jehovah ɔdɔhɔ, ete, Osuk ɔdɔdiɔk ɔnɔ owo eke edibuɔtde idem ye owo, onyuŋ onimde obukidem ke ubɔk esie, esit esie onyuŋ ɔwɔŋɔrede ɔkpɔŋ Jehovah.

6Ndien enye eyebiet juniper ke wilderness, idinyuŋ ikwe ini eke eti ŋkpɔ edide; ndien enye eyeduŋ ke edisat ebiet ke wilderness, isɔŋ inuŋ eke owo miduŋke.

7Osuk ɔfɔfɔn ɔnɔ owo eke ɔbuɔtde idem ye Jehovah, eke Jehovah onyuŋ edide iberedem esie.

8Ŋkɔm enye eyebiet eto eke etɔde ke mben mmɔŋ, eke otopde oruŋ esie ke mben akpa, idinyuŋ ikwe ini eke ufiop edide, edi ikɔŋ esie eyedi awawa; idinyuŋ ifeheke ndik ke isua eke eyo adade, idinyuŋ itreke ndiŋwum mfri.

9Esit abiaŋa kpukpru ŋkpɔ, onyuŋ abiara fap; anie edikeme ndifiɔk enye?

10Ami Jehovah nduŋɔre esit, ndomo ŋkpɔ esit idem, man nnɔ kpukpru owo nte ekemde ke usuŋ mmɔ, ye nte ekemde ke mfri utom mmɔ.

11Kpa nte nduduɔk ɔkubɔde nsen, ndien mibotke; kpa ntre ke owo eke ɔkɔde inyene ke usuŋ eke minenke, edikpɔŋ mmɔ ke ufɔt mme usen esie, ndien ke utit esie enye eyekabare edi ndisime.

12Ebekpo ubɔŋ ke enyɔŋ toto ke ertitɔŋɔ edi ebiet edisana ufɔk nnyin.

13Idori-enyin Israel edi Jehovah, but eyenam kpukpru mmɔ eke ekpɔŋde fi. Eyewet kpukpru mmɔ eke ekabarede ekpɔŋ mi esin ke ntan-isɔŋ koro mmɔ ekpɔŋde Jehovah, idim mmɔŋ uwem.

14Nam udɔŋɔ okure mi, O Jehovah, ndien udɔŋɔ eyekure mi; nyaŋa mi, ndien nyedu ke ifure: koro afo edide itoro mi.

15Sese, mmɔ edɔhɔ mi ete, Ikɔ Jehovah odu mmɔŋ? Yak enye edi ndien.

16Ndien ami ŋkawarake ndiwɔŋɔre ke eritiene fi nte ekpemerɔŋ, ŋkonyuŋ nyomke usen ata ukut; afo ɔmɔfiɔk: se itode mi ke inua ana fi ke iso.

17Kutie ye ami nte ŋkpɔ ndik: afo edi ubɔhɔ mi ke usen idiɔk.

18Yak but anam mmɔ eke ekɔbɔde mi, edi kuyak but anam mi: yak idem akpa mmɔ, edi kuyat idem akpa mi: da idiɔk usen tiene mmɔ, nyuŋ sobo mmɔ nsobo iba.

19Ntem ke Jehovah ɔkɔdɔhɔ mi, ete, Ka kada ke inua-otop, nditɔ-obio emi ndidem Judah edukde, ye emi mmɔ ewɔŋɔde ke esit, ye ke kpukpru mme inua-otop Jerusalem;

20nyuŋ dɔhɔ mmɔ, ete, Mbufo ndidem Judah, ye ofuri Judah, ye kpukpru mme andiduŋ Jerusalem, emi edukde inua-otop emi, ekop uyo Jehovah:

21ntem ke Jehovah ɔdɔhɔ ete, Mbufo ekpeme idem mbufo, ndien ekubiom mbiomo ke usen sabbath, ekunyuŋ eda eduk ke inua-otop Jerusalem:

22mbufo ekunyuŋ esio baba mbiomo kiet ke ufɔk mbufo ke usen sabbath, ekunyuŋ enam baba ubɔk utom kiet: enyɔŋ enim usen sabbath ke edisana, kpa nte ŋkowukde mme ete mbufo.

23Ndien mmɔ ikopke, inyuŋ ikpaŋke utɔŋ mmɔ, edi esɔŋɔ obot itɔŋ mmɔ, ndien mmɔ ikopke, inyuŋ ibɔhɔ item.

24Ndien ama ekem, edieke mbufo editimde ekop uyo mi, Jehovah ɔdɔhɔ, ndien midaha mbiomo iduk ke inua-otop obio emi ke usen sabbath, edi enim usen sabbath ke edisana, ndien minamke baba utom ke esit;

25ndien ndidem ye mbɔŋ eke etiede ke ebekpo David, eyedoro ke chariot ye ke horse, mmɔ ye ikpɔ owo mmɔ, mbio Judah, ye mme andiduŋ Jerusalem, ebe inua-otop obio emi eduk: ndien mbio emi eyesuk etie ke nsinsi.

26Ndien mmɔ eyeto ke mme obio Judah, ye ke edem emi akande Jerusalem okuk, ye ke isɔŋ Benjamin, ye ke una-isɔŋ edem inyaŋ, ye ke obot iŋwaŋ, ye ke edem usuk-usuk, eda edifɔp uwa ye uwa emem, ye inuak-udia, ye frankincense, edi, eyenyuŋ eda uwa ekɔm edi ke ufɔk Jehovah.

27Edi mbufo minyimeke ndikop uyo mi, nnyuŋ nnim usen sabbath ke edisana, man ekunyuŋ ebiom mbiomo eduk ke inua-otop Jerusalem ke usen sabbath; ndien ami nyebara ikaŋ ke inua-otop esie, eke editade ikpɔ ufɔk Jerusalem, ndien idinimeke.