JOSHUA 18 - Efik Old Bible With Sectional Headings

Mme Isɔŋ Emi Ekenɔde Mme Esien Israel Eken Okosuhɔde

1EKEM ofuri esop nditɔ Israel esop idem ke Shiloh, enyuŋ ewuk efe esop do. Ndien isɔŋ ana suŋ ke iso mmɔ.

2Ndien esien itiaba emi mikaidaha udeme mmɔ, esuk ke otu nditɔ Israel.

3Ndien Joshua ɔdɔhɔ nditɔ Israel, ete, Adaŋa didie ke mbufo edinam nduduhɔ ke erika ŋkada isɔŋ, emi Jehovah Abasi mme ete mbufo ɔnɔde mbufo?

4Mbufo esio owo ita ke esien kiet kiet ke idem mbufo: ndien nyedɔŋ mmɔ utom, ndien mmɔ edidaha ke enyɔŋ esaŋa ke isɔŋ ebe, ndien mmɔ ediwet enye nte mme udeme mmɔ esaŋade; ndien edinyɔŋ etiene mi.

5Ndien yak mmɔ ebahare enye esin ke mbak itiaba: Judah eyetie ke adaŋa esie ke usuk-usuk; ufɔk Joseph eyenyuŋ etie ke adaŋa mmɔ ke edem edere. Ndien mbufo ewet isɔŋ esin ke mbak itiaba,

6eda edisɔk mi mi; ndien ami nyesin afia nnɔ mbufo mi ke iso Jehovah Abasi nnyin.

7Koro mme Levite midaha udeme ke otu mbufo: koro idaha oku edide udeme mmɔ: Gad ye Reuben, ye ubak esien Manasseh ema enyuŋ eda udeme mmɔ ke edem usiaha-utin Jordan, emi Moses owo Jehovah ɔkɔnɔde mmɔ.

8Ekem mbon oro edaha ke enyɔŋ eka: ndien Joshua eteme mme andika ŋkewet isɔŋ, ete, Mbufo eka ekesaŋa ke isɔŋ emi, enyuŋ ewet enye, ndien efiak etiene mi, man nsin afia nnɔ mbufo mi, ke iso Jehovah ke Shiloh.

9Ndien mmɔ oro eka ekesaŋa ke isɔŋ ebe, enyuŋ eda enye ke obio, ke obio, esin ke udeme itiaba ewet ke ŋwed, ndien mmɔ enyɔŋɔ etiene Joshua ke nna Shiloh.

10Ndien Joshua esin afia ɔnɔ mmɔ ke Shiloh ke iso Jehovah: Joshua onyuŋ edeme isɔŋ do ɔnɔ nditɔ Israel ke ubak, ke ubak.

11Ndien afia ɔwɔrɔ ɔnɔ esien nditɔ Benjamin ke ubon ke ubon: ndien adaŋa afia mmɔ ɔwɔrɔ ke ufɔt nditɔ Judah ye nditɔ Joseph.

12Ndien adaŋa mmɔ ke edem edere ɔtɔŋɔ ke Jordan; ndien adaŋa ɔdɔk ke edem edere Jericho, onyuŋ ɔdɔk ke ikpɔ obot ke edem usop-utin, ndien utit esie atuak ke wilderness Beth-aven.

13Ndien adaŋa oto do ebe aka Luz, ke edem usuk Luz, enye edi Beth-el; ndien adaŋa oro ɔduhɔre aka Ataroth-addar, osim obot emi odude ke edem usuk Beth-horon ke usuhɔre.

14Enyuŋ enim adaŋa, ndien enye ɔwɔŋɔre ke eke edem usop-utin, aka usuk-usuk, ɔtɔŋɔde ke obot emi ekemde Beth-horon ke edem usuk; ndien utit esie atuak ke Kiriath-baal, enye edi Kiriath-jearim, obio nditɔ Judah kiet: emi edi edem usop-utin.

15Ndien edem usuk-usuk ɔtɔŋɔ ke utit Kiriath-jearim, ndien adaŋa ɔwɔrɔ aka edem usop-utin, onyuŋ ɔwɔrɔ ke idim mmɔŋ Nephtoah:

16ndien adaŋa ɔsuhɔre ke utit obot emi asakde iso ese itihere eyen Hinnom, emi odude ke itihere mme Rephiam ke edem edere-edere, ndien ɔsuhɔre ke itihere Hinnom ke edem usuk mme Jebusite, ndien ɔsuhɔre aka Enrogel.

17Ndien enim enye ke edem edere, ndien enye ɔwɔrɔ ke Enshemesh, onyuŋ ɔwɔrɔ ke Geliloth emi asakde iso ese ebiet emi edɔkde ke Adummim, ndien ɔsuhɔre aka itiat Bohan eyen Reuben,

18ndien ebe aka edem emi ekemde ye una-isɔŋ ke edem edere, ndien ɔsuhɔre ke una-isɔŋ:

19ndien adaŋa oro ebe aka edem Beth-hoglah ke edere-edere: ndien utit adaŋa atuak ke ituŋ Inyaŋ Inuŋ ke edem edere, ke inua Jordan ese usuk. Emi edi adaŋa edem usuk.

20Ndien Jordan edi utit esie ke edem usiaha-utin. Emi edi udeme nditɔ Benjamin, nte adaŋa mmɔ asaŋade akanade okuk, nte mme ubon mmɔ edide.

21Ndien mme obio esien nditɔ Benjamin, ke ubon, ke ubon, edi Jericho, ye Beth-hoglah, ye Emekkeziz.

22Ye Beth-arabah, ye Zemaraim,

23ye Beth-el, ye Avvim, ye Parah,

24ye Ophrah, ye Chephar-amoni, ye Ophni, ye Geba; obio duopeba, ye mme obio iŋwaŋ mmɔ:

25Gibeon, ye Ramah, ye Beeoth,

26ye Mizpeh, ye Chephirah,

27ye Mozab, ye Rekem, ye Irpeel,

28ye Taralah, ye Zelah, ye Eleph, ye Jebusite, enye edi Jerusalem, ye Gibeath, ye Kiriath; obio duopenaŋ ye mme obio iŋwaŋ mmɔ. Emi edi udeme nditɔ Benjamin nte mme ubon mmɔ esaŋade.