2 CHRONICLES 18 - Efik Old Bible With Sectional Headings

Micaiah Etiŋ Ete ke Eyekan Edidem Ahab ye Jehoshaphat ke Ekɔŋ

1EDIKEM Jehoshaphat enyene inyene ye ukpono ediwak, onyuŋ okoro ukot ye Ahab.

2Ekem ke utit ndusuk isua, enye ɔsuhɔre aka ke ɔtɔ Ahab ke Samaria. Ndien Ahab owot ediwak ŋkpri ufene ye enaŋ, ɔnɔ enye, ye ikɔt emi edude ye enye, onyuŋ esin enye ɔdɔk ke Ramoth-gilead.

3Ndien Ahab edidem Israel ɔdɔhɔ Jehoshaphat, edidem Judah, ete, Nte afo editiene mi aka ke Ramoth-gilead? Ndien enye (Jehoshaphat) ɔbɔrɔ enye, ete, Ami ndi nte afo; ye ikɔt mi nte ikɔt fo; ndien nyetiene fi ŋka ekɔŋ.

4Ndien Jehoshaphat ɔdɔhɔ edidem Israel, ete, Mbɔk bup uyo Jehovah mfin emi.

5Ndien edidem Israel obon mme prophet, owo ikie inaŋ, ndien ɔdɔhɔ mmɔ, ete, Nte nnyin idika ekɔŋ ke Ramoth-gilead, mme nditre? Ndien mmɔ edɔhɔ, ete, Dɔk: ndien Abasi eyeda enye esin edidem ke ubɔk.

6Ndien Jehoshaphat ɔdɔhɔ, ete, Nte prophet Jehovah iduhe aba mi, eke nnyin ikpebupde enye?

7Ndien edidem Israel ɔdɔhɔ Jehoshaphat, ete, Osuk kaŋa owo kiet eke nnyin ikpedade ibup Jehovah; edi mmasua enye; koro enye akanam mitiŋke eti prophecy ibaŋa mi, edi idiɔk kpukpru ini: enye edi Micaiah eyen Imla. Ndien Jehoshaphat adɔhɔ, ete, Edidem okudɔhɔ ntre.

8Ndien edidem Israel okot eunuch kiet, onyuŋ ɔdɔhɔ enye, ete, Wara ke kada Micaiah eyen Imla di.

9Ntre ke edidem Israel ye Jehoshaphat edidem Judah etie kiet ke ebekpo esie, kiet ke ebekpo esie, esine ɔfɔŋ-idem ubɔŋ, ndien mmɔ, etie ke aŋwa enyin-usuŋ Samaria; kpukpru prophet enyuŋ etiŋ prophecy ke iso mmɔ.

10Ndien Zedekiah eyen Chenaanah akanam nduk ukwak ke idem esie, onyuŋ ɔdɔhɔ ete, Ntem ke Jehovah ɔdɔhɔ ete, Afo eyeda mme mmɔ emi onuk Syria tutu osobo mmɔ ama.

11Kpukpru prophet enyuŋ etiŋ prophecy ntem, ete, Dɔk ke Ramoth-gilead, ndien afo eyekut unen: koro Jehovah eyeda enye esin edidem ke ubɔk.

12Ndien isuŋutom oro akakade ndikot Micaiah, eneme ye enye, ete, Sese, mme prophet ke etiŋ ikɔ, uyo kiet, enɔ edidem: mbɔk, ndien, yak ikɔ fo enyuŋ etie nte ikɔ owo mmɔ kiet, nyuŋ tiŋ se ifɔnde.

13Ndien Micaiah ɔdɔhɔ, ete, Ma uwem Jehovah, se Abasi mi edidɔhɔde mi nditreke oro nditiŋ.

14Ekem adaŋemi enye osimde edidem, edidem ɔdɔhɔ enye, ete, Micaiah, nte nnyin ika ekɔŋ ke Ramoth-gilead, mme ŋkuka? Ndien enye ete, Mbufo edɔk, ndien eyekut unen, eyenyuŋ eda mmɔ esin mbufo ke ubɔk.

15Ndien edidem ɔdɔhɔ enye, ete, Adaŋa ini ikafaŋ ke ami ndiwuk fi, nte okutiŋ ke mibɔhɔke akpanikɔ ke enyiŋ Jehovah ɔnɔ mi.

16Ndien enye ɔdɔhɔ ete, Ŋkokut ofuri Israel esuanade ke ikpɔ obot, nte ufene eke minyeneke andibɔk: ndien Jehovah ɔdɔhɔ ete, Mme mmɔ emi inyeneke andinyene; yak kpukpru owo efiak ke ufɔk mmɔ ke ifure.

17Ndien edidem Israel ɔdɔhɔ Jehoshaphat, ete, Nte ŋkɔdɔhɔke fi, nte ke enye iditiŋke eti prophecy ibaŋa mi, ke mibɔhɔke idiɔk?

18Ndien enye ɔdɔhɔ, ete, Mbufo ekop ndien uyo Jehovah; ŋkokut Jehovah etiede ke ebekpo esie, ndien ofuri udim enyɔŋ eda enye ke nnasia ye ke ufien.

19Ndien Jehovah obup, ete, Anie editap Ahab edidem Israel, man enye ɔdɔk ɔkɔduɔ ke Ramoth-gilead? Ndien kiet ɔdɔhɔ ntem, kiet eken onyuŋ ɔdɔhɔ ntem.

20Ekem spirit kiet oto edida ke iso Jehovah, onyuŋ ɔdɔhɔ, ete, Ami nyetap enye.

21Ndien Jehovah obup enye, ete, Ke nso? Ndien enye ɔbɔrɔ ete, Nyewɔrɔ ŋkedi spirit nso ke inua kpukpru prophet esie. Ndien Enye ete, Afo eyetap enye, eyenyuŋ ekeme: wɔrɔ, ka kanam ntre.

22Mmɔdo, sese, Jehovah amada spirit nsu esin mme prophet fo emi ke inua, Jehovah omonyuŋ ɔdɔhɔ idiɔk abaŋa fi.

23Ndien Zedekiah eyen Chenaanah asaŋa ekpere, ɔkɔtɔ Micaiah ke mfuk, onyuŋ ɔdɔhɔ, ete, Ke usuŋ ewe ke spirit Jehovah ɔkpɔŋ mi, ebe edidɔhɔ ye afo?

24Ndien Micaiah ɔdɔhɔ, ete, Sese, afo eyekut ke usen emi edidukde ke esit ubet okodibe.

25Ndien edidem Israel ɔdɔhɔ ete, Mbufo emum Micaiah, efiak esɔk Amon etubom obio, ye Joash eyen edidem; enyuŋ edɔhɔ ete,

26Ntem ke edidem ɔdɔhɔ ete, Mbufo, esin owo emi ke ufɔk ukwak, enyuŋ ebɔk enye ke udia nnanenyin, ye mmɔŋ nnanenyin, tutu ami mfiak ndi ke ifure.

27Ndien Micaiah ɔdɔhɔ, ete, Afo ama afiak ke ifure, Jehovah ikadaha inua mi idɔhɔ ikɔ. Enye onyuŋ ɔdɔhɔ, ete, Mbufo akpaimɔ ekop.

28Ekem edidem Israel ye Jehoshaphat edidem Judah edɔk eka ke Ramoth-gilead.

29Ndien edidem Israel ɔdɔhɔ Jehoshaphat, ete, Nyefuk idem nduk ke ekɔŋ: edi afo sine ɔfɔŋ-idem ubɔŋ fo. Ntre ke edidem Israel ofuk idem; ndien mmɔ eduk ke ekɔŋ.

30Ndien edidem Syria okowuk mme etubom chariot emi edude ye enye, ete, Mbufo ekuŋwana ye ŋkpri, ekunyuŋ eŋwana ye akamba, ke mibɔhɔke edidem Israel ikpɔŋ-ikpɔŋ.

31Edikem adaŋemi mme etubom mme chariot ekekutde Jehoshaphat, enyuŋ edɔhɔde, ete, Edidem Israel edi emi; ndien mmɔ ekan enye ekuk, ete iŋwana ye enye: edi Jehoshaphat ofiori, ndien Jehovah anyaŋa enye; Abasi onyuŋ esin mmɔ ekpɔŋ enye.

32Edikem adaŋemi mme etubom mme chariot ekutde ete ke idige edidem Israel, mmɔ efiak edem etre ndibine enye.

33Ekem owo kiet odudi utiga ikoho koi, etiga edidem Israel ke ɔtɔ isobo ŋkpɔ ikpanesit: ndien enye ɔdɔhɔ akama chariot esie, ete, Kabare ubɔk fo, nyuŋ da mi wɔrɔ ke ekɔŋ: koro ndade unan.

34Ndien ekɔŋ ɔdɔdiɔŋ ɔsɔŋ ubɔk ke usen oro: edi edidem Israel atuak ada ke chariot esie ke iso mme Syrian, tutu eyo okut; ekem enye akpa ke ini utin osopde.