ŊWED MBON ROME 14 - Efik Old Bible With Sectional Headings

1EDARA owo eke minyeneke ɔkpɔsɔŋ mbuɔtidem, edi ekuneni ebaŋa mme mfaŋa esit esie.

2Owo kiet enyene mbuɔtidem ndidia udia ekededi; edi owo eke mbuɔtidem esie misɔŋke adia ŋwup.

3Yak andidia okuse anditre ndidia ke mbio, anditre ndidia okunyuŋ ekpe ikpe ye andidia; koro Abasi ama adara enye.

4Afo edi anie emi ekpede ikpe ye owo ete eŋwen? Enye oro ɔsɔŋɔde ada, enye ada ɔnɔ ete esiemɔ; enye onyuŋ ɔduɔde, ɔduɔ ɔnɔ ete esiemɔ. Edi enye eyenyuŋ ɔsɔŋɔ ada, koro Ɔbɔŋ ekemede ndinam enye ɔsɔŋɔ ada.

5Owo kiet abat ete usen kiet edi ibet akan eken; edi owo eŋwen abat kpukpru usen ukem-ukem. Yak kpukpru owo kiet kiet obure se enye ekerede ɔfiɔk ke esit esie.

6Owo eke okponode usen okpono enye ɔnɔ Ɔbɔŋ: owo eke onyuŋ adiade ŋkpɔ adia ɔnɔ Ɔbɔŋ, koro enye ɔnɔde Abasi ekɔm: enye eke minyuŋ idiaha etre ndidia ɔnɔ Ɔbɔŋ, enye ŋko onyuŋ ɔnɔ Abasi ekɔm.

7Koro baba owo nnyin kiet iduhe uwem inɔ idem esie, baba owo kiet inyuŋ ikpaha inɔ idem esie.

8Koro edieke nnyin idude uwem, ke idu inɔ Ɔbɔŋ; onyuŋ edieke ikpade, ke ikpa inɔ Ɔbɔŋ; ye idude du ndien, ye inyuŋ ikpade kpa nnyin inyene Ɔbɔŋ.

9Koro Christ akakpa onyuŋ odu uwem abaŋa ŋkpɔ emi, man Enye ekpedi Ɔbɔŋ mme odu-uwem ye mme akpa-mkpa.

10Nsinam ndien afo ekpede ikpe ɔnɔ eyen-ete fo? mme nsinam afo esede eyen-ete fo ke mbio? Koro kpukpru nnyin iyeda ke iso itie-ikpe Abasi.

11Koro ewet ete,

Jehovah ete, Ma uwem Mi, kpukpru edɔŋ eyetɔŋɔ enɔ Mi,

Kpukpru edeme eyenyuŋ enɔ Abasi itoro.

12Mmɔdo ndien kpukpru nnyin kiet kiet iyebuk mbuk ibaŋa idem nnyin inɔ Abasi.

13Eyak nnyin ikukpe ikpe inɔ kiet eken aba. Edi ekam ebiere ntem, ete owo okunim ŋkpɔ iduɔ ke iso eyen-ete, okunyuŋ esin eyen-ete ɔduɔ.

14Mmɔdiɔŋɔ nnyuŋ mbure mfiɔk ke Ɔbɔŋ Jesus, nte, baba ŋkpɔ kiet ke idem esie idige ibet; edit edieke owo esede ŋkpɔ ke ibet edi ibet ɔnɔ enye.

15Koro edieke udia eke afo adiade anamde ŋkpɔ ɔdiɔk ye eyen-ete fo, afo usaŋake aba ke ima udu uwem. Kuda se afo adiade usobo owo emi Christ akakpade ke ibuot esie.

16Ekuyak etiŋ idiɔk ebaŋa nti ido mbufo;

17Koro Ubɔŋ Abasi idige edidia ŋkpɔ ye ediŋwɔŋ ŋkpɔ, edi edi edinen ido ye emem ye idaresit emi odude ke Edisana Spirit.

18Owo eke asaŋade ke oruk usuŋ emi anam ŋkpɔ ɔnɔ Christ, eneŋere enem Abasi esit, onyuŋ okut itoro ke ubɔk owo.

19Mmɔdo ndien eyak nnyin ibine ido eke enamde emem odu, ye ido eke nnyin ikemede ndida nnam kiet eken ɔkɔri ke uwem Abasi. Ekubiat ubɔk-utom Abasi ke ntak udia.

20Ke akpanikɔ kpukpru ŋkpɔ edi edisana, edi ifɔnke owo ndiwɔrɔ ndi ŋkpɔ-iduɔ ke ntak udia eke enye adiade.

21Ɔfɔn nditre ndita unam nnyuŋ ŋwɔŋ wine, nnyuŋ nnam ŋkpɔ ekededi eke esinde eyen-ete fo atuak ukot ɔduɔ.

22Mum se onimde ke akpanikɔ kama ke esit fo ke iso Abasi. Ɔfɔn ye enye eke mikopke nsua-nnɔ ke esit esie ibaŋa se enye adade ke eti ŋkpɔ.

23Edi edieke owo eke enyenede eyikhe ke esit esie adiade, enye enyene ubiom-ikpe, koro midige erinrim emi enye onimde ke akpanikɔ esin enye adia. Se ededi eke mitoho ke erinim ke akpanikɔ edi idiɔk-ŋkpɔ.