MME ŊKE 30 - Efik Old Bible With Sectional Headings

Mme Ŋke Agur eyen Jakeh

1UYO Agur eyen Jakeh; kpa prophecy. Owo oro ɔdɔhɔ Ithiel, kpa Ithiel ye Ucal:

2Ŋkɔm mmanana ibuot ŋkan owo, nnyuŋ nnyeneke mbufiɔk owo.

3Ŋkonyuŋ ŋkpepke ifiɔk, nnyuŋ mfiɔkke ifiɔk ata Edisana Abasi.

4Anie ɔdɔk ke enyɔŋ, ndien ɔsuhɔre? Anie ataŋ ofum esin ke eka-ubɔk esie? Anie ɔbɔp mmɔŋ ke ɔfɔŋidem? Anie ɔsɔŋɔ onim ofuri mme utit ererimbot? Nsidi enyiŋ esie? Nsinyuŋ idi enyiŋ eyen esie, koro afo ɔmɔfiɔk?

5Kpukpru se Abasi ɔdɔhɔde edi edisana: enye edi otu-ekɔŋ mmɔ eke ebuɔtde idem ye enye.

6Kuda ikɔ efen ukɔrɔ ke ikɔ esie, mbak enye edisua ɔnɔ fi, edinyuŋ abat fi ke osu-nsu.

7Mmebeŋe fi ŋkpɔ iba kusin mi ke mmeŋka-ŋkpaha kaŋa:

8Men mi abiaŋa ye ikɔ nsu ke idem fep, nim anyan ebiet: kunɔ mi ubuene, kunyuŋ unɔ mi inyene; bɔk mi ke udia udeme mi:

9Mbak ndiyuhɔ, ndien ŋkaŋ fi, ndien ndɔhɔ nte, Anie edi Jeho-vah? Mbak ndinyuŋ mbuene, ndien nyip inɔ, nnyuŋ nsuene enyiŋ Abasi mi.

10Kuyak ofin obuk ete esie, mbak enye edisuŋi fi, ndien afo edue isop.

11Emana odu eke esuŋide ete mmɔ, ndien mikɔmke eka mmɔ.

12Emana odu eke ebatde idem-mmɔ ke edisana, edi iyetke ndek mmɔ ifep.

13Emana odu: ekoŋ didie enyin mmɔ! Didie ke mmɔ etan enyin!

14Emana odu, emi edet mmɔ edide ofut, edet etak mbaŋ mmɔ enyuŋ edi ikwa, eke edade eta mbon-ukut ke isɔŋ efep, ye mme ubuene ke otu owo.

15Etuet enyene nditɔ-iban iba: “Nɔ, Nɔ.” Enyene ŋkpɔ ita eke misiyuhɔke: enyene inaŋ eke misidɔhɔde, ite,

16“Ekem”; Obio ekpo; ye edisiri ibidi; ye isɔŋ eke mmɔŋ miyuhɔke; ye ikaŋ emi misidɔhɔke, ite, “Ekem.”

17Ama edi enyin eke esuenede ete, onyuŋ esede eka ke ndek, minyuŋ ikopke uyo esie, mme raven ke itihere eyekɔŋ enye; nditɔ ntrukpom eyenyuŋ eta enye.

18Ŋkpɔ ita edu eke enyenede mi ndyɔ ekan: ye ŋkpɔ ŋkpɔ inaŋ eke mmemfiɔkke:

19Usuŋ ntrukpom ke ikpa-enyɔŋ; usuŋ urukikɔt ke enyɔŋ itiat; usuŋ ubom ke ufɔt akwa mmɔŋ; ye usuŋ erenowo ye eyen-aŋwan.

20Usuŋ aŋwan efibe etie ntre; enye adia, ndien ɔkwɔhɔre inua esiemɔ, ndien ɔdɔhɔ ete, “Nnamke idiɔk ido.”

21Ŋkpɔ ita esin isɔŋ enyek; ŋkpɔ inaŋ inyuŋ iyakke enye emenere:

22Ofin, ke ini enye adade ubɔŋ; ye ndisime owo, ke ini enye enyenede ediwak udia;

23Ŋwan usua, ke ini enye ɔdɔde ndɔ; ye ofin aŋwan, ke ini enye ɔbɔde eka esie itie.

24Enyene ŋkpɔ ita emi ekpride eti-eti ke isɔŋ; edi mmɔ enyene ibuot eti-eti.

25Iyɔŋ idige mkpɔsɔŋ mbio, ndien mmɔ ebon udia mmɔ ke nda-eyo.

26Mme cony edi mbio eke misɔŋke idem, ndien mmɔ enim ufɔk mmɔ ke otu itiat.

27Ŋkukuŋkpɔyɔriyɔ inyeneke edidem, edi mmɔ ebahare idem mmɔ kpukpru udim-udim ewɔŋɔ;

28Ukpɔŋ-eyen omum ŋkpɔ ke ubɔk mbiba; enye onyuŋ odu ke ufɔk mbɔŋ.

29Enyene ŋkpɔ ita eke eyede ikpat: kpa inaŋ eye isaŋ:

30Lion edi ɔkpɔsɔŋ ke otu mme unam, baba kiet inyuŋ isinke enye afiak edem;

31Ebua ubin-unam; ye okpo ebot; ye edidem eke owo baba kiet mibiɔŋɔke enye.

32Edieke afo anamde ebiɔ ke eritaŋ idem fo: edieke afo onyuŋ ekerede idiɔk, fuk ubɔk ke inua.

33Koro erifik mmɔŋ-eba anamde butter: erifik ibuo onyuŋ anam iyip ɔwɔrɔ: kpa ntre ŋko erifik iyaresit anam utɔk edi.