JUDGES 1 - Efik Old Bible With Sectional Headings

Esien Judah ye Esien Simeon Emum Adoni-bezek Ukad

1EDIKEM adaŋemi Joshua ama akakpa, nditɔ Israel ebup Jehovah, ete, Anie edibem iso ɔdɔk akaŋwana ekɔŋ ye mme Canaanite ɔnɔ nnyin?

2Ndien Jehovah ɔbɔrɔ ete, Judah eyedɔk: sese, mmada isɔŋ emi nsin enye ke ubɔk.

3Ndien Judah ɔdɔhɔ Simeon eyen-ete esie, ete, Tiene mi dɔk ke udeme mi, man nnyin ikeŋwana ekɔŋ ye mme Canaanite, ndien ami ŋko nyetiene fi ŋka ke udeme fo. Ndien Simeon etiene enye aka.

4Ntre Judah ɔdɔk; ndien Jehovah ada mme Canaanite ye mme Perizzite esin mmɔ ke ubɔk: ndien mmɔ ewot mmɔ tɔsin owo duop ke Bezek.

5Mmɔ enyuŋ ekut Adoni-bezek ke Bezek; ndien eŋwana ekɔŋ ye enye, enyuŋ ewot mme Canaanite ye mme Perizzite.

6Ndien Adoni-bezek efehe; ndien mmɔ ebine enye emum, ndien ekpok enye obodom nnuenubɔk ye obodom nnuenukot.

7Ndien Adoni-bezek ɔdɔhɔ, ete, Ndidem ata ye duop, emi ekekpokde mmɔ obodom nnuenubɔk ye obodom nnuenukot etetaŋ ŋkpɔ ke idak okpokoro mi: kpa nte ŋkanamde, kpa ntre ke Abasi onyuŋ anam mi usiene. Ndien mmɔ eda enye edi ke Jerusalem, ndien enye akpa do.

8Ndien nditɔ Judah eŋwana ekɔŋ ye Jerusalem, enyuŋ eda enye, enyuŋ esuan enye ke iso ofut, ndien ekimikaŋ ke obio.

9Ndien, ekem, nditɔ Judah esuhɔre eka ndiŋwana ekɔŋ ke mme Canaanite emi eduŋde ke ikpɔ obot, ye ke usuk, ye ke una-isɔŋ edem inyaŋ.

10Ndien Judah aka ekɔŋ ye mme Canaanite emi eduŋde ke Hebron: ndien enyiŋ Hebron ekebem iso ekere Kiriath-arba: ndien mmɔ ewot Sheshai, ye Ahimam, ye Talmai.

11Ndien enye oto do aka ekɔŋ ye mme ndiduŋ Debir: ndien enyiŋ Debir ekebem iso ekere Kiriath-sepher (obio ŋwed).

12Ndien Caleb ɔdɔhɔ ete, Owo ama asuan Kiriath-sepher, onyuŋ ada enye, nyenɔ enye Achsah eyen mi aŋwan ɔdɔ.

13Ndien Othniel eyen Kenaz, ekpri eyen-ete Caleb, ada enye: ndien enye (Caleb) ada Achsah eyen esie aŋwan ɔnɔ enye ɔdɔ.

14Ndien edikem ke ini enye edide, enye onuk ebe, ete ebeŋe ete imɔ iŋwaŋ: ndien enye (ŋwan) odorore ke edem ass; ndien Caleb obup enye, ete, Afo oyom nso?

15Ndien enye ɔbɔrɔ enye, ete, Nɔ mi eti ŋkpɔ: koro afo ɔmɔnɔ mi edisat isɔŋ; nɔ mi idim mmɔŋ ŋko. Ndien Caleb ɔnɔ enye idim ke obot ye idim ke usuhɔre.

16Ekem, nditɔ mme Kenite, ukot Moses, eto ke obio eyop, esaŋa ye nditɔ Judah edɔk eka ke wilderness Judah, emi anade ke edem usuk-usuk Arad; ndien mmɔ eka ekeduŋ ye mbio oro.

17Ndien Judah etiene Simeon eyen-ete esie aka, ndien mmɔ esuan mme Canaanite emi eduŋde ke Zephath, enyuŋ esobo mmɔ fap.

18Ndien enyiŋ obio oro ekere Hormah. Ndien Judah ada Gaza ye adaŋa esie, ye Ashkelon ye adaŋa esie, ye Ekron ye adaŋa esie.

19Ndien Jehovah odu ye Judah; ndien enye ada edem obot enyene; koro enye mikwe nte osioŋode mme andiduŋ itihere efep, koro mmɔ enyenede chariot ukwak.

20Ekem mmɔ eda Hebron enɔ Caleb, kpa nte Moses ɔkɔdɔhɔde: ndien enye osio nditɔ Anak ita efep ke esit.

21Edi nditɔ Benjamin ibinke mme Jebusite emi eduŋde ke Jerusalem, ifep; edi mme Jebusite eduŋ ke otu nditɔ Benjamin ke Jerusalem tutu osim mfin emi.

22Ndien ufɔk Joseph ŋko edɔk eka ekɔŋ ye Bethel: Jehovah onyuŋ odu ye mmɔ.

23Ndien ufɔk Joseph edɔŋ ekeyep Bethel: ndien enyiŋ obio oro ekebem iso ekere Luz.

24Ndien mbon-uyep ekut owo ɔwɔrɔde ke obio, ndien mmɔ edɔhɔ enye, ete, Mbɔk, wut nnyin usuŋ uduk obio, ndien nnyin iyefɔn ido ye afo.

25Ndien adaŋemi enye okowutde mmɔ usuŋ uduk obio, mmɔ esuan obio ke iso ofut; edi eyak owo oro ye ofuri ufɔk esie eka.

26Ndien owo oro aka ke isɔŋ mme Hittite, ɔkɔbɔp obio, enyuŋ osio enye enyiŋ Luz: oro odi enyiŋ esie tutu osim mfin emi.

27Ndien Manasseh ŋko idaha Beth-shean ye mme obio iŋwaŋ esie inyene, ye Taanach ye mme obio iŋwaŋ esie, inyuŋ isioho mme adiduŋ Dor ye mme obio iŋwaŋ esie, ye mme andiduŋ Ibleam ye mme obio iŋwaŋ esie, ye mme andiduŋ Megiddo ye mme obio iŋwaŋ esie; edi mme Canaanite ekeduak ndiduŋ ke isɔŋ oro.

28Ndien, edikem, adaŋemi Israel esɔŋde odudu, mmɔ enam mme Canaanite, etomo utomo, edi ibɔhɔ mmɔ itie.

29Ephraim inyuŋ isioŋoke mme Canaanite emi eduŋde ke Gezer ifep; edi mme Canaanite eduŋ ke Gezer ke otu mmɔ.

30Zebulun inyuŋ isioŋoke mme adiduŋ Kitron, ye mme andiduŋ Nahalol ifep; edi mme Canaanite eduŋ ke otu mmɔ, enyuŋ ekabare edi mbon utomo.

31Asher inyuŋ isioŋoke mme andiduŋ Acco, ye mme andiduŋ Zidon, ye eke Ahlab, ye eke Achzib, ye eke Helbah, ye eke Aphik,

32ye eke Rehob ifep; edi nditɔ Asher eduŋ ke otu mme Canaanite emi eduŋde ke isɔŋ oro: koro misioŋoke mmɔ ifep.

33Naphtali inyuŋ isioŋoke mme andiduŋ Beth-shemesh, ye mme andiduŋ Beth-anath ifep; edi mɔ eduŋ ke otu mme Canaanite emi eduŋde ke isɔŋ oro: edi mme andiduŋ Beth-shemesh ye Beth-anath ekabare etomo mmɔ utomo.

34Ekem mme Amorite efik nditɔ Dan esin ke obot: koro miyakke mmɔ esuhɔre ke itihere.

35Mme Amorite enyuŋ eduak ndiduŋ ke obot Heres ke Aijalon, ye ke Shaalbim: edi ubɔk ufɔk Joseph odobi, ndien mmɔ oro ekabare etomo utomo.

36Ndien adaŋa mme Amorite ɔtɔŋɔ ke obot Akrabbim, ke akwa itiat, ɔdɔdɔk.