2 NDIDEM 10 - Efik Old Bible With Sectional Headings

Ewot Nditɔ Ahab

1NDIEN nditɔ Ahab owo ata ye duop edu ke Samaria. Ekem Jehu ewet ŋwed ɔnɔ esɔk mme etubom Jezreel ke Samaria, ye mbiowo, ye mme andibɔk ubon Ahab,

2ete, Ke ini ŋwed emi edisimde mbufo, sia nditɔ ɔbɔŋ mbufo edu ye mbufo; chariot, ye horse, ye obio ibibene, ye ŋkpɔ-ekɔŋ, enyuŋ edu ye mbufo ŋko;

3mbufo eyom, ndien owo eke ɔfɔnde, onyuŋ enende, ke otu nditɔ ɔbɔŋ mbufo, enyuŋ edori enye ke ebekpo ete esie, enyuŋ eŋwana ekɔŋ enɔ ufɔk ɔbɔŋ mbufo.

4Edi ndik anam mmɔ eti-eti; ndien mmɔ edɔhɔ ete, Sese, ndidem iba ikadaha enye ke iso; nnyin idinam didie ndien ida?

5Ndien etubom ufɔk, ye etubom obio, ye mbiowo, ye mme andibɔk, edɔŋ ekedɔhɔ Jehu, ete, Nnyin idi ikɔt fo, iyenyuŋ inam kpukpru se afo edidɔhɔde nnyin; nnyin idinimke baba owo kiet ke edidem: nam se ifɔnde fi ke enyin.

6Ndien enye ɔtɔŋɔ ntak ewet ŋwed ɔnɔ esɔk mmɔ, ete, Edieke mbufo edade ye ami, enyuŋ ekopde uyo mi, mbufo eda mbuot mbon oro, kpa nditɔ ɔbɔŋ mbufo, etiene mi ke Jezreel, ke adaŋa ini ntem mkpɔŋ. Ntre nditɔ edidem, owo ata ye duop, edu ye ikpɔ owo obio emi ebɔkde mmɔ.

7Edikem ke ini ŋwed oro osimde mmɔ, mmɔ eda nditɔ edidem ewot owo ata ye duop, enyuŋ esin mbuot mmɔ ke akpan, enɔ esɔk enye ke Jezreel.

8Ekem isuŋutom kiet edi editiŋ ɔnɔ enye, ete, Emeda mbuot nditɔ edidem edi. Ndien enye ɔdɔhɔ ete, Mbufo ekubi mmɔ ke otu iba ke inua-otop, tutu eyo esiere.

9Edikem ke eyo esierede, enye ɔwɔrɔ akada, onyuŋ ɔdɔhɔ kpukpru owo, ete, Mbufo emenen: sese, ami ŋkoduk odu mbaŋa ete mi, ŋkonyuŋ ŋwot enye: edi anie okowot kpukpru mme mmɔ emi?

10Mbufo efiɔk, ndien, ete ke baba ikɔ Jehovah kiet, emi Jehovah ɔkɔdɔhɔde abaŋa ufɔk Ahab iduɔhɔ ke isɔŋ: edi Jehovah amanam se enye ɔkɔdɔhɔde ke inua Elijah owo esie.

11Ntem ke Jehu owot kpukpru owo ufɔk Ahab eke esuhɔde ke Jezreel, ye kpukpru ikpɔ owo esie, ye mme ɔdiɔŋɔ esie, ye mme oku esie, tutu ikpɔŋke ndomo owo kiet inɔ enye.

12Ekem enye adaha ke enyɔŋ aka Samaria. Enye osim ke ufɔk oro mme ɔbɔp-erɔŋ ebɔpde erɔŋ ke usuŋ.

13Ndien Jehu osim nditɔ-ete Ahaziah edidem Judah, onyuŋ obup ete, Mbufo edi mme anie? Ndien mmɔ ebɔrɔ ete, Nnyin idi nditɔ-ete Ahaziah; imɔŋ inyuŋ isuhɔre ika ndikɔm nditɔ edidem ye nditɔ aŋwan edidem.

14Ndien enye ɔdɔhɔ ete, Mbufo emum mmɔ ye uwem. Ndien emum mmɔ ye uwem, enyuŋ ewot mmɔ ke ɔtɔ obube ufɔk ubɔp-erɔŋ, owo aba ye iba; inyuŋ ikpɔŋke baba owo mmɔ kiet.

15Ekem adaŋemi enye adahade do, enye osim Jehonadab eyen Rechab emi ɔbiɔŋɔrede enye: ndien ɔkɔm enye, onyuŋ ɔdɔhɔ enye, ete, Nte esit fo enen, nte esit mi ye esit fo? Ndien Jehonadab ɔdɔhɔ ete, “Ke edi ntre”. “Ama edi ntre, nɔ mi ubɔk fo”. Ndien enye ɔnɔ enye ubɔk esie; Jehu onyuŋ anam enye ɔdɔk ke chariot adian idem.

16Enye onyuŋ ɔdɔhɔ ete, Saŋa ye ami, nyuŋ se ufup mi emi mfibede nnɔ Jehovah. Ntre ke enye anam enye odoro ke chariot esie.

17Ekem adaŋemi enye osimde ke Samaria, enye owot kpukpru ikɔt Ahab emi esuhɔde ke Samaria, tutu atak enye ama, ke uyo Jehovah oro enye eketiŋde ɔnɔ Elijah.

18Ekem Jehu obon kpukpru mbio-obio, onyuŋ ɔdɔhɔ mmɔ, ete, Ahab akanam ŋkpɔ Baal esisit, edi Jehu eyenam ŋkpɔ ɔnɔ enye eti-eti.

19Mbufo ekot, ndien, kpukpru mme prophet Baal, kpukpru ikɔt esie, ye kpukpru oku esie, enɔ mi; baba owo kiet okutre ndidi: koro nnyenede ndiwa akamba uwa nnɔ Baal; owo eke etrede ndidi ididuhe uwem. Edi Jehu anam ke ŋkari, man enye osobo ikɔt Baal.

20Ekem Jehu ɔdɔhɔ ete, Mbufo enim usɔrɔ enɔ Baal. Ndien mmɔ ekwɔrɔ.

21Jehu onyuŋ ɔtɔt ofuri Israel: ndien kpukpru ikɔt Baal edi, inyuŋ isukke baba owo kiet eke midige. Ndien mmɔ eduk ke ufɔk Baal; enyuŋ eyɔhɔ ke ufɔk Baal kpak.

22Ndien enye ɔdɔhɔ owo emi akamade edisine-ŋkpɔ, ete, Sio edisine-ŋkpɔ nɔ kpukpru ikɔt Baal. Ntre ke enye osio edisine-ŋkpɔ ɔnɔ mmɔ.

23Ekem Jehu oduk ke ufɔk Baal, ye Jehonadab eyen Rechab, onyuŋ ɔdɔhɔ ikɔt Baal, ete, Mbufo eduŋɔ ese, mbak usuk ikɔt Jehovah edidu mi ke otu mbufo, ke mibɔhɔke ikɔt Baal ikpɔŋ-ikpɔŋ.

24Ekem mmɔ eduk ndifɔp uwa emem ye edifɔp uwa, ndien Jehu ada owo anaŋ onim do ke edem esien, ete, Edieke owo ayakde owo mme mmɔ emi ami nsinde mbufo ke ubɔk ebɔhɔ, uwem esie eyeka ke uwem owo oro.

25Edikem adaŋemi enye ama ɔkɔfɔp uwa ama, Jehu ɔdɔhɔ mbon-itɔk ye mme andikpeme, ete, Mbufo eduk ekewot mmɔ; ekuyak baba owo kiet ɔwɔrɔ. Ntem ke mmɔ ewot mmɔ ke iso ofut; ndien mbon-itɔk ye mme andikpeme esioŋo mmɔ eduɔŋɔ.

26Ndien mmɔ eduk ke ɔkpɔsɔŋ ebiet ufɔk Baal; ekesioŋo mbio-eto ufɔk Baal, efɔp;

27enyuŋ ebom mme adaha Baal, enyuŋ ewuri ufɔk Baal, ndien enim enye ke ufɔk-ekwe tutu osim mfin emi.

28Ntre ke Jehu osobo Baal ke Israel efep.

29Edi ama edi mme idiɔk-ŋkpɔ Jeroboam eyen Nebat, emi enye akadade anam Israel edue, Jehu ikabakede ikpɔŋ mmɔ, kpa nditɔ-enaŋ o gold oro edude ke Bethel, ye eke edude ke Dan.

30Ekem Jehovah ɔdɔhɔ Jehu, ete, Koro afo ama okotim anam se inende ke iso mi, ama okonyuŋ anam se idude mi ke esit, ɔnɔ ufɔk Ahab, ubon fo ke ɔyɔhɔ emana inaŋ eyetie ke ebekpo Israel.

31Edi Jehu itimke ndisaŋa ke mbet Jehovah Abasi Israel ke ofuri esit esie: enye ikabakede ikpɔŋ idiɔk ido Jeroboam, emi akanamde Israel edue.

32Ke ini oro Jehovah ɔtɔŋɔ ndisibe ubak Israel mfep: ndien Hazael akan mmɔ ke kpukpru adaŋa Israel:

33ɔtɔŋɔde ke Jordan ke edem usiaha-utin, kpa ofuri isɔŋ Gilead, nditɔ Gad, ye eke Reuben, ye eke Manasseh, ɔtɔŋɔde ke Aroer, emi odude ke itihere Arnon, kpa Gilead ye Bashan.

34Ndien ama edi ikɔ Jehu eŋwen, ye kpukpru se enye akanamde, ye ofuri uko esie, nte ikewetke mmɔ isin ke ŋwed ikɔ eyo ndidem Israel?

35Ekem Jehu ɔsuhɔre ana ye mme ete esie ede: ndien ebuk enye ke Samaria.

36Ndien Jehoahaz eyen esie ada ubɔŋ ke itie esie. Ndien ini emi Jehu edide edidem Israel ke Samaria edi isua edip ye itiaita.