ŊWED MME PSALM 68 - Efik Old Bible With Sectional Headings

Ikwɔ EdikanEke etubom mbon ikwɔ. Psalm David. Ikwɔ.

1ABASI eyedaha ada, mme asua esie eyesuana: mbon-utɔk esie eyenyuŋ efeŋe ke iso esie.

2Afo eyesuan mmɔ kpa nte nsuŋikaŋ asuanade: kpa nte mbukpa ɔkwɔk atarade ke iso ikaŋ, eyesobo mme idiɔk owo ke iso Abasi.

3Ndien nti owo eyedara; mmɔ eyesio mkpo ke iso Abasi: enyuŋ ebre ke idaresit.

4Mbufo ekwɔ enɔ Abasi, etoro enyiŋ esie. Ediɔŋ usuŋ enɔ enye emi odorode (chariot) asaŋa ke wilderness: enyiŋ esie edi Jah, mbufo enyuŋ ebem enye iso ebre.

5Abasi edi ete nditɔ-akpa, ye ebierikpe mme ebe-akpa, ke edisana iduŋ esie.

6Abasi anam ikpɔŋ owo eduŋ ke ufɔk: osio mbon ŋkpɔkɔbi ɔnɔ inyene: edi mbon nsɔŋibuot ikpɔŋ eduŋ ke nsat isɔŋ.

7O Abasi, ke ini afo ekebemde ikɔt fo iso ɔwɔrɔ, ke ini afo asaŋade ke wilderness.

8Isɔŋ enyek, ikpa-enyɔŋ ŋko ɔtɔi ke iso Abasi: Sinai oro (enyek) ke iso Abasi, Abasi Israel.

9Afo Abasi anam edim enɔ-ima edep: ama edi udeme fo, ke ini enye ɔkpɔtde, afo ɔsɔŋ enye idem.

10Esop ikɔt fo eduŋ ke esit: O Abasi, afo eyeda ufɔn fo otim ŋkpɔ ɔnɔ mme ubuene.

11Ɔbɔŋ ɔnɔ uyo: ibat emi ekwɔrɔde edi akamba udim.

12Ndidem mbon-ekɔŋ eyefeŋe, eyefeŋe, ndien ŋwan eke osukde ke ufɔk eyebahare mbume.

13Ke ini mbufo enade suŋ ke esit mme ebiet ufene, (mbufo eyebiet) mba ibiom eke ɔduɔkde idaŋ, ntaŋ esie onyuŋ ɔduɔk uto-uto mmɔŋ okuk.

14Ke ini Ata Ɔkpɔsɔŋ asuande ndidem ke esit, snow ofuk Salmon.

15Obot a-Bashan edi obot Abasi; obot a-Bashan enyene ediwak nsom.

16Mbufo ikpɔ obot, mbufo nsom, enam didie etie ekpeme obot emi Abasi amade ndiduŋ ke esit; ŋkɔm Jehovah eyetie do ke nsinsi.

17Mme chariot Abasi edi tɔsin edip, ye utɔŋɔ ntak tɔsin tɔsin:

18Ɔbɔŋ odu ke otu mmɔ; Sinai odu ke edisanan ebiet. Afo ɔkɔdɔk ke enyɔŋ, ataŋ mbuot ekɔŋ ɔnyɔŋ: ɔbɔ enɔ ke otu owo; ye ke otu mbon nsɔŋ-ibot ŋko-ŋko, man afo oduŋ do, O Jehovah Abasi.

19Ekɔm Ɔbɔŋ kpukpru usen; owo ada mbiomo odori nnyin ke idem, Abasi edi erinyaŋa nnyin.

20Abasi edi Abasi emi anyaŋade nnyin; ndien ubɔhɔ mkpa enyene Jehovah Ɔbɔŋ.

21Edi Abasi edisuan ibuot mme asua esie, kpa idet-idet mkpɔkpɔrɔ enye emi asaŋade ke mme idiɔk ido esie.

22Ɔbɔŋ ɔdɔhɔ ete, Nyeda (mmɔ) ke Bashan mfiak ndi: nyeda (mmɔ) ke udem inyaŋ mfiak ndi:

23man afo anuak mmɔ esin ukot fo ke iyip, man edeme ebua fo ada udeme esie ke mme asua.

24Mmɔ ekekut mme isaŋ fo, O Abasi, kpa isaŋ Abasi ye eke edidem mi ke edisana ebiet.

25Mme ɔkwɔ-ikwɔ ebem iso, mme ebre-ndido etiene, ke otu nditɔ iban emi emiade ekɔmɔ.

26Mbufo ekɔm Abasi ke otu mbon-esop, mbufo emi etode ke idim Israel, etoro Ɔbɔŋ.

27Benjamin eyenɔŋwɔŋ, andikara mmɔ, odu do mbɔŋ Judah, ye udim mmɔ, ye mbɔŋ Zebulun, ye mbɔŋ Naphtali.

28Abasi fo omowuk odudu fo: sɔŋ idem, O Abasi, emi anamde ŋkpɔ emi ɔnɔ nnyin.

29Ndidem eyeda enɔ esɔk fi, ebaŋa temple fo ke enyɔŋ Jerusalem.

30Duat unam nnyanyaŋa, ye udim mkpɔsɔŋ ayara enaŋ, ke otu nditɔ enaŋ mme idut, emi edade mbak silver edinuhɔ: enye amasuan mme idut eke emade ekɔŋ.

31Mbɔŋ eyeto ke Egypt edi, Ethiopia eyesɔp edi edinɔ Abasi ubɔk esie.

32Mbufo, mme idut ererimbot, ekwɔ enɔ Abasi; O, mbufo ekwɔ enɔ Ɔbɔŋ.

33Ekwɔ enɔ Enye emi odoroke ke akani enyɔŋ eset; sese, Enye ke osioro uyo, ɔkpɔsɔŋ uyo.

34Mbufo enɔ Abasi odudu: ubom esie odoro Israel; odudu esie onyuŋ odu ke ikpa-enyɔŋ.

35O Abasi, afo emenyene ndik ke edisana ebiet fo: ke edi Abasi Israel ɔnɔ ikɔt esie nsɔŋ-idem ye odudu. Ekɔm Abasi.