1NYEKWƆ ima Jehovah ke nsinsi: nyeda inua mi mbuk akpanikɔ fo ke ofuri emana.
2Koro ndɔhɔde nte, Ima eyesɔŋɔ ada ke nsinsi: afo eyewuk akpanikɔ fo ke idem heaven.
3Mmodiomi ediomi ye owo emi mmekde, mmɔŋwɔŋɔ nnɔ David owo mi.
4Mmomum ubon fo ŋkama ke nsinsi, nnyuŋ nnam ebekpo fo ɔsɔŋɔ ada ke ofuri emana.
5Ndien ikpa-enyɔŋ otoro utibe ŋkpɔ fo, O Jehovah, ye akpanikɔ fo ŋko ke esop ndisana owo.
6Koro anie ke ikpa-enyɔŋ ekem ye Jehovah? Anie ke otu nditɔ ikpɔ owo ebiet Jehovah?
7Abasi ekpenyene uteŋe ke odu ndisana owo; ndik esie okonyuŋ odoro kpukpru owo eke ekande enye ekuk.
8O Jehovah, Abasi mme udim, anie ɔsɔŋɔ nte afo, Jehovah?
9Akpanikɔ fo onyuŋ akan fi okuk. Afo ke akan iseri inyaŋ: ke ini enye otopde odut, afo osuk mmɔ.
10Afo amanuak Rahab, nte owo eke akpade afai; ada ɔkpɔsɔŋ ubɔk fo asuan mme asua fo.
11Enyɔŋ edi okuo, isɔŋ onyuŋ edi okuo: ama onyuŋ edi obot ye se iyɔhɔde ke esit, afo onyuŋ onim mmɔ ke itie.
12Afo okobot edere ye usuk: Tabor ye Hermon esio mkpo idara enɔ enyiŋ fo.
13Afo emenyene ubɔk odudu: ubɔk fo ɔmɔsɔŋ, nnasia fo omokoŋ.
14Edinen ido ye ikpe edi itie ebekpo fo: ima ye akpanikɔ eyebem fi iso esaŋa.
15Ɔfɔfɔn ɔnɔ mmɔ eke efiɔkde mkpo idara: O Jehovah, mmɔ eyesaŋa ke uŋwana iso fo.
16Eyedara enyiŋ fo ofuri usen; edinen ido fo eyenyuŋ emenere mmɔ onim ke enyɔŋ.
17Koro afo edide ubɔŋ odudu mmɔ: mfɔnido fo eyenyuŋ emenere nduk nnyin ke
18enyɔŋ. Koro otu-ekɔŋ nnyin enyenede Jehovah; edidem nnyin onyuŋ enyene Edisana Abasi Israel.
19Ke ini oro afo ɔkɔdɔhɔde ye mbon-ima fo ke ŋkukut, ete, Mmada erinyaŋa ndori owo uko ke idem; mmosio ata owo ke otu mbio-obio mmenere nnim ke enyɔŋ.
20Mmokut David owo mi: mmeyet enye ke edisana aran mi;
21emi ita mi edidade ye enye: ubɔk mi eyenyuŋ anam enye ɔsɔŋɔ.
22Usua idikpakke enye; eyen idiɔk idinyuŋ itukke enye.
23Ndien ami nyetɔ mme asua esie nduɔk enye ke iso, nnyuŋ nyibi mbon-utɔk esie.
24Edi akpanikɔ mi ye ima mi eyeda ye enye; enyiŋ mi eyenyuŋ emenere nduk esie onim ke enyɔŋ.
25Ndien nyesin ubɔk esie ke inyan, ye nnasia esie ke mme akpa-mmɔŋ.
26Enye eyeseme okot mi, ete, Afo edi ete mi ye Abasi mi, ye akwa itiat erinyaŋa mi.
27Ndien ŋko nyenim enye ke akpan, okoŋ akan ndidem isɔŋ.
28Nyenim ima mi ye enye ke nsinsi, ediomi mi eyenyuŋ ɔsɔŋ ada ye enye.
29Nyenyuŋ nnim ubon esie ke nsinsi, ye ebekpo esie nte mme usen heaven.
30Nditɔ esie ema ekpɔŋ ewuhɔ mi, ndien misaŋake ke mme item mi;
31ema ebiat mbet mi, ndien minimke ido mi;
32nyeda ndien eto mmia mmɔ ke mme ukwaŋ-ŋkpɔ mmɔ, nnyuŋ nda ikpa mmia mmɔ ke oburobut ido mmɔ.
33Edi ndibɔhɔ enye ima mi, ndinyuŋ mbiatke akpanikɔ mi.
34Ndibiatke ediomi mi, ndinyuŋ ŋkpuhɔke se iwɔrɔde mi ke inua.
35Ŋkɔŋwɔŋɔ ŋkpɔ kiet ke edisana ido mi, ndisuhe nsu nnɔ David.
36Ubon esie eyedu ke nsinsi; ebekpo esie eyebigi nte utin ke iso mi.
37Eyesɔŋɔ ada nte ɔfiɔŋ ke nsinsi, ye nte ntiense akpanikɔ ke ikpa-enyɔŋ.
38Edi afo ememen ɔduɔk, omonyuŋ esin: afo ayat esit ye owo fo emi afo eyetde aran.
39Amabiat ediomo owo fo: omonyuŋ asabare anyanya esie ke ntan.
40Omobuŋ kpukpru mme ɔkɔ esie; onyuŋ onim mkpɔsɔŋ ebiet esie ke ŋwure.
41Kpukpru mmɔ eke esaŋade ke usuŋ ebe ebume enye: enye edi se mbɔhiduŋ esie esuenede.
42Afo ememenere ubɔk nnasia mme asua esie onim ke enyɔŋ; amanam kpukpru mme asua esie edat esit.
43Afo ŋko omotip iso ofut esie, unyuŋ uyakke enye ɔsɔŋ ada ke ekɔŋ.
44Amanam enye etre ndinyene ubɔŋ esie, onyuŋ ɔduɔk ebekpo esie ke isɔŋ.
45Afo amakpaha ini uyen esie: omonyuŋ ada but ofuk enye.
46Adaŋa didie, O Jehovah? Nte afo edidibe ke nsinsi?
47Nte iyaresit fo edisak nte ikaŋ? Ti nte eyo uwem mi etiede: nsinam afo obotde kpukpru nditɔ owo ke ikpikpu?
48Anie owo edidu uwem, idinyuŋ ikwe mkpa? Edinam ukpɔŋ esie ɔbɔhɔ udi ke ubɔk?
49Ɔbɔŋ, enye akani ima fo, emi afo ɔkɔŋwɔŋɔde ɔnɔ David owo fo ke akpanikɔ?
50O Ɔbɔŋ, ti esuene ikɔt fo; nte mbiomde ofuri ediwak mme idut ke ikpanesit mi;
51emi mme asua fo edade esuene, O Jehovah; emi mmɔ edade esuene ikpat ukot Messiah fo.
52Mbufo ekɔm Jehovah ke nsinsi. Amen ye Amen.
Who We AreWhat We EelieveWhat We Do
2025 by iamachristian.org,Inc All rights reserved.
