1 CHRONICLES 4 - Efik Old Bible With Sectional Headings

Mme Nditɔ-Iren Judah

1NDITƆ-IREN Judah; Pherez, ye Hezron, ye Carmi, ye Hur, ye Shobal.

2Ndien Reaiah eyen Shobal obon Jahath; Jahath onyuŋ obon Ahumai, ye Lahad. Mme mmɔ emi edi ubon mme-Zorathite.

3Ndien mme mmɔ emi edi nditɔ-ete Etam; Jezreel, ye Ishma, ye Idbash: ndien enyiŋ eyen ete mmɔ eŋwan ekere Hazzelelponi.

4Ye Penuel ete Gedor, ye Ezer ete Hushah. Mme mmɔ emi edi nditɔ Hur, akpan Ephrathah, ete Beth-lehem.

5Ndien Ashhur ete Tekoa ɔdɔ iban iba, Helah ye Naarah.

6Ndien Naarah aman Ahuzzam ɔnɔ enye, ye Hepher, ye Temeni, ye Haahashtari.

7Mme mmɔ emi edi nditɔ Naarah. Ndien nditɔ Helah edi Zereth, ye Izhar, ye Ethnan.

8Ndien Hakkoz obon Anub, ye Zobebah, ye ufɔk Aharhel eyen eren Harum.

9Ndien Jabez enyene ukpono akan nditɔ-ete esie: eka esie onyuŋ osio enye enyiŋ Jabez, ete, Koro mmande enye ke ubiak.

10Ndien Jabez eseme ɔnɔ Abasi Israel, ete, Afo akpakam ɔdioŋ mi, onyuŋ anam adaŋa mi okpon, ubɔk fo onyuŋ odu ye ami, afo onyuŋ akpan idiɔk-ŋkpɔ, ete okuyat mi! Ndien Abasi ada se enye ekebeŋede ɔsɔk enye.

11Ndien Chelub eyen-ete Shuhah obon Mehir emi ekedide ete Eshton.

12Ndien Eshton obon Beth-rapha, ye Paseah, ye Tehinnah ete Ir-nahash. Mme mmɔ emi edi mbio Recah.

13Nditɔ iren Kenaz ŋko; Othniel ye Seraiah: nditɔ Othniel ŋko; Hathath.

14Ndien Meonothai obon Ophrah: Seraiah onyuŋ obon Joab, ete Ge-harashim; koro mmɔ edide mbon-usɔ.

15Nditɔ Caleb eyen Jephunneh ŋko; Iru, ye Elah, ye Naam: ye nditɔ Elah ŋko, kpa Kenaz.

16Ndien nditɔ Jehallelel; Ziph, ye Ziphah, ye Tiria, ye Asarel.

17Nditɔ Ezrah ŋko edi Jether, ye Mered, ye Epher, ye Jalon: ndien enye (ŋwan) aman Miriam, ye Shammai, ye Ishbah, ete Eshtemoa.

18Ndien ŋwan esie Ha-jehudijah aman Jered ete Gedor, ye Heber ete Soco, ye Jekuthiel ete Zanoah. Mme mmɔ emi ŋko edi nditɔ Bithiah eyen Pharaoh aŋwan, emi Mered ɔkɔdɔde.

19Nditɔ Hodiah ŋwan esie, eyen ete Naham, ete Keilah Garmite, ye Eshtemoa Maacathite.

20Ndien nditɔ Shimon edi Amnon, ye Rinnah, ye Ben-hanan, ye Tilon. Nditɔ Ishi ŋko edi Zoheth, ye Ben-zoheth.

21Nditɔ Shelah eyen Judah edi Er ete Lecah, ye Laadah, ete Mareshah, ye ubon ufɔk mme anam eti linen, ke ufɔk Ashbea; ye Jokim, ye mbio Cozeba,

22ye Joash, ye Saraph, emi ekenyenede Moab, ye Jashubi-lehem. Edi ikɔ emi edi akani. Mme mmɔ emi edi mme obot eso,

23ye mme oduŋ ke Netaim ye Gederah: mmɔ eduŋ do ye edidem, man enam utom esie.

24Nditɔ Simeon edi Nemuel ye Jamin, Jarib, Zerah ye Shaul: ye Shallum eyen esie,

25ye Mibsam eyen esie ye Mishma eyen esie.

26Nditɔ Mishma ŋko; Hammuel eyen esie Zaccur eyen esie, Shimei eyen esie.

27Ndien Shimei enyene nditɔ-iren efurekiet, ye nditɔ-iban itiokiet: edi nditɔ-ete esie ibonke ediwak nditɔ, ofuri ubon mmɔ inyuŋ itɔtke nte nditɔ Judah.

28Ndien mmɔ eduŋ ke Beer-sheba, ye ke Moladah, ye ke Hazar-shual, ye ke Bilhah,

29ye ke Ezem, ye ke Tolad,

30ye ke Bethuel, ye ke Hormah, ye ke Ziklag,

31ye ke Beth-marcaboth, ye ke Hazar-susim, ye ke Beth-biri, ye ke Shaaraim. Mme mmɔ emi edi obio mmɔ tutu David ada ubɔŋ.

32Mme obio-iŋwaŋ mmɔ enyuŋ edi Etam, ye Ain, ye Rimmon, ye Tochen, ye Ashan, kpa obio ition:

33ye kpukpru mme-obio-iŋwaŋ mmɔ emi ekande mme obio emi ekuk, tutu osim Baal. Mme mmɔ emi edi ebiet iduŋ mmɔ, ye ŋwed emana mmɔ.

34Ye Meshobab, ye Jamlech, ye Joshah eyen Amaziah,

35ye Joel, ye Jehu eyen Joshibiah, ye eyen Seraiah, ye eyen Asiel;

36ye Elioenai, ye Jaakobah, ye Jeshohaiah, ye Asahiah, ye Adiel, ye Jesimiel, ye Benaiah,

37ye Ziza eyen Shiphi, eyen Allon, eyen Jedaiah, eyen Shimri, eyen She-maiah;

38mme mmɔ emi ekotde enyiŋ mmɔ edi mbɔŋ ke otu ubon mmɔ: ndien ufɔk mme ete mmɔ esiaha eti-eti.

39Ekem mmɔ eka ke ebiet emi edukde Gedor, ke edem usiaha-utin itihere, ete iyom se ufene mmimɔ ekpetade.

40Ndien mmɔ ekut ebiet emi enyenede mbiet, emi esehede onyuŋ ɔfɔnde, isɔŋ oro onyuŋ okpon, onyuŋ etie suŋ, onyuŋ ana ke ifure; koro mmɔ oro ekebemde iso eduŋ do, eketo ke Ham.

41Ndien mmɔ emi ekewetde enyiŋ mmɔ edi, ke eyo Hezekiah edidem Judah, edisuan mme tent mmɔ, ye ebiet-iduŋ eke ekesimde do, enyuŋ esobo mmɔ tutu osim mfin emi, enyuŋ eduŋ ke itie mmɔ: koro se ufene mmɔ ekpetade odude do.

42Ekem ndusuk mmɔ eke eketode ke nditɔ Simeon, owo ikie ition, eka ke obot Seir, ndien mme etubom mmɔ edi Pelatiah, ye Neariah, ye Rephaiah, ye Uzziel, nditɔ Ishi.

43Ndien mmɔ esuan nsuhɔ mme Amalekite oro ekebɔhɔde, enyuŋ eduŋ do tutu osim mfin emi.