ŊWED MBON ROME 7 - Efik Old Bible With Sectional Headings

Item Kabaŋa Ndɔ

1MME nte mbufo ifiɔkke, nditɔ-ete (koro ntiŋ ye mmɔ emi efiɔkde ibet), ite ibet akara owo adaŋa ini nte enye odude uwem?

2Koro ibet ɔbɔp ŋwan emi odude ke ubɔk ebe adaŋa ini nte ebe odude uwem; edi ebe ama akpa, enye atara ke ibet ebe.

3Ntre ŋwan ama aka ɔkɔdɔ owo efen ke eyo uwem ebe oro, enyene ndikot enye esin-efibe: edi ebe ama akpa, enye atara ke ibet; ke ntak oro enye idige esin-efibe, ɔkpɔdɔdɔ owo efen.

4Mmɔdo nditɔ-ete mi, ekeda ikpɔhidem Christ esin mbufo ekpaŋa ewɔrɔ ke idak ibet, kpaŋ mbufo ekpekabare ediana ye Owo efen, kpa Enye emi ekesetde ke mkpa, man nnyin isioŋo mfri inɔ Abasi.

5Koro ke adaŋemi nnyin ikodude ke obukidem, mme idiɔk udɔŋ idiɔk-ŋkpɔ, emi etode ke ibet edu, eŋwana utom ke mbak idem nnyin, man isioŋo mfri mkpa.

6Edi ke emi nnyin imokure ye ibet, ikpaŋa iwɔrɔ ikpɔŋ se ikomumde nnyin ikama; ntre ke nnyin inam ŋkpɔ ke obufa usuŋ spirit, idige ke akani usuŋ ŋwed ibet.

7Nso ndien ke ididɔhɔ? Nte ibet edi idiɔk-ŋkpɔ? Idige ntre. Edi mkpɔfiɔkke idiɔk-ŋkpɔ ke mitoho ke ibet; koro mkpɔdiɔŋɔke erisin esit ke ŋkpɔ owo, ke ibet miketiŋke ite, Kusin esit ke ŋkpɔ owo.

8Edi idiɔk-ŋkpɔ asaŋa ke item oro okut ifet anam esit mi ɔyɔhɔ ye kpukpru oruk idiɔk itɔŋ. Koro ke ibet miduhe, idiɔk-ŋkpɔ inyeneke uwem.

9Mma ndu uwem tutuko ke ini nnanade ibet: edi ke adaŋemi item edide, idiɔk-ŋkpɔ ɔwɔrɔ owut idem, ndien ami ŋkpa: mmonyuŋ ŋkut nte item,

10emi ekenɔde kpaŋ ndu uwem, amakabare ɔwɔrɔ mkpa.

11Koro idiɔk-ŋkpɔ asaŋa ke item okut ifet ndibiaŋa mi, onyuŋ ada item oro owot mi.

12Ntem ke ibet asana, item onyuŋ asana, onyuŋ enen, onyuŋ ɔfɔn.

13Nte se ifɔnde amakabare edi mkpa ndien ɔnɔ mi? Idige ntre. Edi idiɔk-ŋkpɔ akabare edi mkpa, man idiɔk-ŋkpɔ owut ete imɔdiɔk ke erida se ifɔnde nnam mkpa nnɔ mi; man idiɔk-ŋkpɔ akpada item akabare ɔdiɔk ebe adaŋa.

14Koro imɔfiɔk ite ibet edi eke spirit; edi ami ndu ke obukidem, nsine ke idak idiɔk-ŋkpɔ.

15Koro mfiɔkke se nnanam; koro idige se idɔŋde mi nndinam, ke nnanam; edi se nsuade, ke nnanam.

16Edi edieke nnamde se midɔŋke mi ndinam, mmonyime nte ibet ɔfɔn.

17Ntre ke idige aba ami nnam oro, edi idiɔk-ŋkpɔ emi oduŋde ke esit mi anam.

18Koro mmɔfiɔk nte baba eti ŋkpɔ kiet iduŋke mi ke idem, oro edi, ke obukidem mi: koro ndinyime ndinam eti ŋkpɔ odu ye ami, edi ndinanam iduhe.

19Koro nnamke eti ŋkpɔ eke ɔdɔŋde mi ndinam, edi idiɔk-ŋkpɔ eke midɔŋke mi ndinam, oro ke nnanam.

20Edi edieke nnamde se midɔŋke mi ndinam, idige aba ami nnam oro, edi idiɔk-ŋkpɔ emi oduŋde ke esit mi.

21Ŋkut emi ndien mbaŋa ibet nte, idiɔk-ŋkpɔ osuk ododu ye ami emi nyomde ndinam nti ŋkpɔ.

22Koro ndara ibet Abasi ke ɔwɔŋesit mi:

23edi ŋkut ibet efen ke mbak idem mi, nte aŋwanade ye ibet eke esit mi amade, onyuŋ adade mi nte ibuotekɔŋ esin ke idak ibet idiɔk-ŋkpɔ emi odude ke mbak idem mi.

24Mbɔm mi, owo nditaha! anie edinyaŋa mi osio ke ikpɔhidem mkpa emi?

25Mmɔkɔm Abasi ke Jesus Christ Ɔbɔŋ nnyin. Ntem ke idem mi nduk ufin nnɔ ibet Abasi ke ekikere mi; edi ke obukidem mi nduk ufin nnɔ ibet idiɔk-ŋkpɔ.