1 CHRONICLES 15 - Efik Old Bible With Sectional Headings

Edidem David Emen Ekebe Ediomi Ɔnyɔŋ Edi Jerusalem

1EKEM David ɔbɔp ufɔk esiemɔ ke obio David; onyuŋ otim ebiet ɔnɔ ekebe Abasi, onyuŋ owuk tent ɔnɔ enye.

2Ndien David ɔdɔhɔ, ete, Owo okubiom ekebe Abasi, ke mibɔhɔke mme Levite: koro mmɔ ke Jehovah ekemek ndibiom ekebe Abasi, ndinyuŋ nnam ŋkpɔ esie ke nsinsi.

3Ekem David okot ofuri Israel edi ke Jerusalem, man eda ekebe Jehovah edɔk edi ke ebiet esie oro enye okotimde ɔnɔ enye.

4David onyuŋ osop nditɔ Aaron ye mme Levite:

5eke nditɔ Kohath; Uriel etubom, ye nditɔ-ete esie ikie ye edip:

6eke nditɔ Merari, Asaiah etubom, ye nditɔ-ete esie ikie iba ye edip:

7eke nditɔ Gershom; Joel etubom,

8ye nditɔ-ete esie ikie ye edip ye duop: Elizaphan; Shemaiah etubom, ye nditɔ-ete esie ikie iba: nditɔ Hebron; Eliel etubom,

9ye nditɔ ete esie anaŋ, nditɔ Uzziel;

10Amminadab etubom, ye nditɔ-ete esie, ikie ye duopeba.

11Ekem David okot Zadok ye Abiathar mme oku, ye mme Levite, ye Uriel, ye Asaiah, ye Joel, ye Shemaiah, ye Eliel, ye Amminadab,

12onyuŋ ɔdɔhɔ mmɔ, ete, Mbufo edi mbɔŋ mme ete mme Levite: enam idem mbufo ye nditɔ-ete mbufo esana, enyuŋ eda ekebe Jehovah Abasi Israel edɔk edi ke ebiet emi ntimde nnim nnɔ enye.

13Koro mbufo mikanamke ntre akpa ini, esin Jehovah Abasi nnyin obumere anam nnyin: koro nnyin mikoyomke enye ke ido esie.

14Ndien mme oku ye mme Levite enam idem mmɔ esana, man eda ekebe Jehovah Abasi Israel edɔk.

15Ndien nditɔ mme Levite edori esaŋ ke afara mmɔ ebiom ekebe Abasi, kpa nte Moses eketemede ke uyo Jehovah.

16David onyuŋ eteme mbɔŋ mme Levite, ete enim nditɔ-ete mmɔ, ete eda ndido, ye harp, ye cymbal, ekwɔ ikwɔ, enam eyom ke erimenere uyo ke idara.

17Ntre ke mme Levite enim Heman eyen Joel, ye ndusuk nditɔ-ete esie, ye Asaph eyen Berechiah, ye ndusuk nditɔ Merari, nditɔ-ete mmɔ; ye Ethan eyen Kushaiah;

18ndien nditɔ-ete mmɔ, ke udiana, kpa Zechariah, ye Ben, ye Jaaziel, ye Shemiramoth, ye Jehiel, ye Unni, ye Eliab, ye Benaiah, ye Maaseiah, ye Mattithiah, ye Eliphelehu, ye Mikneiah, ye Obed-edom, ye Jeiel, mme etie-usuŋ, esaŋa ye mmɔ.

19Ndien mme ɔkwɔ-ikwɔ, Heman, ye Asaph, ye Ethan, ekama cymbal okpoho, man ebre ɔkpɔsɔŋ.

20Ndien Zechariah, ye Aziel, ye Shemiramoth, ye Jehiel, ye Unni, ye Eliab, ye Maaseiah, ye Benaiah, ekama psaltery edi mme etubom Alamoth.

21Ndien Mattithiah, ye Eliphelehu, ye Mik-neiah, ye Obed-edom, ye Jeiel, ye Azaziah, ekama harp edi mme etubom Sheminith, ete eteme (mmɔ).

22Ndien Chenaniah ɔbɔŋ mme Levite akama utom ikwɔ: edi enye eteme mmɔ ke ikwɔ, koro enye enyenede ikike.

23Ndien Berechiah ye Elkanah edi mme etie-usuŋ ke eke ekebe.

24Shebaniah ŋko, ye Joshaphat, ye Nethanel, ye Amasai, ye Zechariah, ye Benaiah, ye Eliezer, mme oku, edi mme andifuri ukorowo ke iso ekebe Abasi; Obed-edom ye Jehiah enyuŋ edi mme etie-usuŋ ke eke ekebe.

25Ndien David, ye mbiowo Israel, ye mme etubom mme tɔsin eka ekeda ekebe ediomi Jehovah ke ufɔk Obed-edom, edɔk edi ke idara.

26Edikem adaŋemi Abasi aŋwamde mme Levite oro ebiomde ekebe ediomi Jehovah, mmɔ ewa enaŋ itiaba, ye okukim erɔŋ itiaba.

27David onyuŋ esine ɔfɔŋ idem eti linen; kpukpru mme Levite oro ebiomde ekebe, ye mme andikwɔ ikwɔ, ye Chenaniah etubom ikwɔ mme andikwɔ (enyuŋ esine linen): David onyuŋ esine ephod linen.

28Ofuri Israel enyuŋ eda ekebe ediomi Jehovah edɔk ke mkpo, ye ke uyom obukpoŋ, ye ukorowo, ye cymbal, ke enam uyom ke psaltery, ye ke harp.

29Edikem adaŋemi ekebe ediomi Jehovah osimde obio David, Michal eyen Saul aŋwan etie ke window ese, onyuŋ okut nte edidem David enekde unek, onyuŋ ebrede mbre; ndien Michal esin enye ke ndek ke esit esie.