ESTHER 3 - Efik Old Bible With Sectional Headings

Haman Odiomi Nte Enye Edisaŋade Osobo Ofuri Mme Jew

1KE ŋkpɔ emi ema ekebe, Ahasuerus okpono Haman, eyen Hammedatha, Agagite, enyuŋ ofori enye, onyuŋ emenere ebekpo esie ke enyɔŋ akan kpukpru mbɔŋ emi edude ye enye.

2Ndien kpukpru ikɔt edidem eke edude ke inua-otop edidem, enuhɔ, enyuŋ etuak ibuot enɔ Haman: koro ntem ke edidem okowuk abaŋa enye. Edi Mordecai inuhɔke, inyuŋ ituakke ibuot.

3Ndien ikɔt edidem emi edude ke inua-otop edidem, edɔhɔ Mordecai, ete, Nsinam afo abiatde ewuhɔ edidem?

4Edikem, ke ini mmɔ edɔhɔde enye ntem kpukpru usen, ndien enye mikopke uyo mmɔ, mmɔ esian enɔ Haman, man ekut nte ikɔ Mordecai ediwɔrɔde; koro enye akasiakde ɔnɔ mmɔ, ete ke imɔ idi eyen mme Jew.

5Ekem adaŋemi Haman okutde nte Mordecai minuhɔke, minyuŋ ituakke ibuot inɔ imɔ, esit ofut Haman ke idem.

6Ndien enye ese erinyan ubɔk esie ntuk Mordecai ikpɔŋ ke ndek; koro mmɔ ekesiakde oruk Mordecai enɔ enye: ndien Haman oyom nte osobode kpukpru mme Jew eke edude ke ofuri isɔŋ oro edidem Ahasuerus akarade, kpa oruk Mordecai.

7Ke akpa ɔfiɔŋ emi edide ɔfiɔŋ Nisan, ke ɔyɔhɔ isua edidem Ahasuerus duopeba, owo esin Pur, oro edi afia, ke iso Haman, kwa usen, kwa usen, ye kwa ɔfiɔŋ, kwa ɔfiɔŋ, ke ɔfiɔŋ duopeba, oro edi ɔfiɔŋ Adar.

8Ekem Haman ɔdɔhɔ edidem Ahasuerus, ete, Mbio kiet mmɔdo emi esuanade enyuŋ ebaharede ke otu mme andiduŋ kpukpru mme province emi afo akarade; ndien ido mmɔ edi isio ye kpukpru mme idut; mmɔ inyuŋ inimke mme ewuhɔ edidem: mmɔdo mifɔnke edidem ndiyak mmɔ.

9Ama enem edidem, yak ewet ete esobo mmɔ: ndien ami nyedomo tɔsin talen silver duop, nsin ke ubɔk mme anam utom emi, man eda enye esin ke ɔtɔ-unim-inyene edidem.

10Ndien edidem osio mkpanuen esie ke ubɔk esie efep, ada ɔnɔ Haman, eyen Hammedatha Agagite, usua mme Jew.

11Ndien edidem ɔdɔhɔ Haman, ete, Enɔ fi silver oro, ye mbio oro, man afo anam ye mmɔ kpa nte ɔfɔnde fi ke enyin.

12Ndien ekot mme ewet-ŋwed edidem edi, ke akpa ɔfiɔŋ, ke ɔyɔhɔ usen duopeta; ndien mmɔ ewet kpukpru se Haman etemede, enɔ ikpɔ owo edidem, ye mme andikara emi ekarade kpukpru mme province, ye mme etubom kpukpru mme idut, ke kpukpru province, nte ŋwed mmɔ esaŋade, ye kpukpru mme idut nte usem mmɔ edide; ewet esin ke enyiŋ edidem Ahasuerus, enyuŋ efik ke mkpanuen edidem.

13Ndien mmɔ eda ŋwed esin mbon itɔk ke ubɔk, ete eda esɔk kpukpru mme province edidem, ete esobo, ewot, enyuŋ ebiat mme Jew akpaimɔ, ɔtɔŋɔde ke akparawa, tutu osim akani owo, ye ŋkpri nditɔwɔŋ, ye iban ke usen kiet, ke ɔyɔhɔ usen duopeta ke ɔyɔhɔ ɔfiɔŋ duopeba, emi edide ɔfiɔŋ Adar, enyuŋ ebume ŋkpɔ mmɔ.

14Mmɔ ekaŋa ŋwed emi, man etaŋa ewuhɔ ke kpukpru mme province, esian kpukpru mme idut, ete, Yak mmɔ enam ŋkpɔ ebeŋe usen oro.

15Mbon itɔk ewɔŋɔ, koro uyo edidem esinde mmɔ esɔp ukot; mmɔ enyuŋ etaŋa ewuhɔ oro ke palace Shushan. Ndien edidem ye Haman esuhɔre etie eŋwɔŋ ŋkpɔ; edi obio Shushan otime.