1 SAMUEL 12 - Efik Old Bible With Sectional Headings

Samuel Etiŋ Ikɔ Unyɔŋɔ ye Nditɔ Israel

1NDIEN Samuel ɔdɔhɔ ofuri Israel, ete, Sese, mma ŋkop uyo mbufo ke kpukpru se mbufo ekedɔhɔde mi, mma nnyuŋ nnim edidem nnɔ mbufo.

2Ndien, sese, ke emi edidem ke asaŋa mbufo ke iso: ami mmɔsɔŋ mmonyuŋ ntibe iwat; ndien, sese, nditɔ mi edu ye mbufo: ami mma nnyuŋ nsaŋa ke iso mbufo toto ke ini uyen mi tutu osim mfin emi.

3Se mi mi: mbufo ebaŋa mi ke iso Jehovah, ye ke iso enye emi Enye ekeyetde aran: ŋkɔbɔ anie owo enaŋ esie? ŋkɔbɔ anie owo ass esie ŋko? ŋkonyuŋ ntuk anie owo? ŋko-nyuŋ mfik anie? anie owo ke ŋkenyuŋ mbɔ inyene ke ubɔk, man nda enye mfuk enyin mi? ndien nyeyak nnɔ mbufo.

4Ndien mmɔ edɔhɔ ete, Afo ukotukke nnyin, ukonyuŋ ufikke nnyin, unyuŋ ubɔhɔ baba owo nnyin kiet ŋkpɔ ke ubɔk.

5Ndien enye ɔdɔhɔ mmɔ ete, Jehovah edi ntiense ye mbufo, edidem esie onyuŋ edi ntiense mfin emi, ete ke mbufo ikwe baba ŋkpɔ kiet ke ubɔk mi. Ndien mmɔ edɔhɔ ete, Ntiense.

6Ndien Samuel ɔdɔhɔ kpukpru owo, ete, Ke edi Jehovah okonim Moses ye Aaron, okonyuŋ ada mme ete mbufo ke isɔŋ Egypt ɔdɔk.

7Mbufo etuak eda, ndien, man ŋkpe ye mbufo ke iso Jehovah mbaŋa kpukpru edinen ŋkpɔ Jehovah oro enye akanamde mbufo ye mme ete mbufo.

8Adaŋemi Jacob odukde ke Egypt, mme ete mbufo enyuŋ esemede enɔ Jehovah, ndien Jehovah ɔdɔŋ Moses ye Aaron ekesioŋo mme ete mbufo ke Egypt efep, enyuŋ enɔ mmɔ iduŋ ke ebiet emi.

9Ndien adaŋemi mmɔ efrede Jehovah Abasi mmɔ, enye ada mmɔ anyam esin Sisera, etubom mbon-ekɔŋ Hazor, ke ubɔk, ye ke ubɔk mme Philistine, ye ke ubɔk edidem Moab, ndien mmɔ oro eŋwana ekɔŋ ye mmɔ.

10Ndien mmɔ eseme enɔ Jehovah, ete, Nnyin imanam idiɔk, koro nnyin ikpɔŋde Jehovah, inyuŋ inamde ŋkpɔ Baalim ye Ashtaroth: edi kam sio nnyin ke ubɔk mme asua nnyin, ndien nnyin iyenam ŋkpɔ fo.

11Ndien Jehovah ɔdɔŋ Jerubaal, ye Bedan, ye Jephthah, ye Samuel, onyuŋ osioŋo mbufo ke ubɔk mme asua mbufo emi ekande mbufo ekuk; ndien mbufo eduŋ ke ifure

12Ekem ke ini mbufo ekutde nte Nahash edidem nditɔ Ammon edide ndiŋwana ekɔŋ ye mbufo, mbufo edɔhɔ mi, ete, Ih ih, yak edidem kiet ada ubɔŋ nnyin adaŋemi Jehovah Abasi mbufo edide edidem mbufo.

13Sese, ndien, edidem emi mbufo emekde enyuŋ eyomde! ndien, sese, Jehovah omonim edidem ɔnɔ mbufo.

14Edieke mbufo edibakde Jehovah, enyuŋ enam ŋkpɔ esie, enyuŋ ekop uyo esie, inyuŋ itutke utɔŋ ke uyo Jehovah, ndien mbufo ye edidem mbufo ŋko emi adade ubɔŋ mbufo, eyesuk etiene Jehovah Abasi mbufo:

15edi edieke mbufo midikopke uyo Jehovah, edi etut utɔŋ ke uyo Jehovah, ndien Jehovah eyeda ubɔk odori mbufo, kpa nte enye okodoride mme ete mbufo ke idem.

16Mbufo etuak eda, ndien, enyuŋ ekut akamba ŋkpɔ emi Jehovah edinamde ke iso mbufo. Nte mfin emi idige ini ukpeŋe wheat?

17Nyeseme nnɔ Jehovah, ndien enye eyenam enyɔŋ oyomo, onyuŋ anam edim edep; man mbufo efiɔk, enyuŋ ekut ete ke idiɔk ido mbufo omokpon, emi mbufo ekenamde ke iso Jehovah, ke eriyom edidem nnɔ idem mbufo.

18Ndien Samuel eseme ɔnɔ Jehovah, ndien Jehovah anam enyɔŋ oyomo, onyuŋ anam edim edep ke usen oro: ndien kpukpru owo ebak Jehovah ye Samuel eti-eti.

19Ndien kpukpru owo edɔhɔ Samuel, ete, Kpe Jehovah Abasi fo ubɔk nɔ ikɔt fo, man nnyin ikukpaŋa: koro nnyin imada idiɔkŋkpɔ ke eriyom edidem ikɔrɔ ye mme idiɔk ido nnyin efen.

20Ndien Samuel ɔdɔhɔ kpukpru owo, ete, Mbufo ekudikhe: mbufo emenam kpukpru idiɔk-ŋkpɔ emi: edi ekuwaha ekpɔŋ Jehovah, edi enam ŋkpɔ Jehovah ke ofuri esit mbufo; ekunyuŋ ewaha:

21koro ekpebinede ikpikpu ŋkpɔ eke midoroke minyuŋ inyaŋake; koro mmɔ edide ikpikpu ŋkpɔ.

22Koro Jehovah midikpɔŋke ikɔt esie ke abaŋa akamba enyiŋ esiemɔ: koro Jehovah amama ndinim mbufo ke ikɔt esiemɔ.

23Ndien ama edi ami, nsa mi! nduehe Jehovah ke eritre ndikpe enye ubɔk nnɔ mbufo: edi nyeteme mbufo eti ye edinen usuŋ:

24edi mbufo ebak Jehovah, enyuŋ enam ŋkpɔ esie ke akpanikɔ ke ofuri esit mbufo: koro mbufo ese oruk ikpɔ ŋkpɔ emi enye akamde ye mbufo.

25Edi edieke mbufo edidiɔkde, eyesobo mbufo ye edidem mbufo ŋko.