2 NDIDEM 15 - Efik Old Bible With Sectional Headings

Azariah Akara ke Judah

1KE ɔyɔhɔ isua Jeroboam edidem Israel edip ye itiaba, Azariah eyen Amaziah edidem Judah ada ubɔŋ.

2Enye edi isua efurekiet ke ini enye adade ubɔŋ, onyuŋ edi edidem ke Jerusalem ke isua aba ye duopeba. Enyiŋ eka esie onyuŋ ekere Jecholiah a Jerusalem;

3enye onyuŋ anam se inende ke iso Jehovah, kpa nte Amaziah ete esie akanamde kpukpru:

4edi mmɔ imenke mme ŋkokoŋo ebiet ifep: mbio-obio esuk ewa uwa enyuŋ efɔp incense ke mme ŋkokoŋo ebiet.

5Ekem Jehovah ɔnɔ edidem ufen, ndien enye ɔdɔŋɔ akpa-mfia, tutu osim usen mkpa esie, onyuŋ oduŋ ke ufɔk udɔŋɔ. Ndien Jotham eyen edidem edi etubom ufɔk, onyuŋ ekpe ikpe mbio-obio.

6Ndien ama edi ikɔ Azariah eke esuhɔde, ye kpukpru se enye akanamde, nte iwetke mmɔ isin ke ŋwed ikɔ eyo ndidem Judah?

7Ekem Azariah ɔsuhɔre ana ye mme ete esie ede; ndien mmɔ ebuk enye ye mme ete esie ke obio David: ndien Jotham eyen esie ada ubɔŋ ke itie esie.

8Ke ɔyɔhɔ isua Azariah edidem Judah edip ye efureta, Zechariah eyen Jeroboam ada ubɔŋ Israel ke Samaria, ke ɔfiɔŋ itiokiet.

9Enye onyuŋ anam idiɔk ke iso Jehovah, kpa nte mme ete esie ekenamde: ikabakede ikpɔŋ mme idiɔk ido Jeroboam eyen Nebat, emi akanamde Israel ekebare ediɔk.

10Ekem Shallum eyen Jabesh oduk odu abaŋa enye, onyuŋ ɔtɔ enye owot ke iso kpukpru owo, ndien ada ubɔŋ ke itie esie.

11Ndien ama edi ikɔ Zechariah eŋwen, sese, ewet mmɔ esin ke ŋwed ikɔ eyo ndidem Israel.

12Emi edi uyo Jehovah oro enye ɔkɔdɔhɔde Jehu, ete, Ubon fo eke emana inaŋ eyetie ke ebekpo Israel. Ntre ke onyuŋ osu.

13Shallum eyen Jabesh ada ubɔŋ ke ɔyɔhɔ isua Uzziah edidem Judah edip ye efurenaŋ: ndien enye edi edidem ke Samaria ke ɔfiɔŋ kiet.

14Ndien Menahem eyen Gadi oto ke Tirzah, ɔdɔk aka ke Samaria, ɔkɔtɔ Shallum eyen Jabesh ke Samaria owot, onyuŋ ada ubɔŋ ke itie esie.

15Ndien ama edi ikɔ Shallum eke esuhɔde, ye odu emi enye odukde, sese, ewet mmɔ esin ke ŋwed ikɔ eyo ndidem Israel.

16Ndien Menahem oto ke Tirzah ɔwɔrɔ aka akasuan Tiphsah ye kpukpru se idude ke esit, ye mme adaŋa esie: koro mmɔ misioho usuŋ inɔ enye, mmɔdo enye asuande mmɔ: onyuŋ asiak kpukpru iban mmɔ eke eyomode idibi.

17Ke ɔyɔhɔ isua Azariah edidem Judah edip ye efurenaŋ, Menahem eyen Gadi ada ubɔŋ Israel ke Samaria ke isua duop.

18Enye onyuŋ anam idiɔk ke iso Jehovah: ke ofuri eyo esie enye ikabakede ikpɔŋ mme idiɔk ido Jeroboam eyen Nebat, emi akanamde Israel ediɔk.

19Ekem Pul edidem Assyria edi ndiŋwana ekɔŋ ye idut oro: ndien Menahem ɔnɔ Pul tɔsin talent silver, man enye esin ubɔk anam ubɔŋ ɔsɔŋ ada enye ke ubɔk.

20Ndien Menaham anam Israel, kpa mbon inyene, etomo silver oro, man ada ɔnɔ edidem Assyria, owo kiet kiet ɔnɔ shekel silver aba ye duop. Ntre ke edidem Assyria afiak, inyuŋ ibigike do ke isɔŋ.

21Ndien ama edi ikɔ Menahem emi esuhɔde, ye kpukpru se enye akanamde, nte iwetke mmɔ isin ke ikɔ eyo ndidem Israel?

22Ekem Menahem ɔsuhɔre ana ye mme ete esie ede; ndien Pekahiah eyen esie ada ubɔŋ ke itie esie.

23Ke ɔyɔhɔ isua Azariah edidem Judah aba ye duop, Pekahiah eyen Menahem ada ubɔŋ Israel ke Samaria, ke isua iba.

24Enye onyuŋ anam idiɔk ke iso Jehovah: ikpɔŋke mme idiɔk ido Jeroboam eyen Nebat, emi akanamde Israel ekabare ediɔk.

25Ekem Pekah eyen Remaliah, adidaha owo esiemɔ kiet, oduk odu abaŋa enye, onyuŋ owot enye ke Samaria, ke ɔkpɔsɔŋ ɔtɔ ufɔk edidem, adian Argob ye Arieh, ye nditɔ Gilead owo aba ye duop emi edude ye enye: ntre ke ewot enye, onyuŋ ada ubɔŋ ke itie esie.

26Ndien ama edi ikɔ Pekahiah eke esuhɔde, ye kpukpru se enye akanamde, sese, ewet mmɔ ke ŋwed ikɔ eyo ndidem Israel.

27Ke ɔyɔhɔ isua Azariah edidem Judah aba ye duopeba, Pekah eyen Remaliah ada ubɔŋ Israel ke Samaria, ke isua edip.

28Enye ŋko akanam idiɔk ke iso Jehovah: ikpɔŋke mme idiɔk ido Jeroboam eyen Nebat emi akanamde Israel ekabare ediɔk.

29Ke eyo Pekah edidem Israel, Tiglath-pileser edidem Assyria edi edida Ijon, ye Abel-beth-maacah, ye Janoah, ye Kedesh, ye Hazor, ye Gilead, ye Galilee, kpa ofuri isɔŋ Naphtali; onyuŋ ataŋ mmɔ ɔnyɔŋ ke Assyria.

30Ekem Hoshea eyen Elah oduk odu abaŋa Pekah eyen Remaliah, onyuŋ ɔtɔ enye owot, onyuŋ ada ubɔŋ ke itie esie, ke ɔyɔhɔ isua Jotham, eyen Uzziah, edip.

31Ndien ama edi ikɔ Pekah eŋwen, ye kpukpru se enye akanamde, sese, ewet mmɔ ke ŋwed ikɔ eyo ndidem Israel.

32Ke udiana-akpa isua Pekah eyen Remaliah edidem Israel, Jotham eyen Uzziah edidem Judah ada ubɔŋ.

33Enye edi isua edip ye ition ke ini enye adade ubɔŋ, onyuŋ edi edidem ke Jerusalem ke isua efurekiet. Enyiŋ eka esie onyuŋ ekere Jerusha eyen Zadok.

34Enye onyuŋ anam se inende ke enyin Jehovah: anam kpukpru nte ete esie Uzziah akanamde.

35Edi enye imenke mme edikoŋ ebiet ifep: mbio-obio esuk ewa uwa enyuŋ efɔp incense ke mme edikoŋ ebiet.

36Enye anam enyɔŋ-enyɔŋ inua-otop ufɔk Jehovah. Ndien ama edi ikɔ Jotham emi esuhɔde, ye kpukpru se enye akanamde, nte ikewetke mmɔ isin ke ŋwed ikɔ eyo ndidem Judah?

37Ke ini oro Jehovah ɔtɔŋɔ ndidɔŋ Rezin edidem Syria, ye Pekah eyen Remaliah, eka ekɔŋ ye Judah.

38Ekem Jotham ɔsuhɔre ana ye mme ete esie ke obio David ete esie: ndien Ahaz eyen esie ada ubɔŋ ke itie esie.